Connect with us
Pakote Ahi

Dili

AMD ho Forsa Polísia Hasai Família Uma-kain 54 iha Taibessi

Published

on

Hatutan.com, (19 Abríl 2023), Díli– Autóridade Munisípiu Díli (AMD) ho apoiu hosi forsa Polísia Nasional Timor-Leste (PNTL) Munisípiu Díli no guarda munisipál, Kuarta (19/4/2023), hasai “obrigatóriu” família uma-kain 54 iha Merkadu Taibessi, Suku Lahane Orientál, Postu Administrativu Na’in-Feto, Munisípiu Díli.

Lee Mós : Kauza Inséndiu iha Merkadu Taibessi Tanba Haluha Dezliga Chaleira Elétrica

Família uma-kain 54 ne’e nu’udár vítima bá inséndiu ka ahi-han sira-nia hela fatin, ne’ebé mak akontese  Kinta, 22 fulan-Dezembru 2022, hale’u tuku 23:00 Otl.

Advertisement

AMD ho apoiu hosi PNTL Munisípiu Díli no guarda munisipál, Kuarta (19/4/2023), hasai “obrigatóriu” família uma-kain 54 iha Merkadu Taibessi. Foto/Elio dos Santos da Costa

Iha asaun ne’e kompañia GAERENEZ Unipessoal, L.da, ho mákina pezadu  halo eviksaun obrigatóriu, mezmu família balun buka halo intervensaun no husu atu autoridade uza sentidu umanidade hodi hasai abitante família uma-kain  54 ne’e ho dignu no tratamentu hanesan ema.

“Presiza  prepara kondisaun, tanba balu iha ne’e, komunidade mai halo tiha rasik ona sira nia uma. Entaun, nusá mak sira la tun mai halo aprosimasaun bá komunidade tanba sira-ne’e  timoroan no povu timor la’os animal,” Leopoldina Bebiana da Costa ne’ebé tenke asiste nia uma ema sobu ho ekipa pezadu hateten.

Leopoldina hateten, Kinta (22/12/2022), uainhira inséndiu ne’e mosu, parte autoridade konsege evakua vítima sira, bele hela provizóriu iha eis kuartel militár Porrugés, no iha biban ne’ebá, Prezidente Autoridade Munisípiu Dili, Guilhermina Gomes, promete bá vítima sira katak, hahú iha fulan-jeneiru to’o abríl 2023, obra ne’e tenke konklui ona, no entrega fila bá vítima sira uza.

Maibé, kompleta ona bá fulan haat (janeiru to’o abríl), autoridade seidauk realiza de’it kompromísiu ne’e.

La’os ne’e de’it, responsável sira iha eis kuartel militár Porrugés, husu atu vítima sira tenke sai ona hosi fatin ne’ebá, tanba sei hadi’a mós fatin refere, hodi utiliza bá atividade desportu nian.

Ho nune’e, vítima sira deside ida-idak fila bá hamoos sira-nia hela fatin anterior, atu bele hadi’a rasik, nune’e bele kontinua halo atividade negósiu hanesan baibain. 

Advertisement

AMD ho apoiu hosi PNTL Munisípiu Díli no guarda munisipál, Kuarta (19/4/2023), hasai “obrigatóriu” família uma-kain 54 iha Merkadu Taibessi. Foto/Elio dos Santos da Costa

Molok ne’e, hafoin insidente inséndiu, vitima sira hetan mós apoiu Solidariedade hosi Movimentu Brigada Xanana (MBX), liuhosi atribui besi (baza), kalen no semente, atu ajuda vítima sira hadi’a hikas sira-nia hela fatin, hodi kontinua hala’o atividade negósiu diária hanesan baibain.

“Antes insendiu ne’e, autoridade mai apoiu hahan de’it, durante loron-tolu. Liuhosi ida ne’e, laiha ona. Besi sira ne’e, apoiu hosi Movimentu Brigada Xanana, sira mak ho sira-nia inisiativa, sira mai halo asaun sosial, entaun, sira mai fó apoiu bá ami. Tanba sira haree bá, balu dehan harii ona, balu la harii, sira hanoin katak, mukit loos, kbi’it laiha atu harii, entaun, sira lori besi sira ne’e mai ajuda,” Leopoldina informa.

Vítima sira ne’e, hela iha área merkadu Taibessi, hahú kedan iha tinan 2004, hodi hala’o atividade negósiu ka fa’an sasán, buka osan bá sustenta moris família uma-laran nian.

Na’in bá Kompañia GAERENEZ Unipessoal, L.da, Delia Araújo de Jesus informa, iha Segunda (17/04/2023), nia parte selebra ona kontratu ho AMD, ho tipu projetu mak halo konstrusaun bá fatin ne’e ho totál sala hamutuk 54.

Hafoin selebra konatratu, parte kontratór hamutuk ho autoridade Díli halo ona mós aprosimasaun bá vítima sira, liu-liu informa no esplika kona-bá futuru konstrusaun fatin ne’e, husu komunidade uma-kain 54 atu sai hosi sira-nia hela fatin.

Tuir loloos, iha loron 17, fulan-abríl foin lalais, kompañia tenke hahú ona konstrusaun bá fatin sira ne’e. Maibé, tanba membru família sira seidauk hasai sira-nia sasán uma-laran, nune’e, ohin, ekipa tun ho material pezadu hodi hasai ‘obrigatóriu’.

Advertisement

Tipu projetu ne’e mak konstrusaun bá merkadu fa’an sasán ho kuartu ka sala hamutuk 54 bá família vítima sira. Totál orsamentu ne’ebé sei gastu bá projetu ne’e hamutuk rihun $309-resin, ho durasaun tempu fulan-haat, konklui obra.

To’o notísia ne’e publika, Hatutan.com, seidauk konfirma ho Prezidente Autoridade Munisípiu Díli, Guilhermina Gomes.

Jornalista: Rogério Pereira Cárceres

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Dili

Ramos-Horta Kestiona Prezensa Militár iha Eviksaun, Germano Dehan Presiza Seguransa Tanba Vida La Fa’an iha Loja

Published

on

Hatutan.com, (19 Abríl 2024), Díli— Prezidente Repúblika (PR), José Ramos-Horta preokupa bainhira haree iha televizaun membru FALINTIL Forsa Defeza Timor Leste (F-FDTL) mós tun bá terrenu hodi akompaña Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias ne’ebé halo eviksaun bá populasaun ne’ebé okupa rasi Estadu iha Díli.

(more…)

Kontinua Le'e

Dili

Eviksaun Forsada La Refleta iha PEDN 2011-2030

Published

on

Hatutan.com, (19 Abríl 2024), Díli – Forum ONG Timor-Leste (FONTIL)  konsidera evikasaun forsada hosi Sekretáriu Estadu Asuntu Toponímia Organizasaun Urbana (SEATOU)  bá komunidade iha Díli  laran la refleta iha planu estratéjia dezenvolvimentu nasionál (PEDN) 2011-2030.

(more…)

Kontinua Le'e

Dili

Governu ho AMD Presiza Prepara Fatin Dignu bá Komunidade Ne’ebé Hetan Eviksaun

Published

on

Hatutan.com, (18 Abríl 2024), Díli—Prezidente Repúblika (PR), José Ramos-Horta husu bá Governu no Autoridade Munisípiu Díli (AMD) atu prepara fatin dignu bá komunidade ne’ebé hetan eviksaun, nune’e bele kontiua sira nia negósiu hodi sustenta ekonomia familia no kontribui bá dezenvolvimentu nasionál.

(more…)

Kontinua Le'e
Advertisement

Trending