Hatutan.com, (11 Jullu 2023), Díli- Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” sei koordena ho Conselho Administrasaun do Fundo Infraestrutura (CAFI) hodi tau atensaun no halais prosesu konstrusaun  Memoriál Masakre Santa Krúz ne’ebé lao atrazu.

Lee Mós : Deskonfia, Korrupsaun iha Projetu Konstrusaun Memórial Masakre Santa Krús

Iha Tersa,  13 Juñu 2023, Comissão Anti Corrupção (CAC) liuhosi ekipa Espesialista Anti Korrupsaun nia enjeñeiru na’in-rua bá hala’o inspesaun terrenu bá projetu konstrusaun Memoriál Masakre Santa Krúz iha Semitériu Santa Krús, Dili.

Projetu konstrusaun Memoriál Masakre Santa Kruz ne’e ezekuta hosi empreza nasionál Bobolait, Lda,  ho  nia valor projetu  millaun $1,385.

Projetu Konstrusaun Moemoriál Masakre Santa Krús.Foto/Elio dos Santos da Costa

Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” ba jornalista sira iha salaun três de marsu Maubai, Conselho das Combatentes da Libertação Nasionál (CCLN), Comoro, Tersa (11/07/2023) hateten, prosesu konstrusaun monumentu memoriál Masakre Santa Krúz nia prosesu lao iha fundu infraestrutura no la lao iha Ministériu Veteranu.

Nia afirma MAKLN apenas sai na’in deit, maibé prosesu hotu-hotu ne’e lao tuir lei no iha fundu infraestrutura ne’eba.

“MAKLN ne’e apenas sai nain deit, maibé nia definisaun no implementasaun ne’e sai iha fundu infraestrutura no nia orsamentu ne’e la fó dalan bá Ministériu ka membru  Governu ida mak atu assina direitamente,” Gil “Oan Soru” esplika.

Nia tenik, MAKLN bele hatene prosesu hotu-hotu,  maibé MAKLN labele halo desizaun mesak, tamba tenke liuhosi CAFI, atividade hotu-hotu no orsamentu ne’ebé ho montante boot ne’e la liu husi Ministériu no ne’e iha fundu infraestrutura.

Nia deklara parte MAKLN sei halo koordenadenasaun ho CAFI atu tau atensaun ba projetu konstrusaun Memorial Masacre Santa Cruz atu empreza konstrutor bele finaliza obra refere.

“Fundu infraestrutura ami bele fó opiniaun, maibé desizaun iha sira, tamba ne’e ami sei koordena atu bele haree projetu konstrusaun Memoriál Masakre Santa Krúz,” Nia subliña.

Jornalista: Vito Salvadór