Hatutan.com, (07 Jullu 2023), Ainaro—Udan makaas ne’ebé akontese iha loron 03 to’o 05 fulan Jullu tinan ne’e, estraga uma hamutuk 30 iha Aldeia Airaca-Lau suku Ai-Tutu, postu administrativu Maubisse, munisípiu Ainaro.

Udan makaas ne’ebé akontese iha loron 03 to’o 05 fulan Jullu tinan ne’e, estraga uma hamutuk 30 iha Aldeia Airaca-Lau suku Ai-Tutu, postu administrativu Maubisse, munisípiu Ainaro. Hatutan.com halo kobertura iha Sesta (07/07/2023). Foto/Elio dos Santos da Costa.

Xefe Suku Ai-Tutu, António Mendonça Pacheco ba Hatutan.com iha Mota Erbiur, Sesta (07/07/2023), hateten, udan ho intensidade boot rezulta mota boot tun hodi sobu ponte Erbiur no rai halai taka estrada no bee sulin tuir estrada hodi tama ba uma komunidade nian ne’ebé besik estrada hetan estragus.

Lee Mós: Rai Monu Taka Totál Estrada Ligasaun Díli Bá Manufahi no Ainaro

Hafoin inundasaun, hanesan autoridade lokál fó ona orientasaun ba Xefe aldeia Airaca-Lau atu halo identifikasaun ba uma komunidade nian ne’ebé hetan estragus hodi bele iha dadus konkretu, nune’e bele aprezenta ba Ministériu relevante sira hodi hetan apoiu emerjénsia no tulun ruma tuir kondisaun ne’ebé iha.

“Ami foti ona dadus no aprezenta ona ba autoridade Postu Administrativu no uma ne’ebé rejista ona hamutuk 30, ita sei nafatin halo identifikasaun,” António Mendonça Pacheco hateten.

Kona-bá Suku Ai-Tutu, autoridade lokál hamutuk ho Governu lokál no Cruz Vermelha Timor-Leste (CVTL) sei kontinua halo identifikasaun ba iha aldeia hamutuk sia mak hanesan Aldeia Aihou, Airaca-Lau, Betulala, Goulolo, Hatubuti, Lebututu, Lientutu, Mau-Lefo no Russulau atu bele hatene komunidade uma ka’in hira mak afeitadu, nune’e dadus ba governu bele loloos no akuradu.

Udan makaas ne’ebé akontese iha loron 03 to’o 05 fulan Jullu tinan ne’e, estraga uma hamutuk 30 iha Aldeia Airaca-Lau suku Ai-Tutu, postu administrativu Maubisse, munisípiu Ainaro. Hatutan.com halo kobertura iha Sesta (07/07/2023). Foto/Elio dos Santos da Costa.

Komunidade afeitadu, José Pereira haktuir, durante udan bo’ot hahú hosi loron to’o fali kalan  no iha loron 04 fullan jullu kalan mais ou menus iha tuku 12 otl, mak bee tama no sasan uma laran laiha ida mak salva, úniku dokumentu importante ne’ebé rai iha fatin aas mak salva netik.

“Iha kalan bo’ot ami rona rai tarutu no fanun labarik sira atu sai ba liur maibé hakat la di’ak tanba bee, fatuk no rai mak nakonu ona iha uma laran, odamatan uma kotuk ho oin metin hotu, atu sai la di’ak no ami sai de’it hosi janela,” José Pereira esplika.

Xefe aldeia Airaca-Lau, Domingos da Silva Pacheco hateten, la’ós  ne’e de’it maibé udan boot ne’e halo rai halai no estraga besi rin eletrisidade hamutuk 11, estraga mós kanalizasaun bee-moos ba komunidade inklui ho plantasaun hanesan kafé, koto no modo inklui ai-han sira seluk ne’ebé komunidade sira iha.

“Hanesan autoridade lokál husu bá Governu sentrál presiza tau-matan ba situasaun ne’ebé komunidade hasoru. Ami husu apoiu umanitáriu bá família afetadu sira. Oras ne’e daudaun kompañia sira inklui IGE iha ona terrenu hodi normaliza lalais estrada no hadi’a hikas liña eletrisidade ne’ebé aat atu komunidade sira asesu hikas ba eletrisidade, inklui hadi’a hikas kanalizasaun bee-moos,” Domingos da Silva Pacheco hateten.

Komunidade afetadu ba dezastre naturais iha aldeia Airaca-Lau, oras-ne’e autoridade lokál sira lori sai ona ba fatin seguru no maioria sira hili ba hela ho familia sira seluk ne’ebé kondisaun uma seguru hela.

Tuir dadus ne’ebé iha, aldeia Airaca-Lau iha uma-ka’in hamutuk 450 ho populasaun kuaze 2.000.

Jornalista: Vito Salvadór