Hatutan.com, (24 Setembru 2023), Díli- Atleta Timoroan na’in-lima hosi Federasaun Boxe Amadora Timor-Leste (FBATL) tenke “haksumik” hela sira-nia mehi hodi joga  iha eventu internasionál  Asian Games bá da-19 iha Hangzhou, Xina, tanba la perienxe rekizitu hosi International Boxing Association (IBA) ho Word Boxing.

Lee Mós: Primeiru-Ministru Dezeja Sussesu bá Atleta 58 iha ASEAN Games 2023

Boxista Timoroan, Delio Mouzinho, triste no espresa nia la kontente ho Komité Olímpiku Nasionál Timor-Leste (CONTL, sigla portugés) liuhosi nia konta Facebook, hodi dehan, boxe timoroan labele partisipa iha jogu Asian Games Xina 2023 tanba hatan deskualifikasaun, basá  CONTL falla organiza no la partisipa iha enkontru tékniku.

Foto/Repro

“Ami mai tarde, ema enkontru tékniku hotu ona mak ami foin to’o ne’e,” Delio Mouxinho hakerek iha nia  pájina Facebook.

Reprezenta boxe Timor-Leste, Delio husu deskulpa bá povu Timor-Leste no dehan, sira-nia parte prontu ona atu partisipa  kompetisaun, maibé problema tanba mai tarde no ema halo hotu ona enkontru tékniku mak sira foin to’o iha Xina.

Bá lamentasaun no preokupasaun Boxe Timor-Leste nian ne’e, Xefe Misaun Timor-Leste bá Asian Games Xina 2023, Mateus da Cruz, esklarese katak,  atleta husi Federasaun Boxe Timor-Leste hamutuk na’in-lima (5) labele joga iha kompetisaun Asian Games tanba la prienxe rekizitu hosi International Boxing Association (IBA) ho World Boxing.

Xefe Misaun Timor-Leste bá Asian Games tinan ne’e iha Xina, Mateus da Cruz hateten, Boxe la joga ne’e la’ós tanba CONTL mak sala, maibé  tanba sira laiha relatóriu administrasaun bá iha Federasaun Boxe Internasionál.

“Sira fulan-fulan ne’e tenke hato’o report bá iha Federasaun Boxe Internasionál kona-bá atleta sira ne’ebé sei kompete iha kompetisaun rejionál no internasionál sira. Tamba ne’e kada fulan-ne’en, sira nia atestadu médiku (medical report) tenke iha, no iha atestadu médiku  ne’e atleta sira tenke livre husi moras sira hanesan TBC, Hepatites, Sífilis, Hiv-Sida no livre husi droga. Ida-ne’e mak sira tenke hato’o ba Federasaun Boxe Internasionál liu husi doutor ne’ebé federasaun iha,” Mateus da Cruz haktuir hodi responde Hatutan.com via telefónika, Domingu (24/09/2023)

Hosi Xina Mateus da Cruz haktuir katak Federasaun Boxe  Timor-Leste laiha record ida ne’ebé iha para hatoo bá iha Federasaun Boxe Internasionál no uluk Timor-Leste sempre hetan toleránsia, no CONTL rasik sempre fó hatene antes bá iha kada Federasaun, maibé ladun tau atensaun.

Nia hateten, esperiénsia iha Asian Games Vietnam liubá hasoru mos problema nune’e, maibé CONTL konsege rezolve no husu ba federasaun atu hadia, maibé realidade kontinua no too Asian Games Xina Federasaun Boxe Internasionál mós labele rezolve situasaun ida-ne’e tamba Boxe mós iha Federasaun Mundiál rua; ida mak International Boxing Association (IBA) no World Boxing  no tamba Boxe Internasionál enfrenta  problema nune’e jogu Boxe nian bá Asian Games organiza direita husi  Komité Olímpiku Internasionál no laos federasaun boxe.

“Sira-nia problema ne’e tanba laiha record médico ninian no laiha tan kona-bá anti doping ninian, no iha mós problema sira kona-bá dokumentu administrativu balun ne’ebé Federasaun Boxe Timor-Leste tenke kompleta mais dokumentu sira ne’e tahan ida deit mós iha Federasaun internasionál laiha, no ida ne’e Federasaun Boxe mak tenke responsabiliza no CONTL nia responsabilidade mak rejista sira ba sistema para mai  joga agora kona-bá uma laran ne’e sira tenke rezolve ho federasaun internasionál la’ós CONTL no bainhira federasaun internasionál ho IFC mai husu sira nia dokumentu tahan ida mós laiha,” Mateus subliña.

Nia esklarese tan katak Boxe Timoroan sira  la joga la’ós tamba tarde, maibé sira mak la prienxe rekizitu sira federasaun internasionál iha no Comité Olímpico Timor-Leste iha ne’e para atu rezista sira no sira mai atu joga de’it la’ós atu tuir tan teknical meeting.

Sita hosi konta Facebook Delio nian espresa mós kritika balun hodi dehan, “terlalu los (loos) dsss imi estraga povu nia osan dt (de’it) mai China  (Xina) pasiar dt (de’it) nusa osan ne’e la fo (fó) oan ki’ak sira duke gasta ba ami mai pasiar dt (de’it) dsss…”

Jornalista: Vito Salvadór