Hatutan.com, (03 Jullu 2023), Díli—Parlamentu Nasionál (PN), liuhosi reuniaun Plenária ordinária iha Segunda 3 Jullu, halo ona diskusaun no votasaun bá Projetu Deliberasaun númeru 03/VI, kona-bá Konstituisaun Komisaun Espesializada Permanente sira iha VI Lejislatura nian.

“Liuhosi diskusaun naruk kona-bá área temátiku liga bá kompeténsia komisaun sira nian ho ministériu sira iha Governu IX nian, ikus mai aprova ho votus a-favór 61, kontra 0 no abstensaun 0,” Hatutan.com sita komunikadu, Segunda (03/07/2023).

Lee Mós: Deputada Maria Fernanda Lay Eleita Nu’udár Prezidente PN Períudu 2023-2028

Númeru Komisaun Espesializada Permanente bá lejislatura ida-ne’e kontinua mantéin ho hitu (7) mak hanesan;

1. Komisaun A, trata asuntu Konstitusionais no Justisa, ho nia membru Deputadu na’in 7.
2. Komisaun B, trata asuntu Negósiu Estranjeiru, Defeza no Seguransa, ho nia membru Deputadu hamutuk na’in 11.
3. Komisaun C trata asuntu Finansas Públika, ho nia membru hamutuk Deputadu na’in 10.
4. Komisaun D, trata asuntu Ekonomia no Dezenvolvimentu, ho nia membru Deputadu hamutuk na’in 11.
5. Komisaun E trata asuntu Infraestrutura, ho nia membru Deputadu hamutuk na’in 9.
6. Komisaun F trata asuntu Saúde, Seguransa Sosiál no Igualdade Jeneru, ho nia membru Deputadu hamutuk na’in 9.
7. Komisaun G trata asuntu Edukasaun, Juventude, Kultura no Sidadania, ho nia membru Deputadu na’in 7.

Sesaun plenária ne’e mós halo aprovasaun bá Projetu Deliberasaun númeru 4/VI, kona-bá Konstituisaun Komisaun Permanente, ho votus  a-favór 45, kontra 2, no abstensaun 14.

Reuniaun plenária ne’e prezíde hosi Prezidente Parlamentu Nasionál (PPN), Maria Fernanda Lay, akompaña hosi membru Meza sira.

Jornalista: Rogério Pereira Cárceres