Hatutan.com, (30 Marsu 2023), Díli—Prezidente Repúblika (PR), José Ramos-Horta husu bá Timor oan sira atu apreende hamutuk ho Voluntáriu sira hosi grupu Korpu da Pás (Peace Corp) hosi Amérika atu dezenvolve dezenvolve komunidade, suku no aldeia.

Prezidente Repúblika, José Ramos-Horta partisipa serimónia The Peace Corps Swearing-in Ceremony, iha Embaixada Estadus Unidus Amérika, Díli, Kinta (30/03/202). Foto/Elio dos Santos da Costa.

Xefe Estadu husu ne’e iha serimónia posse ba voluntáriu Amerikanu hosi Peace Corp iha Embaixada Estadus Unidus Amérika, Praia dos Coqueiros, Dili, Kinta (30/03/2023), ne’ebé sei hahú servisu ba komunidade lokál iha Timor-Leste.

Lee Mós: Estadus Unidus Amérika no Timor-Leste Lansa Ezersísiu Konjuntu Daruak bá Ezérsitu

Ramos-Horta sempre kontente partisipa iha eventu sira Peace Corp nian, servisu voluntáriu ne’ebé povu Amerikanu halo liu hosi Peace Corp ne’e importante no ne’e bele sai ezemplu ida di’ak ba povu ne’e atu apreende ho sira.

Xefe Estadu koñese di’ak organizasaun ne’e tanba organizasaun ne’e ninia inspirasaun mai hosi eis Prezidente Amerikanu Jhon F. Kennedy no inisiativa ne’ebé Peace Corp halo úniku iha mundu tanba joven sira Amerikanu nian ba iha rai lubuk ida iha mundu atu ajuda buat oin-oin, iha área agrikultura, edukasaun liu-liu formasaun lian Inglês, sira mós hanorin kona-bá jestaun no buat seluk ne’ebé komunidade presiza.

“Ha’u husu ba komunidadee favor tau-matan ba voluntáriu Peace Corp sira-ne’e, sira mai hosi dook, sira laiha interese seluk tanba sira responde pedidu governu Timor-Leste no Prezidente Repúblika atu mai  servisu voluntáriu iha komunidade nia leet. Haree sira di’ak tanba sira bele sai hanesan Embaixadór boa vontade ba Timor-Leste,” Ramos-Horta hateten.

Bainhira komunidade haree voluntáriu Peace Corp di’ak, servisu hamutuk ho sira no respeita sira sira  mós sei respeita Timor nia kultura no identidade.

Bainhira Timoroan hotu haree voluntáriu sira di’ak, loron-loron sira halo mensajen ba sira nia inan-aman, família no amigu sira inklui xenadór povu Amerikanu nian no ida-ne’e lori imajen di’ak ba povu Timor-Leste no sira sai hanesan Embaixadór pozitivu ba Timor-Leste no iha posibilidade ema barak hakarak mai vizita Timor-Leste.

Iha fatin hanesan, Enkarregadu Negósiu Estadus Unidus Amérika, Tom Daley kontente tebes tanba ohin hala’o serimonia posse ba voluntáriu Amerikanu hosi Peace Corp ne’ebé sei hahú servisu ba komunidade lokál iha Timor-Leste.

Desde 2002 organizasaun Peace Corp liu hosi Voluntáriu sira kuaze apoia dezenvolvimentu komunidade iha lidun sira nasaun nian.

Agradese ba Peace Corp nia servisu, Timoroan rihun ba rihun iha Timor-Leste laran tomak hetan ona treinamentu hanesan emprendedorizmu, empregabilidade no lian Inglês, abilidade hirak ne’e mak esensiál atu hadi’a prosperidade ekonomia Timor-Leste nian.

Peace Corp nia Voluntáriu sira reprezenta povu Amerikanu nian ne’ebé di’ak iha jenerosidade, servi no iha kompromisu atu sai forsa ida di’ak ba mundu.

