Hatutan.com, (12 Agostu 2023), Manatuto-Kuda, balada  ka animal ne’ebé importante mós iha ema nia moris, hanesan mós asu. Iha marsa FALINTIL hosi Krarás, Viqueque mai to’o Kairui, Laleia, Manatuto, komunidade Suku Kairui oferese kuda 12 bá membru F-FDTL hamutuk 158 hodi ajuda transporta lojístika no  hahán militár nian iha área foho Tula-Olo, Baucau.

Lee Mós : F-FDTL Konklui Marsa FALINTIL hosi Krarás to’o Kairui

F-FDTL utiliza kuda hodi transporta lojitika iha marsa FALINTIL. Foto/Rogério Pereira Cárceres

“Aproveita oportunidade ida ne’e, informa bá sua-exelénsia sira, sobre apoiu lojistika ne’ebé ita susar loos iha atividade marsa FALINTIL ninian. Tanba ida ne’e maka, ami koordena ho populasaun sira iha Suku Kairui hodi apoiu kuda 12, hodi bele avakua ka lalin sasán sira ne’e, reabestamentu, iha fatin Tula-Holi, tanba karreta labele tama. Ida ne’e maka, ami iha kooperasaun di’ak ho parte autoridade komuintáriu iha Kairui,” Tenente Koronel Henrique Piedade da Costa “Fitun”, hateten iha seremónia enseramentu Marsa FALINTIL nian iha Eskola Bázika Sentrál Horta Kairui, Suku Kairui, Postu  Administrativu Laleia, Munisípiu Manatuto, Sesta (11/08/2023).

Xefe Suku Kairui, Roberto Ximenes konfirma  loloos duni, komunidade  sira apoiu kuda 12, tula hahán hosi Aldeia Manlihilai lori naha ka hahan tama to’o iha Tula-Oli, tanba iha área sira ne’ebá nian, estrada laiha, tán ne’e, dífísil tebes atu karreta ho motór sira tama to’o iha área ne’ebá.

Iha istória gerrilla FALINTIL nian, fatin ida naran  Tula-Oli sai hanesan fatin konsentrasaun membru FALINTIL sira hosi Rejiaun ida, rua tolu ho rejiaun haat.

“Uluk, kuandu lori hahan bá ai-laran ka lojístika sira bá suporta FALINTIL sira ne’e, balu uza kuda, balu hasán de’it,”  Xefe Suku Roberto haktuir.

Xefe Suku Roberto, informalmente, koalia ona mós Komandante Servisu Nasionál bá Intelihénsia nian (SNI), Koronel Domingos da Câmara ‘Amico’ , husu katak, bele karik, selebrasaun aniversáriu ezosténsia FALINTIL nian iha tinan oin, tenke halo abertura marsa FALINTIL iha Kairui.

Nia mós husu atu la’o karik, bele to’o Postu Administrativu Soibada no Natarbora tanba uluk ne’e, ida ne’e fatin bá konsentrasaun nian. Mas buat hotu atu halo konsentrasaun ne’e nia oda-matan mak iha Kairui.

Iha tempu UNTAET nian, FALINTIL sira ne’e, tenke lori hotu mai villa. Nune’e, sira balu hela iha Kairui, balu konsege liubá Aileu. Sira balu ne’ebé iha Kairui, komunidade sira organiza para bele tuir votasaun, iha loron Konsulta Populár, 30 Agostu 1999.

Membru F-FDTL sira halo marsa FALINTIL ho komemora loron FALINTIL bá da-48, 20 Agostu 1975-20 Agostu 2023. Foto/Rogério Pereira Cárceres

Komunidade sira  entuziazmu haree membru F-FDTL sira halo  marsa FALINTIL liuhosi sira-nia uma-tatiis no fó lembra fali bá sira kona-ba tempu sira susar nian sira kolabora ho FALINTIL hodi reziste funu to’o Timor restaura nia ukun rasik an iha 20 Maiu 2002.

“Kairui ne’e maioria Veteranus. Ne’ebé, ha’u husu maka forsa foun sira ne’e, tenke la’o nafatin. La’o nafatin to’o eskola-eskola sira ne’e, bele hatene katak, FALINTIL mak ida ne’e,” Roberto Ximenes  nu’udár membru FALINTIL  ne’e haktuir.

Roberto Ximenes dehan, tuir loloos, komisaun organizadóra bá Marsa FALINTIL nian, tenke fó mós konvite bá Eis Jenerál Taur Matan Ruak, inklui Adjuntu Limtim, ho sira seluk tán, tanba uluk sei funu, ninia subar fatin ida mós maka Kairui.

“Ha’u mak organiza sira, sira bele ajuda karau haat (4) hodi halo seremónia enserramentu marsa FALINTIL iha Suku Kairui. Agora, sira FALINTIL, mai sosa karau ida de’it. La to’o. komunidade sira ne’e, ajuda tán karau haat. Hamutuk karau lima,” Xefe Suku Roberto hateten.

Portavós Komandu FALINTIL F-FDTL no Prezidente Komisaun Organizadóra bá Komemorasaun bá Aniversáriu FALINTIL, dala-48, Capitão Mar e Guerra João da Silva, agradese bá komunidade sira iha Kairui tanba ho voluntáriu, bele apoiu ona kuda, tula hahan bá membru F-FDTL sira iha Tula-Oli, hodi liu mai Kairui.

Tratamentu Saúde

Iha seremónia enseramentu bá atividade marsa FALINTIL nian ne’e, F-FDTL liuhosi komisaun organizadóra, hetan apoiu hosi médiku Saúde Munisípiu Baucau, hala’o tratamentu Saúde bá komunidade sira iha Kairui. La’os ne’e de’it, atividade apoiu saúde ne’e, Saúde Munisipiu Viqueque, hala’o mós bá komunidade sira iha Krarás, Suku Bibileo.

Atividade marsa FALINTIL hala’o mós tratamentu saúde bá komunidade Suku Kairui, Postu Administrativu Laleia, Munisípiu Manatuto. Foto/Rogério Pereira Cárceres

“Hosi komisaun organizadóra, hakarak agradese mós bá poiu saúde, liu-liu médiku sira hosi Saúde Munisípiu Baicau, ne’ebé mak bele apoiu ona, mai halo tratamentu bá komunidade sira, liu-liu iha áreas rurál, sira ne’ebé mak presiza tratamentu saúde,” Capitão Mar e Guerra João da Silva, haktuir.

Capitão Mar e Guerra João da Silva, afirma, uainhira iha tempu sertu ruma, F-FDTL ninia misaun ida mós maka hala’o atividade apoiu sosial bá komunidade sira, no ne’e misaun ida hosi forsas armadas.

Tuir ajenda hosi komandu F-FDTL, liuhosi komisaun organizadóra bá selebrasaun aniversáriu ezisténsia FALINTIL, bá dala-48, iha loron 20 fulan-Agostu 2023, sei hala’o seremónia iha área Odelgomo, Suku Aiasa, Munisípiu Bobonaro, nune’e mós iha Suku Atelari, Postu Administrativu Laga, Munisípiu Baucau.

Jornalista: Rogério Pereira Cárceres