Hatutan.com, (29 Juñu 2023), Díli—Primeiru-Ministru indijitadu, Kay Rala Xanana Gusmão afirma, kritériu hili membru governu ba IX Governu Konstitusional maka atu servi ho responsabilidade, la’ós atu fahe poder politiku ba malu ka fahe kadeira.

Primeiru Ministru Indijitadu, Kay Rala Xanana Gusmão akompaña hosi Prezdente PD, Mariano Assanami Sabino ba hasoru malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kinta (29/06/2023).

“Kritériu ne’ebé ami lori atu hili, primeiru nesésidade atu halo saida, segundu esperénsia ruma, terseiru ema ne’ebé ita bele fiar katak ita fó tiha servisu halo, tanba loron ida iha Salaun Oka ha’u dehan ami iha komprimisiu atu serví, la’ós atu ba sai ministru, sai ida ne’e no sai ida ne’eba, la hatene servisu ema seluk bele tama. Tanba prinsipiu partidu rua ne’e ba governu maka atu servi. Segundu ema sira ne’ebé tau bá ne’ebá ne’e tenke halo buat ruma,” Kay Rala Xanana Gusmão hateten hafoin enkontru ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kinta (29/06/2023).

Lee Mós: Ini Alasan CNRT Calonkan Maria Fernanda Lay Jadi Ketua Parlemen Timor Leste

Kay Rala Xanana Gusmão hateten, Prezidente Repúblika bolu Primeiru Ministru indijitadu, atu konfirama katak, PD iha kooperasaun di’ak, iha entedimentu di’ak ho CNRT hodi halo aliansa ida ka koligasaun ida ba IX governu konstituisional.

Sei iha buat barak ne’ebé tenke halo, atu ukun an, ne’e bele hetan iha sentidu loloos, sentidu kona-ba dezenvolvimentu sustentável no dezenvolvimentu ne’e mak bele kria kondisaun ba povu bele moris di’ak, tanba durante ne’e ukun laiha sentidu loos.

Xanana Gusmão hatutan maske Durante kampaña partidu CNRT iha movimentu lubuk ida no ema indepedente barak ne’ebé fó apoiu ba partidu, maibé laiha persepsaun ruma hosi movimentu no ema indepedente sira ne’e, tanba sira mai ho hakarak atu iha mudansa, no haree dezenvolvimentu ba oin.  

Kona-bá movimentu no apoiu ne’ebé iha, kontente no sei la haluha sira no apresia tebes ba sira nia servisu tanba hamutuk apoiu ba mudansa, la’ós mai atu hetan pozisaun ruma no agora hotu-hotu komprende katak hamutuk atu kontribui ba dezenvolvimentu nasionál.

“Ha’u presija tebes ekipa ida forte, iha tinan lima mai ne’e hotu-hotu hatene no sei akompaña saida mak ami sei halo,” Xanana Gusmão subliña.

Kona-ba programa prióridade sira ba iha governu da-sia nian, sei diskute namanas no orgánika governasaun nian mós hahú iha diskusaun di’ak no hafoin tomada de posse, membru governu hotu sei iha tempu natoon atu diskute no lori ba PN atu debate, aprova no promulga hosi Prezidente Repúblika hodi hakat ba ezekusaun.

Jornalista: Vito Salvadór