Hatutan.com, (17 Setembru 2023), Díli—Ministru bá Assuntu Kombatente no Libertasaun Nasionál (MACLN-Sigla Português), Gil da Costa Monteiro “Oan Soru” promete katak, iha tinan 2024 sei harii Jardim Erói iha postu administrativu 65 ho objetivu atu dignifika Erói sira-nia kontribuisaun iha libertasaun nasionál.

Ministru bá Assuntu Kombatente no Libertasaun Nasionál (MACLN-Sigla Português), Gil da Costa Monteiro “Oan Soru” halo inaugurasaun bá monumentu Saudozu Mausala no Saudoza Inan Terus nian iha aldeia Lemutou, Suku Katrai-Leten, Postu Administrativu Letefoho, Munisípiu Ermera, Sábadu (16/09). Foto : MACLN.

Oan Soru hato’o promesa ne’e durante intervensaun iha serimónia inaugurasaun monumentu Saudozu Mausala no Saudoza Inan Terus nian iha aldeia Lemutou, Suku Katrai-Leten, Postu Administrativu Letefoho, Munisípiu Ermera, Sábadu (16/09).

Lee Mós: Star King Konstrui “Jardim da Chama Eterna” ho Kustu Millaun $5

“Tinan oin ita sei harii jardim bá erói sira iha postu administrativu neen-nulu resin-lima (65) hodi hakerek erói sira-nia naran iha plaka jardím erói nian, hahú sira ne’ebé kargu boot, tun to’o ida ki’ik sira ne’ebé inan-aman kous no mate iha ai-laran,” Hatutan.com sita kominikadu, Domingu (17/09).

Iha tinan 24 funu hasoru invazór Indonéziu, populasaun sira ne’ebé halai bá ai-laran, balun mate iha fatuk ko’ak, balun fali moras de’it mak mate iha mota ko’ak, balun mate tán hamlaha iha ai-laran, seluk kilat-musan mak kona, bombardiál ho objetivu luta bá ukun-rasik aan.

“Liuhosi harii jardim eróis ne’e atu dignifika no valoriza sira-ninia luta bá ukun-rasik aan, tanba luta bá ukun-rasik aan ne’e la’ós prezente ida mak ema fó de’it, maibé mai hosi sira-nia luta hodi oferese sira-nia vida,” nia hateten.

Husu Timoroan sira, liu-liu Veteranu sira atu labele falsifika ka inventa dadus veteranu nian tánba de’it osan.

Iha fayin hanesan, Deputadu Domingos Augosto “Deker” ne’ebé partisipa mós iha serimónia ne’e afirma katak, hanesan reprezentante povu iha PN hakru’uk hodi fó nafatin ónra no glória bá Éroi sira no mártires sira hotu.

Reprezentante Veteranu Munisipiu Ermera, Júlio Araújo “Freedom” afirma, prosesu sira harii monumentu ida-ne’e to’o konsege inaugura tanba kontribuisaun hosi komunidade ho hanoin ida katak, monumentu bá Ermera oan hotu nomós bá Timoroan tomak.

Jornalista: Rogério Pereira Cárceres