Hatutan.com, (16 Setembru 2023), Díli— Artista Timor oan Alberto Maria Sequeira Alves Piedade (Bepi), lansa ninia múzika dahuluk ne’ebé hakerek ho lian Inglés ho títulu Shadow, nu’udár espresaun domin ida kle’an tebes bá ninia aman ne’ebé husik oan mundu ne’e no mós ba ninia inan.

Artista Timoroan Alberto Maria Sequeira Alves Piedade (Bepi).

Múzika Shadow ne’e ofisialmente lansa ona iha Platinum Cineplex Timor Plaza, Sábadu, 16 Setembru 2023.

Lee Mós: Marvi Ofisialmente Lansa Múzika “Iluzaun”

Iha Bepi ninia aprezentasaun, múzika Shadow hanesan ninia múzika primeiru liu kedan halo ho lian Inglés, antes nia hakerek ho lia Tetun no ida-ne’e nia hakerek ba nia pai bainhira husik-is iha tinan 2015.

Múzika ne’e maioria Bepi hakerek ho lia-fuan espresaun de’it tanba iha Timor difísil atu dehan ba pai no mãe katak hadomi sira.

Tanba ne’e maka liu hosi múzika ida-ne’e Bepi koko hatudu liu hosi odamatan atu loke hodi hanoin fila fali ba ninia pai, maibé iha odamatan ne’e taka hela, katak pai la iha tiha ona no bele de’it hanoin nia mensajen no lisaun sira ne’ebé mak nia rai hela.

“Ita senti katak ita hadomi Pai ho Mãe bainhira sira la iha ona mak senti moris ne’e buat balun falta. Maibé ita mós hatene tanba ita nia apa sira la perfeitu no dalaruma ita istori-malu ho sira. Dalabarak haree sira nia karákter ida la di’ak ne’e halo ita nervozu no senti la gosta kedan sira maibé pai sira mós ema no sira halo sala nune’e sira se halo ita seguru bainhira sira iha. Dalaruma mós ita ladún apresia bainhira ita nia pai hamutuk ho ita,” Bepi konta inspirasaun  ne’ebé lori nia hakerek múzika ne’e.

Liu tiha tinan ida, dala barak  tuur mesak hanoin fila-fali uluk sei ki’ik oan, pasa tempu oitoan de’it ho pai tanba boot oitoan tama kedan eskola iha Semináriu no sai mai bá kontinua tán eskola iha rai liur entaun tempu oitoan loos atu halimar ho pai no tempu barak liu pasa ho kolega sira.

Artista Timoroan Alberto Maria Sequeira Alves Piedade (Bepi), lansa ninia múzika dahuluk ne’ebé hakerek ho lian Inglés ho títulu Shadow, iha Platinum Cineplex Timor Plaza, Sábadu, 16 Setembru 2023. Foto: Elio dos Santos da Costa.

To’o ikus, istoria malu oitoan ho pai, maibé pai hanesan ema ne’ebé nakonu ho sabedoria sempre fó lia-fuan ida di’ak mai uma laran, nune’e iha momentu ne’ebá sente triste kedan no arrepende katak iha momentu apa sei moris nusa la pasa tempu barak ho nia, maibé tempu ne’e fó hotu de’it ba halimar ho kolega sira.

“Ha’u halo tiha múzika ne’e ho Inglés tanba Tetum ita atu espresa loloos ita nia domin ba pai no mãe ne’e difísil oitoan. Ne’e mak halo tiha bá Inglés hatudu liu hosi odamatan, ai-laran, Igreja laran no keyboard (organ) ne’ebé mak demostra ka hatudu oinsa mak sira halo ba ita oan sira to’o nia mate. Tanba ne’e mak sira mate ona ita koko atu loke odamatan maibé odamatan taka tiha ona,” Bepi konta tuir ho matan-been.

Múzika ne’e kria lalais de’it tamba bainhira kria ho emosaun hanoin fali pai iha tempu defísil sira dalabarak tuur hakerek, toka, depois bele kanta ona, maibé halo gravasaun ne’e mak presiza tempu barak liu.

Tanba ne’e mak múzika ne’e hakerek iha tinan 2016 foin mak grava iha 2021 liu tiha tinan (5) mak foin grava, no atu tau iha album daruak nian hodi kompleta album primeiru ne’ebé lansa ona antes ho múzika 15.

Artista Timoroan sira ho Jornalista sira partisipa iha serimónia lansamentu múzika dahuluk ne’ebé hakerek hosi Artista Timoroan Alberto Maria Sequeira Alves Piedade (Bepi) ho lian Inglés ho títulu Shadow, iha Platinum Cineplex Timor Plaza, Sábadu, 16 Setembru 2023. Foto: Elio dos Santos da Costa.

Bepi orgullu tanba sente hanesan konta fali pai nia istória maske pai nia imajen la tau iha vídio maibé orgullu katak pai mós sei kontenti iha lalehan.

Film iha múzika ne’e Bepi hasai iha Rembor Manatutu, tanba ninia pai ema Manatutu hodi lembra fila-fali saida mak pai halo bá nia hosi ki’ik.

Vídeo ne’e mós Bepi foti iha Igreja Parókia Santo António Manatutu, Tasi-tolu, Marinir tasi-ibun Dili nian no mos Igreja Ai-mutin.

Durante prodúz múzika ne’e hetan suporta hosi Joni Nazareth no Zelia Lemos hanesan transporte no suporta makas liu mak  I do You Ans no Timor Furak inklui ekipa seluk tán.

Bepi Frekuente ninia estudu to’o Gardua iha tinan 2014 ho Mestradu iha área Jestaun Rekursu Umanu hosi Universidade Monash.

Desde nia fila hikas mai Timor-Leste, alende hanesan artista, Bepi servisu ona nu’udár Konselleiru Tékniku iha jestaun rekursu umanu ba instituisaun governu nian, inklui Komisaun Funsaun Públika, PNDS (Programa Nasionál Dezenvolvimentu Suku) no sai nu’udár Xefi Sentru kapasitasaun Jestaun Finanseira Públika iha Ministériu Finansas durante tinan haat.

Daudaun ne’e, Bepi nu’udar assesór nasionál ida ba Ajénsia Nasionál Avaliasaun no Akreditasaun Akadémiku, konsultór no mós apoiu grupu foin-sa’e sira.

Bepi mós nu’udár emprezáriu ida-ne’ebé sussesu no estabelese ona inisiativa negósiu balun ne’ebé aumenta oportunidade empregu ba joven Timor-oan sira.

Jornalista Estajiáriu: Lazaro Pereira Quefi