Hatutan.com, (06 Jullu 2023), Díli- Timoroan sira iha Reinu Unidu ho Norte Irlanda husu bá Estadu Timor-Leste atu estabelese sekretariadu servisu notariadu permanente ida iha Reinu Unidu.

Lee Mós : Prezidente Repúblika Husu Embaixadór Foun Tau Atensaun Bá Timor Oan Sira iha Reinu Unidu

Timoroan besik 30,000 ne’ebé namkari iha Reinu Unidu  ho Norte Irlanda nia pedidu ne’e kanaliza ona hosi embaixador Timor-Leste bá Reinu Unidu, João Paulo Rangel bá Xefe Estadu RDTL bainhira hasoru malu iha Palásiu Prezidensiál, Díli, Kinta (06/07/2023).   

Embaixador Timor-Leste bá Reinu Unidu, João Paulo Rangel. Foto/Elio dos Santos da Costa

Timoroan  sira iha Reinu Unidu husu mós bá Estadu no Governu Timor-Leste atu loke konsuladu iha Norte Irlanda hodi fó servisu konsolares bá Timoroan sira.

Dadus hosi embaixada Timor-Leste nian iha Reinu Unidu hatudu katak Timoroan ne’ebé hela no servisu iha Reinu Unidu no Norte Irlanda besik 30,000  dezde tinan 2003 to’o 2020 remesa ne’ebé Timoroan sira haruka mai Timor-Leste sa’e hosi millaun US$34 to’o millaun US$150 no iha 2021 sa’e to’o millaun $170 no tuir kalkulasaun ne’ebé iha to’o tinan ne’e bele atinje millaun US$200.

“Maluk Timoroan sira husu atu Estadu bele kria kondisaun ida ne’ebé di’ak bainhira Timoroan sira ba trata sira nia dokumentu, bele iha fatin ne’ebé di’ak, bele hein, bele tuur hodi trata. Labele tuur iha estrada iha malirin no udan nia laran. Husu mós atu loke konsuladu iha Norte Irlanda hodi fó servisu konsolares ne’ebé estadu loke iha ne’eba hodi tau matan ba Timoroan sira,” Embaixadór João Paulo Rangel hateten.

Timoroan sira iha Reinu Unidu no Norte  Irlanda hatene ho di’ak tebes katak, Estadu ho Governu foun ne’e  iha prioridade barak loos atu hadi’a ekonomia nasaun no povu nia ekonomia, maibé espera bele iha netik espasu leet atu harii sekretariadu notariadu permanente iha Reinu Unidu.

Prezidente Repúblika, José Ramos-Horta,  hato’o nia kompromisu ho mós hakarak duni hodi apoiu maka’as no asegura katak pedidu Timoroan sira iha Reinu Unidu ho Norte Irlanda bele hetan resposta iha tempu badak.

“Prezidente Repúblika José Ramos Horta apoiu tebes pedidu hirak ne’e no admira tebes komunidade Timoroan sira ne’ebé servisu no hela iha Reinu Unidu, tanba sira promove tebes, kontribui tebes ho hamorin tebes Timor-Leste nia naran iha Reinu Unidu,” embaixador João Paulo Rangel haktuir Xefe Estadu nia opiniaun.

Xefe Komunidade Timoroan iha Irlandia do Norte, Celso Oliveira hateten buat saida mak embaixadór hatete ne’e loos, no ida ne’e mak ezijensia ne’ebé komunidade Timoroan sira iha ne’eba presija.

“Komunidade Timoroan iha Reinu Unidu no Norte  Irlanda nia nesésidade ne’ebé urjentemente mak husu atu estadu tau servisu notariadu ida, atu bele halo servisu lalais ba maluk Timoroan sira ne’ebé sira nia dokumentu kado-kado,” Celso Oliveira tenik.

Jornalista: Vito Salvadór