Hatutan.com, (28 Jullu 2023), Díli—Prezidente Repúblika (PR), José Ramos-Horta promulga ona Dekretu-Lei n.º 46/2023, loron 27 fulan Jullu ne’ebé aprova Orgánika IX  Governu Konstitusionál.

“Estrutura orgánika IX  Governu Konstitusionál, define atribuisaun hosi Ministériu idaidak no atribui kompeténsia ba membru Governu sira, tuir prioridade sira ne’ebé define ona iha nia Programa,” Hatutan.com sita komunikadu ne’ebé publika iha Sesta (28/07/2023).

Lee Mós: Konsellu Ministru Aprova Estrutura Orgánika IX Governu Konstitusionál

IX  Governu Konstitusionál simu posse iha loron 01 fulan-jullu tinan 2023, hodi durante tinan lima, retoma dalan ba dezenvolvimentu sosiál no ekonómiku.

Programa Governu ne’ebé hetan apoiu unánime iha Parlamentu Nasionál (PN), hanesan instrumentu polítiku ne’ebé orienta Governu iha tinan lima nia laran, hodi retoma roteiru ne’ebé Timor-Leste define ona hodi kumpre “Ajenda 2030 ba Dezenvolvimentu Sustentável hosi Organizasaun Nasoens Unidas” no Planu Estratéjiku ba Dezenvolvimentu (2011-2030), ho objetivu hodi alkansa progresu sira konkretu bá dezenvolvimentu sustentável no dezenvolvimentu sosiál efetivu.

Entre prioridade sira ne’ebé IX  Governu Konstitusionál estabelese ona, enfatiza diversifikasaun ekonómika no kriasaun empregu ho destake ba área agrikultura, peska, pekuária, turizmu no estabelesimentu indústria ki’ik no média, hodi hamenus dependénsia ba importasaun no promove dezenvolvimentu auto-sustentável.

Governu sei investe ho efisiente no efikás, iha área fundamentál tolu-kapital sosiál, dezenvolvimentu infraestrutura no dezenvolvimentu ekonómiku-alisersada iha  kompeténsia, profisionalizmu, onestidade no transparénsia.

Estrutura IX  Governu Konstitusionál hakarak destaka servisu báziku ba populasaun, liuliu iha saúde no edukasaun, no mós hametin metodolojia no operasionalidade administrasaun no jestaun no mós, implementasaun ba Planu Estratéjiku ba Dezenvolvimentu.

Jornalista: Vito Salvadór