Hatutan.com, (15 Agostu 2023), Díli—Prosesu akizasaun ba kaderneta pasaporte remata ona, oras-ne’e daudaun kompañia manán-na’in iha Finlándia halo hela imprime no iha ona serteza katak, fulan Setembru nia rohan 16.000 kaderneta to’o Timor-Leste.

Ministru Justisa, Amândio de Sá Benevides informa ona novidade ne’e bá Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Tersa (15/08/2023).

Lee Mós: Ministru Justisa Semo bá Finlándia Hodi Halo Aprovasaun Finál bá Kaderneta Pasaporte

“Ha’u mai informa kona-bá passaporte, tanba Xefe Estadu mós preokupa tebes ho situasaun ne’ebé afeita tebes nesesidade komunidade nian kona-bá atu halo viajen bá rai li’ur. Tanba ne’e mak ami informa situasaun ikus katak foin daudaun ha’u ho ekipa dezloka ba Finlándia atu halo aprovasaun finál no aseitasaun ba produsaun,” Amândio de Sá Benevides, hateten hafoin enkontru.

Tuir tarjetu Governu nian katak, sei prodús 73.000, maibé iha faze ida-ne’e prodús uluk 16.000 kaderneta pasaporte komún ne’ebé sei to’o duni iha TL iha Setembru nia rohan

Ministru ne’e dehan, Kontratu Governu nian iha tempu ne’ebé determina ona no kompañia tenke kumpri tanba devér Governu nian halo tiha ona, halo ona pagamentu, fó ona autorizasaun atu prodús entaun agora parte kompañia atu kumpri sira nia devér katak sira tenke lori passaporte mai iha tempu ne’ebé determinadu iha fim Setembru.

Lee Mós: Loron 120 Rezolve Kadernéta Pasaporte Timor-Leste

Jornalista: Vito Salvadór