Hatutan.com, (19 Setembru 2023), Díli—Sorumutuk Konsellu Ministru (KM) iha loron 19 fulan Setembru tinan 2023, iha Palásiu Governu, aprova ona projetu Proposta Lei ne’ebé aprezenta hosi Ministru Administrasaun Estatál (MAE), Tomás do Rosário Cabral, kona-bá alterasaun dahaat ba Lei nu. 11/2009, loron 7 fulan Outubru, ne’ebé aprova Divizaun Administrativa Territóriu.

Sorumutuk Konsellu Ministru (KM) iha loron 19 fulan Setembru tinan 2023, iha Palásiu Governu. Foto: GPM.

“Tuir saida mak prevee ona iha Programa Governu Konstitusionál IX, alterasaun ne’e ho atensaun atu halakon Munisípiu Ataúru no kria fali divizaun administrativa eskalaun dahuluk foun ida, ne’ebé hanaran Ataúru, hanesan ne’ebé prevee ona iha artigu da-5 Konstituisaun Repúblika nian, hodi fó hatene katak Ataúru goza tratamentu administrativu no ekonómiku espesiál,” Hatutan.com sita komunikadu.

Lee Mós: Governu Sei Haruka tán Traballadór Timoroan bá Servisu iha Brunei Darussalam

Halo mós eliminasaun referénsia ba “Sukus” hanesan parte hosi divizaun administrativa, tanba Sukus mak entidade ne’ebé liga ba Administraun Autónoma no la’ós hanesan parte husi divizaun administrativa territóriu nian.

Ho alterasaun ida ne’e, territóriu Repúblika Demokrátika Timor-Leste kompostu hosi divizaun administrativa eskalaun dahuluk hanesan tuirmai ne’e: Ataúru; Munisípiu Aileu; Munisípiu Ainaru; Munisípiu Baukau; Munisípiu Bobonaru; Munisípiu Covalima; Munisípiu Díli; Munisípiu Ermera; Munisípiu Lautém; Munisípiu Likísa; Munisípiu Manatutu; Munisípiu Manufahi; Munisípiu Vikeke; no Rejiaun Administrativa Espesiál Oekuse Ambenu.

Jornalista: Rogério Pereira Cárceres