Hatutan.com, (27 Abríl 2023), Díli—Partidu Demokrata Cristão (PDC) promete sei hasa’e folin kafé tuir presu internasionál nian atu bele motiva agrikultór kafé serbisu makaas hasa’e kualidade kafé Timor nian.

Prezidente PDC, Francisco de Araújo. Foto/PDC.

Prezidente PDC, Francisco de Araújo hateten,  seitór ekonomia iha Timor-Leste hanesan kafé Timor Importante no durante tempu naruk nia laran empreza sira ne’ebé halo negósiu iha produsaun kafé mak termina fali folin kafé ne’ebé la tuir ona presu merkadu mundiál.

Lee Mós: PDC Kompromete Apoiu Setór Agrikultura, Peska ho Pekuária

“Tanba ne’e, bainhira PDC hetan fiar hosi povu hodi ukun, sei tau atensaun hodi hasa’e presu kafé atu bele hadi’a agrikultór kafé sira nia moris,” Francisco de Araújo hateten liu hosi kampaña ho tipu diálogu iha suku Seloi-kraik, Postu Administrativu Aileu Vila, Munisípiu Aileu, Tersa (25/04/2023).

PDC observa katak, agrikultór kafé Timor iha munisípiu Ainaro,  Aaileu no Ermera mak ninia produsaun bo’ot liu Timor. 

Maski nune’e, durante ne’e kafé ninia folin emprezáriu sira mak termina no povu agrikultór sira kontinua sai vítima tanba presu la tuir merkadu internasionál, nune’e bainhira PDC manán iha eleisaun Parlamentár tinan ne’e sei luta hodi hasa’e produsaun kafé Timor.

“Loloos ne’e povu agrikultór kafé mak tenke termina kafé nia folin tuir folin merkadu mundiál. Ita mak kuda, ita mak na’in no fó folin ba sira,” nia hateten.

PDC mós haree katak, durante ne’e produsaun kafé iha rai laran menus tebes no kafé ne’ebé Timoroan sira konsumu sei mai hosi rai liur.

PDC hakarak termina kafé nia folin no PDC iha politika atu hasa’e kafé nia folin hanesan kafé maran komunidade bele fa’an ba kilograma ida $5, kafé matak bele fa’an kilograma ida $1 nune’e bele garantia produsaun kafé ho kualidade.

Prezidénte PDC mós ko’alia kona-bá turizmu komunitáriu ne’ebé povu Aileu iha no governu abandona hela.

Turizmu komunitáriu Seloi-kraik hanesan fatin ida kapas tebes no atrativu loos maibé Governu la tau atensaun mai harii tiha fatin turizmu maibé la iha kontinuasaun atu tau matan.

“PDC iha polítika atu jere turizmu komunitáriu sira liu hosi fó bá autoridade lokál sira mak jere no tau matan hodi kontribui ba reseita doméstika,” Francisco de Araújo subliña.

Partisipasaun iha Mini kampaña ne’e militante no simpatizante PDC nian no hetan supervizaun hosi órgaun eleitorál Comissão Nasionál das Eleições (CNE),  Provedoria ba Direitu Umanu no Justisa (PDHJ), no hetan mós seguransa másimu hosi Polísia Nasionál Timor-Leste (PNTL).

Jornalista: Vito Salvadór