“Sira mai hosi kintu-kantu sira hotu iha Amérika no reflete diversidade hosi esperiénsia Amerikanu nian. Sira reprezenta antesedente barak no abilidade oin-oin no esperiénsia sira atu kontribui,” Tom Daley hateten.

Enkarregadu ne’e mós enkoraza atu Voluntáriu sira Peace Corp nian atu esplora Timor-Leste nia rekursu naturál sira ne’ebé bonita, hosi tasi ibun sira ne’ebé sei orijen to’o foho ne’ebé furak no Timor-Leste nia kafé ne’ebé naran boot tebes iha mundu no orgániku.

Enkarregadu negósiu Estadus Unidus Amérika ne’e mós promete sei vizita Voluntáriu sira Peace Corp nian durante sira nia estadia ho komunidade atu bele apreende hamutuk impaktu pozitivu ba parseiru sira no komunidade lokál.

Iha fatin hanesan Diretór Nasionál Peace Corp Timor-Leste, Jamie Fouss hato’o parabéns bá kandidatu Voluntáriu Grupu 11, ne’ebé  konklui ona formasaun pré-servisu intensivu durante semana sanulu no ofisialmente hahú serbí iha Peace Corp.

Nia kontente tanba konsege to’o iha Rai destinasaun. Haksolok ba aventura foun, maibé fuan-taridu oitoan ba saida mak sei mosu iha oin.

Durante semana ualu iha Gleno, voluntáriu sira-nia família ospedia simu ho liman rua. Peace Corp integra ba sira-nia moris lorloron. Voluntáriu sira prátika saida mak apreende iha klase língua nian.

Kontente tebes tanba sira gosta hahán Timór nian. La dúvida atu han ai-fuan no modo ne’ebé sira nunka han.

Nia mós hakfodak tanba voluntáriu sira aprende lian Tetun ho lais no bele ko’alia ona. Ida-ne’e provas ida ba manorin talentozu sira ho kompromisu atu halo komunikasaun.

“Durante Ita-Boot sira-nia aula prátika, ha’u gosta tebes bainhira haree Ita-Boot sira hanorin iha Ensinu Báziku no Sekundáriu, no mós grupu foin-sa’e sira sees hosi eskola. Ha’u haree Ita-Boot sira aprezenta lisaun gramátika no dada estudante sira-nia atensaun. Ha’u haree Ita-Boot sira di’ak loos ho sira, bolu sira uza sira-nia naran, enkoraza sira atu ko’alia no ho pasiénsia hein sira atu habrani-an hatán ita-nia pergunta,” nia apresia.

Voluntáriu sira sei ba hanorin klase adultu sira kona-bá oinsá hakerek CV, marketing ka planu orsamentu.

Iha klase ida depoizde eskola, foin-sa’e sira tesi figura no liafuan sira atu deskreve sira-nia aspirasaun moris oinsá harii família ne’ebé di’ak, serbisu di’ak no moris ida ne’ebé konfortavel.

Tanba ne’e nia hato’o parabens bá voluntáriu sira no pronto atu apoia nafatin durante serbí no haree mudansa iha servisu ne’e to’o rohan.

Desde 2002 to’o ohin lori voluntáriu sira ne’ebé mai hala’o misaun Peace Corp nian ho totál voluntáriu liu na’in 200.

Grupu Voluntáriu Amerikanu Peace Corp ne’ebé ohin simu posse sei hahú servisu ba komunidade lokál, iha Voluntariu hamutuk na’in sanulu resin hitu (17), sei tulun Edukasaun Inglés no Dezenvolvimentu Ekonomiku Komunitáriu.

Ba tinan rua oin mai, Voluntáriu sira ne’ebé ohin simu posse sei serví iha Munisipiu sira hanesan, Bobonaru, Likisa, Ermera no Manatutu, iha ne’ebá sira sei tulun edukasaun Inglés no Dezenvolvimentu Ekonomiku Komunitáriu.

Jornalista: Vito Salvadór