Hatutan.com, (04 Maiu 2023), Díli— Nasaun Filipina iha kompromissu atu fó apoiu bá Timor-Leste (TL) iha área diplomasia.

Embaixadora Estraordinária no plenipotensiária hosi nasaun Filipina iha Timor Leste (TL), Belinda Mariano Ante, aprezenta karta kredensiál bá Prezidente Repúblika (PR), José Ramos-Horta iha Palásiu Prezidensiál Bairru-Pité, Kuarta (03/05/2023). Foto/Média PR.

Asuntu ne’e fó-sai hosi Sekretáriu Jerál Ministériu Negósiu Estranjeiru no Kooperasaun (MNEK), Embaixadór Francisco Tilman Cepeda hafoin akompaña Embaixadora Estraordinária no plenipotensiária hosi nasaun Filipina iha Timor Leste (TL), Belinda Mariano Ante, aprezenta karta kredensiál bá Prezidente Repúblika (PR), José Ramos-Horta hodi hala’o missaun diplomátika iha nasaun ne’e.

Lee Mós:BREAKING NEWS: ASEAN Simu Timor-Leste Hanesan Membru Bá Dala-11

Francisco Tilman Cepeda hateten, iha enkontru bilaterál, Xefe Estadu, José Ramos-Horta ho Diplomata Filipina, Belinda Mariano Ante ne’e, diskuti seitór importante lubuk no husu tau Timor-Leste iha priordade Filipina nian.

“Embaixadora Filipina promete, Filipina sei apoiu Timor-Leste iha área diplomasia, finansas no seluk tán tanba dezde uluk Timor Leste selebra ona akordu ho Filipina iha área edukasaun no konsege haruka ona Timoroan lubuk ida ba estuda iha nasaun ne’e,” Francisco Cepeda hateten iha Palásiu Prezidensiál Bairru-Pité, Kuarta (03/05/2023).

Nia dehan, Prezidente husu bá Embaixadora foun Filipina nian atu halo esforsu tomak atu tau Timor Leste iha prioridade Filipina nian liu-liu iha capacity building, tanba haree ba lakleur tán sei tama ASEAN.

“Agora daudaun ita iha graduadu hosi Filipina barak teb-tebes ne’ebé servisu iha ministériu hotu-hotu iha Timor. Esperiénsia hatudu katak, sira iha kualidade di’ak teb-tebes iha instituisaun ne’ebé sira iha, tanba ne’e mak Prezidente husu atu nune’e Filipina bele fó nafatin importánsia ba área ida-ne’e,” Embaixadór Cepeda informa.

Diplomata Filipina ne’e sei hato’o pedidu Xefe Estadu nian ne’e ba sira-nia nasaun, nune’e bele responde ba pedidu Timor-Leste nian.

Jornalista: Vito Salvadór