Hatutan.com, (27 Outubru 2023), Manatuto—Governu no povu Japaun apoia orsamentu ho montante millaun $8 hodi ajuda Estadu no povu  Timor-Leste reabilita irrigasaun Lubuto, Postu Administrativu Laleia, Munisípiu Manatuto.

Lee Mós: Empréstimu Millaun $121 ba Fornesimentu Bee Moos iha Díli Sei Implementa iha Outubru

Irrigasaun Lubuto, Postu Administrativu Laleia, Munisípiu Manatuto. Foto/Tome da Silva

Tuir kuadru avizu projetu reabilitasaun  irrigasaun ne’e nia períodu kontratu hahú iha loron 1 fulan-Fevereiru 2023 sei konklui iha loron 31 fulan-Agostu 2024. Projetu ne’e konstrui husi empreza kontraktór Tobishima Corporation, no supervizaun hodi empreza konsultóriu joint venture  IDEA Consultants, Inc, Sanyu Consultants, Inc, INGEROSEC Corporation no NTC International Co., Lda.

Liuhosi serimónia inaugurasaun bá irrigasaun ne’e, Ministru Obras Públika (MOP), Samuel Marçal hato’o agradesimentu ida kle’an Governu Japaun ne’ebé kontínua apoiu Timor-Leste iha área infraestrutura sira, liu-liu iha irrigasaun no kapasitasaun rekursu umanu.

“Ita agradese bá Governu Japaun la’ós mai ajuda irrigasaun iha ne’e de’it, maibé ajuda irrigasaun iha fatin barak, ajuda mós iha bee-moos, ajuda ekipamentu no mós parte oi-oin, kapasitasaun rekursu umanu, formasaun tanba hadomi duni povu Timor, hahú kedan Timor ukun aan to’o agora,” Ministru Samuel Marçal hateten.

Irrigasaun Lubuto hetan estragu total iha tempu kalamidade no inundasaun iha loron 04 fulan-Abríl 2021.  Nune’e, tuir Ministru Samuel Marçal, apoiu hosi povu no Governu Japaun liuhosi sira-nia ajénsia JICA hodi halo reabilitasaun bá irrigasaun ne’e bele ajuda fasilita komunidade agrikultór sira atu hasa’e tan kuantidade produsaun produtu lokál no ajuda ona Estadu Timor-Leste iha polítika soberania ai-han.

“Ita bele hadia’ak fali ita nia irigasaun ida-ne’e, ita espera katak ho irrigasaun ida-ne’e bele aumenta tan produsaun lokál, politíka Governu nian hahú oinsa para hamenus inportasaun mai hosi li’ur, ita hotu hatene agora foos folin karun, la’ós iha Timor de’it, maibé tanba funu iha nasaun boot sira, entaun sasan folin sa’e hotu.  Irrigasaun ida-ne’e la’ós de’it para kuda hare, maibé bele kuda formungu, kuda batar para povu labele hamlaha,” Samuel Marçal hateten.

Embaixadór Japaun iha Timor-Leste, Kimura Tetsuya, iha nia deskursu hateten, iha loron 4 fulan -bríl 2021, Timor-Leste enfrenta dezastre naturál hodi lori estragu bá fasilidade públiku no abitante sira-nia horik fatin to’o balun tenke lakon vida.

Nia hateten, fasilidade infraestrutura hanesan irrigasaun sira iha Manatuto no fatin hotu-hotu kuaze naksobu, nune’e difikulta tebe-tebes sgrikultór sira atu halo natar no atividade seluk, tanba ne’e maka Governu Japaun liuhosi JICA apoiu nafatin Governu Timor-Leste hodi halo reabilitasaun urjente bá irigasaun hirak ne’e.

Irrigasaun Lubuto, Postu Administrativu Laleia, Munisípiu Manatuto. Foto/Tome da Silva

“Timor-Leste sofre ona dezastres naturál boot hanesan inundasaun no rai-halai iha pasadu, inundasaun histórika nian halakon vida hosi ema barak nian, no estraga ona infraestrutura importante iha fatin barak iha país ida-ne’e. Responde bá pedidu urjente hosi Governu Timor-Leste, espesialista sira hosi Japaun, parseria ho sira-nia omólogu iha Timor-Leste, no Governu Japaun realiza ona servisu reabilitasaun liuhosi JICA. Obra hirak ne’e inklui reabilitasaun bá mota-ibun, sistema abastesimentu bee-moos, no sistema irrigasaun,” Embaixadór Kimura Tetsuya hateten.

Prezidente JICA Timor-Leste, Tanaka Akihiko,  afirma JICA nafatin apoia Governu Timor-Leste iha área infraestrutura sira, nune’e bele tulun povu agrikultura sira, tanba povu agrikultór sira presija dunik tulun husi Governu.

“Ami kompromete ona atu kontínua suporta Governu Timor-Leste, liuhosi hasae kualidade infraestrutura báziku esensiál iha Timor laran tomak, no ami espera katak projetu ne’e sei fo impaktu positivu bá komunidade sira nia moris no kontribui bá dezenvolvimentu nasaun ida forti liu,” Tanaka Akihiko subliña. 

Akihiko Tanaka hateten, obra bá reabilitasaun irrigasaun Buluto hola parte mós iha JICA nia suporta seluk hanesan reabilitasaun bá mota-ibun Comoro, Díli, sistema abastesimentu bee-moosvno sistema irrigasaun Maliana ho montante orsamentu billaun 1 yen ka miliaun $7,5.

Jornalista: Tome da Silva