Hatutan.com, (17 Maiu 2023), Díli-Prezidente Partidu Libertasaun Populár (PLP), Taúr Matan Ruak , atuál Primeiru-Ministru VIII Governu Konstitusionál promete bainhira manán iha Eleisaun Parlamentár, hodi bá kaer Governu, sei harii uma unidade 2000 iha Suku Hera, Postu Administrativu Kristu Rei, no ukun-na’in ka membru órgaun soberanu sira  muda bá hela iha Postu Administrativu Metinaro, Munisípiu Díli.

Lee Mós : PLP Ukun Hakarak Diversifika Ekonomia

Prezidente PLP, Taur Matan Ruak. Foto/Joaquim Coutinho

Iha ámbitu kampaña PLP nian iha Tasi-Tolu, Kuarta (17/05/2023),   Taur Matan Ruak hateten Governu ne’ebé karik PLP lidera prepara uma unidade 2000  no daudaun ne’e banku mundial, halo hela estudu bá planu ida-ne’e iha Hera.

“Populasaun sira iha Ai-tarak laran, oras ida sei muda hotu bá iha Hera. Primeiru ministru, parlamentu, membru governu sira muda hotu bá iha Metinaro,” Jenerál Reformadu ne’e haktuir.

Durante militante ho simpatizante sira-nia futar oin, Taur Matan Ruak mós promete harii mós uma unidade 4000 to’o 5000 iha Tasi-Tolu hodi oferese bá populasaun sira hela.

“Populasaun sira iha Tasi-Tolu ne’e, ita sei halo uma 4000 ka 5000 para sira hela. Fatin ida ne’e, ita tenke husik. Tanba ne’e, ita iha programa ida, projetu ida ho Pelican Paradise,” Taur promete.

Maibé, sé família sira ne’ebé mak hakarak fila bá sira-nia munisipiu oríjen, estadu ajuda nia, halo nia uma iha ne’ebá.

“Sé imi hakarak fila-fali. La gusur ida, ajuda halo uma iha nia munisípiu ka iha imi nia knua rasik para  muda bá,” Taúr Matan Ruak tenik.

Rekualifika Sídade Díli

Prezidente PLP, Taúr Matan Ruak hateten, programa mai oin, bainhira PLP manán iha eleisaun tinan ne’e, sei halo rekualifikasaun bá sídade Díli, katak sei hadi’a fila-fali imájen kapitál nasaun ne’e nian tanba durante ne’e ‘la’o sabraut loos’.

“Ha’u ko’alia fali iha ne’e bá oin, sé karik ita ukun, ita halo saida? Primeiru, ha’u hakarak, ita sira ne’e, hela hotu iha Díli, ha’u hakarak ko’alia uluk programa ida kona-bá rekualifikasaun Díli. Oinsá mak halo Díli sidade ida furak, no la’ós hanesan ida agora, fo’er, ema tuur arbiru, ita na’in de’it mós la apresia ita-nia sidade, sá tán malae sira. Entaun, iha rekualifikasaun, governu iha planu,” Taur Matan Ruak hateten tán.

Atu rekualifika kapitál Díli, tuir Taur Matan Ruak, planu primeiru ne’ebé governasaun tuir mai sei halo, lori sira iha Díli, liu-liu Universidade Nasional Nasionál Timor-Lorosa’e (UNTL) muda hotu bá iha Sidade Universitáriu iha Munisípiu Aileu.

“Aban-bainrua UNTL  laiha Díli ona, iha Aileu. Maibé, iha Aileu, nia sei iha fatin bá imi eskola. Iha fatin profesór sira hetan, hela, iha fatin para alunu sira hela. La hela iha kost (uma-aluga) hanesan agora  imi eskola. Fatin de’it, imi sees aan atu estuda laiha. Privásidade laiha, halo nusá mak imi matenek, sé imi fila-fali bá uma, laiha fatin bá imi atu estuda?,” Taur promete.

La to’o de’it iha ne’e, iha Governasaun PLP nian tuir mai, sei muda hotu universidade priváda sira bá munisípiu, tuir planu dezenvolvimentu tolu ne’ebé governu trasa.

Sidade tolu ne’ebé governu hakarak dezenvolve, ida maka, Baucau, Same ho Batugade. Iha Batugade ne’e sei sai sidade Maliana foun iha, Viqueque ho Lospalos ne’e nu’udár Munisípiu.

“PLP nia programa oinsá? Universidade privádu ne’ebé hakarak lori universidade bá fatin tolu ne’e, Baucau, Same ho Batugade, ita sei apoiu sira, sira hetan kréditu iha banku, mais jurus laiha. Sira selu fali de’it osan inan,” Taur Matan Ruak esplika.

Mais, iha kritériu ida ne’ebé universidade sira tenke kumpre, maka  Ida, sala de aula (sala bá hanorin nian), bibliotéka, laboratóriu, uma bá estudante sira hela, uma bá profesór sira hela, kompletu, sira selu fali de’it osan inan, osan funan, estadu mak selu.

Iha Eleisaun Parlamentár 2017, iha Munisípiu Díli, PLP hetan totál votu hamutuk 15,000. Iha nivel nasionál tomak ho totál votu  60,000. Votu sira ne’e, fó bá PLP, hetan kadeira 8 iha Parlamentu Nasionál (PN) períodu 2017-2022.

Jornalista: Rogério Pereira Cárceres