Hatutan.com, (13 Abríl 2023), Díli—Organizasaun Arte Marsiál (0AM) hamutuk 18 halo deklarasaun hodi harii dame  no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár 2023.

Organizasaun Arte Marsiál (0AM) hamutuk 18 halo deklarasaun hodi harii dame no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár, iha Ginasio Desportu Díli, Kinta (13/04/2023). Foto/Elio dos Santos da Costa.

Organizasaun Arte Marsiál 18 ne’ebé halo deklarasaun Dame iha Ginasio Desportu Díli (GDD) mak hanesan, Persaudaran Setia Hati Terate (PSTH), Ikatan Kera sakti-Putra Timar-este (IKPS-PTL), Kmanek Oan Raik Laran (KORK), Perisai Diri Silat Timor-Leste, Federasaun Taekwondo Timor-Leste, Federasaun Shorinji Kempo, Federasaun AlKIDO, Federasaun Boxe Amadora Timor-Leste, Federasaun Muay Thai Timor-Leste, Asosíasaun Silat Padjadjaran Nasional, Sinar Putih, Gerbawasik, THS-THM, Federasaun Wushu, Federasaun Karate-do, Federasaun Judo, Seruling Dewata, Federasaun Silat Timor-Leste.

Lee Mós: Governu Aloka Millaun $2,5 Atu Dezenvolve Arte Marsiál Sira Liuliu Formasaun bá Treinadór

Portavoz OAM no Prezidente Federasaun Silat Timor-Leste (FESTIL), Hermenegildo Custódio da Silva iha deklarasaun Dame hateten, OAM sei respeita no hakru’uk bá Lei Inan Konstituisaun Repúblika Demokrátika Timor-Leste (K-RDTL), ba erói no eroina sira mak mate no fakar ran ona ba luta ukun rasik an nian, ba prinsipiu no valór sira iha país ida-ne’e.

Organizasaun arte marsiál ida-idak hahi no halo tuir, ho nune’e deklara katak OAM sei respeita liberdade espresaun no direitu sivil no politíku sidadaun ida-idak nian, liu-liu membru organizasaun arte marsiál sira nian no kontinua ezerse direitu hirak ne’e iha eleisaun Parlamentár nian tuir dalan Dame.

Organizasaun Arte Marsiál (0AM) hamutuk 18 halo deklarasaun hodi harii dame no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár, iha Ginasio Desportu Díli, Kinta (13/04/2023). Foto/Elio dos Santos da Costa.

Valoriza diversidade Organizasaun Arte Marsiál (0AM) ida-idak nia fiar ba tradisaun no kultura organizasaun nian, inklui Organizasaun Arte Rituál sira hotu iha teritóriu Timor-Leste laran tomak.

“OAM sei kontinua luta ba prevensaun konflitu ho violénsia, harii no hametin Dame iha komunidade. Hakribi violénsia ho forma saida de’it. Habelar tradisaun dame nahe-biti bo’ot tuir kultura-lisan Timor nian. Ezerse ami nia direitu demokrátiku tuir dalan dame nian, la monu ba lasu no lia-bobar sira ne’ebé nakonu ho tendénsia perturba órden públiku,” Hermenegildo Custódio da Silva hateten iha Ginasio Desportu Díli, Kinta (13/04/2023).

Porta vóz ne’e deklara katak, Organizasaun Arte Marsiál (OAM) la involve ka afilia bá kualkér partidu politiku no kontinua mantein indepedénsia no imparsialiadade.

Prontu koopera ho lider komunitária, PNTL, STAE no CNE, no mos KRAM hodi buka solusaun ba konflitu ka violénsia mak Involve membru organizasaun arte marsiál.

“Nu’udár organizasaun arte marsiál mak iha afiliasaun internasionál no moris ona ho valór no prinsipiu nobre ba umanidade nian, ami kontinua iha komitmentu atu fó susesu ba eleisaun parlamentár 2023 nian. Sei hakas an liután hodi mantein situasaun dame iha ami hotu nia komunidade no Organizasaun Artes Marsiál sira,” nia afirma.

Prezidente Komisaun Reguladora Arte Marsiál (KRAM), Fernando António da Costa hateten, ohin KRAM hamutuk ho Organizasaun Arte Marsiál hotu halo deklarasaun Dame ba eleisaun parlamentár 2023, tanba kada eleisaun ema hotu sempre hanoin katak, sempre iha problema iha arte marsiais no ida ne’e la’ós ona segredu tanba iha públiku membru balun afilia ba partidu ida no balun ba seluk ne’ebé bele hamosu provokasaun bele lori ema ba hamosu konflitu no violénsia.

“Ita hakarak hamutuk ho OAM sira halo apelu ba públiku atu bele ba to’o iha membru sira nune’e iha eleisaun ne’e provokasaun, violénsia no konflitu ne’ebé liga ho Arte Marsiál bele redús,” Fernando António da Costa hateten.

Segundu Komandante Jerál PNTL, Komisariu Polísia Pedro Belo hateten, OAM sira halo deklarasaun Dame no entrega bá iha komandu Polísia Nasionál Timor-Leste.

Organizasaun Arte Marsiál (0AM) hamutuk 18 halo deklarasaun hodi harii dame no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár, iha Ginasio Desportu Díli, Kinta (13/04/2023). Foto/Elio dos Santos da Costa.

Deklarasaun ne’e sai mós hanesan baze ida ne’ebé PNTL sei kaer metin hodi halo investigasaun ba membru OAM sira bainhira halo konflitu durante kampaña to’o ba iha eleisaun Parlamentár.

“Maioria Prezidente OAM hotu asina deklarasaun ne’e. Bainhira ba oin mak mosu problema ne’ebé involve membru OAM, ita sei bolu Prezidente sira atu husu sira nia responsabilidade tanba sira rasik mak assina no entrega ba PNTL,” Pedro Belo afirma.

Ohin simu ona deklarasaun Dame hosi OAM no iha tempu tuir mai sei bolu mós Organizasaun Arte Rituál atu bele iha kolaborasaun liu-liu servisu hamutuk ho PNTL hodi asegura eleisaun Parlamentár tinan 2023.

“Ami sei haruka ami nia ekipa ba buka tuir koordenadór Arte Rituál sira iha tempu badak atu bele hasoru malu atu sira mós bele kontribui ba estabilidade durante kampaña to’o eleisaun,” Pedro Belo informa.

Deklarasaun Dame ne’ebé OAM sira halo, tenke kumpri no bainhira la halo tuir sei simu konsekuénsia tuir Lei.

Jornalista: Vito Salvadór