Hatutan.com, (14 Juñu 2023), Díli- Ospitál Nasionál Guido Valadares (HNGV) liuhosi  Banco de Sangue husu ema hotu nia konsiénsia atu apoiu ran bá maluk sira ne’ebé presiza.

Lee Mós : Governu Tau Millaun $9.3 Konstrui Edifísiu Pediatria no Unidade Kuidadu Intensivu iha HNGV

Doutora Servisu Apoiu Diagnóstiku Terapéutiku iha HNGV, Mingota da Costa Herculano. Foto/Lazaro Pereira Quefi

Liuhosi selebrasaun loron mundiál doasaun ran nian, 14 fulan-Juñu 2023,  Doutora Servisu Apoiu Diagnóstiku Terapéutiku iha HNGV,  Mingota da Costa Herculano, husu atu ema hotu iha konsiénsia ajuda malu fó ran atu bele salva maluk seluk. Basá, dadus ne’ebé iha hatudu, inan isin-rua barak partu presiza tebes ran no pasiente rihun ne’ebé hala’o tratamentu iha ospitál no sentru saúde sira presiza ran bá sira-nia tratamentu saúde.

“Ita fó apoiu ran bá maluk sira ne’ebé presiza iha benefísiu boot bá salva sira-nia vida,” Mingota da Costa Herculano hateten.

Nia dehan, asidente barak mak akontese halo sira ran fakar barak no sira presiza tebes ran. Nune’e mós inan isin-rua sira mai partu iha ospitál presiza ran tanba sira-nia ran menus. Ho nune’e, presiza tebes ema hotu nia tulun atu bele kontribui ran iha Banco de Sangue HNGV nian.  

Selebrasaun loron mundiál doasaun ran tinan ida ne’e ho tema sentrál, “Ami moris tanba ita-boot mak fó, fó ita-boot nia ran.” Tanba ne’e, agradese tebes ho voluntáriu no família  sira ne’ebé mak durante ne’e fó ran bá sira.

Durante semana ida ne’e bá oin, bancu de sangue kontinua nafatin hein maluk sira atu mai fó ran  no instituisaun balu ne’ebé mak bolu ona grupu banku de sangue atu bele bá fó ran iha instituisaun sira tamba haree katak stoke ran ne’ebé mak la tuir ho nesesidade bá pasiente sira.

“Ita mós hakarak atu garante stoke ran maibé ran ne’e ita labele hola, ran ne’e ita labele foti husi fatin seluk, ran ne’e so ita hetan husi ita nia maluk sira ne’ebé mak fó ran. Tamba ran ne’ebé mak ita fó bá pasiente so ita ran na’in mak bele fó” Mingota da Costa Herculano haktuir.

Iha Timor-Leste prevalese katak ran O+ mak barak liu no ran O- nu’udár doasaun  universal nia bele fó ba husi tipu A, B no O bá pozitivu ho negativu nia bele fó hotu. Ran tipu A no B nia hanesan simu ne’ebé mak universal. Maibé dezafiu ne’ebé mak hasoru katak stoke la tuir nesesidade, Banku de Sangue nu’udar departamentu ida husi HNGV nian no nia tenke responde bá nesesidade nasaun nian katak Banco de Sangue  la’ós responde de’it ba nesesidade hospital ninian maibé responde ba ospitál rejionál sira no mós ba ospitál privadu sira ne’ebé mak presiza ran.

Jornalista Estajiáriu : Lazaro Pereira Quefi