Hatutan.com, (16 Agostu 2023), Díli—Parlamentu Nasionál (PN), kontinua hein atu iha tempu badak IX Governu Konstitusionál aprezenta proposta kandidatu bá Komissáriu Comissão Anti Corrupção (CAC), nune’e dikute hodi hili atu bele hala’o servisu tuir Lei ne’ebé iha.

Edifísiu CAC iha Farol, Dili. Foto/Dok.CAC

“Ami husu ona ba Governu tanba kandidatu ne’e tenke mai duni hosi Governu tanba la’ós PN ninia inisiativa. Klaru sei hala’o lalais eleisaun iha tempu badak. Orsamentu Retifikativu Governu haruka ona mai iha PN, iha mós Lei lubuk ida sei altera. Ho razaun ida-ne’e mak hein alterasaun Lei CAC nian molok Governu atu haruka kandidatu ba Parlamentu Nasionál,” Prezidente Parlamentu Nasionál (PPN), Maria Fernanda Lay hateten hafoin hala’o enkontru regulár ho Prezidente Repúblika (PR), José Ramos-Horta, iha Palásiu Prezidensiál Bairru-Pité, Kuarta (16/08/2023).

Lee Mós: Polémika Eleisaun Komissáriu CAC, PN Inisia Lei Kuórum no Espera Ramos-Horta Promulga

Alende ne’e PN mós hein proposta kona-bá kandidatu bá Membru Conselho Imprensa (CI) hodi troka Expedito Dias Ximenes, Membru Komisaun Funsaun Públika (KFP) ne’ebé oras ne’e sei mamuk hela,  tanba bankada sira mak tenke hili kandidatu sira ne’e, reprezentasaun Parlamentu Nasionál nian, iha prossesu ne’e presiza tempu atu diskute hodi hili ema.

Iha 16 Marsu 2023, Parlamentu Nasionál (PN), Kinta Lejislatura re-ajenda data eleisaun bá Komissáriu foun Comissão Anti Corrupção (CAC) nian, iha Segunda 20 Marsu 2023.

Molok ne’e, Parlamentu Nasional rasik mós iha Kinta Lejislatura, ajenda ona data eleisaun bá Komissáriu foun CAC nian dala-rua, maibé bankada opozisaun sempre auzénsia iha plenária, tanba ne’e seidauk realiza eleisaun ho razaun la prienxe kuorum.

Rekezitu atu hala’o eleisaun bá kandidatu Komissáriu foun CAC, nesesita deputadu mínimu 49 no másimu 50.

Maibé iha sala plenária, deputadu sira la prienxe 49 tanba presiza deputadu 49 maka foin halo eleisaun.

Komissáriu CAC, Sérgio Hornai eleitu iha 2019 no posse iha loron 21 fulan-Janeiru 2019 bá mandatu tinan-haat (4) no termina iha loron 21 fulan-Janeiru 2023.

Ho mandatu ne’ebé konklui ona ne’e, Kuarta 25 fulan-Janeiru 2023, Governu liuhosi sorumutu iha Konsellu Ministru, aprova tiha ona projetu proposta rezolusaun Governu nian hodi propoin eis Prokuradór Jerál Repúblika (PGR-sigla portugés), José Ximenes bá Komisáriu CAC.

Projetu proposta rezolusaun ida-ne’e aprezenta hosi Primeiru Ministru (PM), Taur Matan Ruak, bá dezignasaun hosi Komisáriu CAC, bá mandatu tinan-haat, tuir rejime eskluzividade no foin lalais, Governu aprezenta ona bá PN hodi bele halo votasaun bá kandidatu ne’ebé Governu rasik propoin tiha ona.

Bankada opozisaun sempre auzénsia ho razaun la konkorda proposta rezolusaun Governu nian hodi propoin eis Prokuradór Jerál Repúblika (PGR-sigla portugés), José Ximenes bá Komisáriu CAC ne’ebé momentu ne’ebá hanesan assessór legál ba Primeiru Ministru (PM), Taur Matan Ruak.

Lee Mós:PN Hakotu Mandatu Komisáriu Sérgio Hornai,  Atividade Importante CAC Paradu

Jornalista: Vito Salvadór