Hatutan.com, (12 Agostu 2023), Manatuto-Abitante  2,308  ne’ebé horik iha Suku Kairui, Postu Administrativu Laleia, Munisípiu Manatuto,  presiza tebes Governu nia-tulun atu bele hadi’a kondisaun estrada ne’ebé liga hosi Laleia Villa bá Kairui.

Atividade merkadu iha Suku Kairui, Postu Administrativu Laleia, Munisípiu Manatuto. Foto/Rogério Pereira Cárceres

Abitante sira horik iha fatin ne’ebá mós husu Governu atu bele fó atensaun bá operadór telekomunikasaun  tolu; Timor Telecom, Telkomcel, ho Telemor  atu bele instala rede telekomunikasaun ba sira-nia suku tanba durante ne’e rede telekomunikasaun difikulta tebes sira atu halo komunikasaun bá família sira iha territóriu nasionál.

Suku Kairui (iha lian Portugés Cairui), suku ida-iha Timor Leste ho nia aleida hitu (7) mak hanesan Aldeia Rai-Mean, Rai-Bu, Corohaco, Watu-Sili, Bia-Ba’e, Wai-Nunu, Hatu Karau.  Suku ne’e ho total uma-kain 779 no abitante hamutuk 2,308.

“Problema sosial iha Kairui, estrada, no mós liña telekomunikasaun. Ita-boot sira haree katak, iha ne’e só iha rede telekomunikasaun rua de’it mak  Telkomcel ho Telemor.  Timor Telecom, laiha total,” Xefe Suku Kairui, Roberto Ximenes informa bá jornalista sira iha Sede Suku Kairui, Sesta (11/08/2023).

Komunidade Suku Kairui. Foto/Rogério Pereira Cárceres

Xefe Suku Roberto Ximenes informa, to’o oras ne’e estrada hosi Laleia Villa liga mai Kairui nia  kondisaun aat, Governu seidauk tau atensaun atu hadi’a.

Dezafiu sira ne’ebé durante ne’e enfrenta iha Suku laran, problema ida maka, suku ne’e, laiha orsamentu atu jere rasik bá dezenvolvimentu suku.

“Ami nia sede suku rasik de’it mosh au husu ajuda fali bá ONG mak ajuda konstrui. Orsamentu própriu bá hadi’a sede suku laiha,” Xefe Suku Roberto Ximenes hateten.

Jornalista: Rogério Pereira Cárceres