Hatutan.com, (16 Maiu 2023), Díli—Partidu Libertasaun Povu Aileba (PLPA)  iha planu ida atu implementa bainhira hetan fiar hodi forma Governu da-sia, mak hanesan hatun taxa ka impostu  importasaun sasan hosi rai liur.

Programa ne’e PLPA hakarak implementa tanba haree katak, Governu atuál iha ambisaun boot atu lalais kedan hasa’e reseita doméstika liuhosi hasa’e taxa importasaun hosi 10% to’o 12%, maibé Governu mós haluha tiha katak, povu susar tebes bá osan atu iha kbiit sosa nesesidade bázika.

Lee Mós: PLPA Iha Programa Ualu

Advertisement

“Ohin loron Timor Leste monu ba krize ba buat hotu-hotu, pois iha aspetu balun governu hasa’e tasa maski  povu ninia rendimentu kiik liu kompara ho emprezáriu sira. Taxa ida ne’e oho povu kiik,” Adjuntu Sekretáriu Jerál, Paulo Adito Pereira hateten, iha ámbitu debate Partidu Polítiku sira iha salaun Mahoka, Dili, Tersa (16/05/2023).

Tuir PLPA nia haree katak, lójiku tebes kuandu Governu hasa’e taxa ba sasan eletróniku no la’ós hasa’e fali tasa bá sasan nesesidade báziku, sa tán agora daudaun kampu traballu iha rai-laran laiha, no númeru dezempregu aumenta makaas.

Tanba ne’e, PLPA mós sei kria kampu traballu uza osan Estadu bainhira hetan fiar hodi kaer Governu, kria mós kooperativa ba grupu ne’ebé mak iha atu intensiva sira nia rendimentu nune’e bele minimiza dezafiu sira ne’ebé mak agora enfrenta.

Dadus hosi Banku Mundiál nian hatudu katak, Timor-Leste hanesan nasaun ki’ak liu iha Azia, PLPA konsidera ida ne’e tanba falla hosi ukun.

Jornalista Estajiáriu: Lazaro Pereira Quefi

Advertisement