Hatutan.com, (17 Maiu 2023), Díli- Partidu União Nacional Democrátika da Resistência Timorense (UNDERTIM) promete hadi’a no kria kondisaun dignu iha merkadu sira hotu iha territóriu nasionál atu negosiante sira bele fa’an sasán nesesidade báziku sira ho dignu.

Lee Mós : Bainhira Hetan Fiar Iha Eleisaun, UNDERTIM Hakarak Dezenvolve Seitór Importante Lima

Prezidente UNDERTIM, Francisco Manubui. Foto/Elio dos Santos da Costa

Prezidente UNDERTIM, Francisco Manubui hateten, durante loron tolu nulu UNDERTIM halo kampaña eleitorál labá halo promesa iha fatin luxu, maibé hili atu halo kampaña iha merkadu hamutuk ho negosiante sira.

Bainhira UNDERTIM hetan fiar hosi povu hodi bá kaer ukun sei tau kondisaun no halo melloramentu ba infraestrutura bázika sira iha merkadu nasionál, munisipál too ba iha postu, suku no aldeia sira atu negosiante sira fa’an sira-nia produtu lokál ho dignu.

“Ami UNDERTIM sei tau prioridade bá hadi’a kondisaun sira iha merkadu, tamba merkadu mak konsentrasaun no tranzasaun ekonomia,” Prezidente UNDERTIM, Francisco Manubui hateten iha debate públiku entre partidu polítiku sira ne’ebé organiza hosi CNE iha salaun OKA, Surik Mas, Díli, Kuarta (17/05/2023).

Prezidente UNDERTIM hatutan, UNDERTIM sei halo modernizasaun bá merkadu nasionál sira atu bele akumula negosiante sira faa’n sira-nia produtu ho kualidade iha merkadu no dada vizitante sira inklui hola na’in sira bá sosa produtu komunidade sira nian iha merkadu.

UNDERTIM nia planu mak kontínua tau atensaun bá moris negosiante sira iha merkadu atu sira bele iha kbi’it ba fa’an produtu nasionál ne’ebé kualifikadu, kualidade no nutritivu ba konsumidór sira.

“Ita haree ai-leba sei la’o hale’u Díli laran, gerobak sira sei tama sai bairru tamba merkadu nasionál sira labele akumula sira no kondisaun saneamentu la di’ak, tamba ne’e, bainhira UNDERTIM ukun sei hadi’a no tau negosiante hotu ho dignu iha merkadu nasionál no munisipál,”  nia hateten.

UNDERTIM mós iha kompromisu polítiku atu tau kondisaun iha merkadu ho dignu bá ema ho defisiensia sira, atu sira mós bele iha asesibilidade bá merkadu públiku sira ho di’ak.

Jornalista: Vito Salvadór