Hatutan.com, (25 Setembru 2023), Díli—Polémika atleta Timoroan na’in-haat hosi modalidade Boxe Timor-Leste la konsege partisipa jogu boxing Asian Games 2023 iha Hangzhou-Xina la’ós tanba la partisipa iha enkontru téknika ka technical meeting, maibé tanba Federasaun Boxe Timor-Leste (FBTL) la halo atualizasaun kona-bá relatóriu médiku kada boxe nian bá Olímpiku Asia.    

Lee Mós: FBTL Tenke Esklarese Boxe Timoroan Falla Kompete iha Asian Games

Ministru Juventude, Desportu no Arte Kultura (MJDAK), Nelio Isaac Sarmento. Foto/Espesiál

Ministru Juventude, Desportu no Arte Kultura (MJDAK), Nelio Isaac Sarmento, ne’ebé akompaña delegasaun Primeiru-Ministru (MP) Xanana Gusmão iha abertura Asian Games bá da-19 ne’e iha sidade Hangzhou, informa bá Hatutan.com katak, Governu akompaña hela situasaun hotu iha Hangzhou-Xina, liuliu kondisaun atleta Timor-Leste ne’ebé mk partisipa hela iha Asian Games 2023 ne’e.

Ministru Nelio Isaac Sarmento, klarifika katak  Governu mós iha koñesementu ona kona-bá atleta na’in-haat (4) hosi modalidade  boxe ne’ebé labele kompete iha jogu boxing nian.

Rona tiha informasaun sira-ne’e, Ministru Nelio Isaac  Sarmento halo kedas konfirmasaun bá Komité Olímpiku Nasional Timor-Leste (CONTL, sigla portugés), hodi hatene razaun lolos kona-bá assuntus ne’e.

Ministru Juventude, Desportu no Arte Kultura (MJDAK) ne’e rekoñese katak intermu preparasaun atleta boxe Timor-Leste nian na’in-haat ne’e preparadu, maibe intrmu administrasaun iha regra jogu nian,  sira iha problema. 

“Problema tanba ho esperensia organizasaun ne’ebé sei menus, ita-nia Federasaun Boxe Timor-Leste (FBTL)  la halo atualizasaun kona-bá relatóriu médiku kada boxista sira-nian bá Olímpiku Asia nian,” Ministru Nelio Isaac esplika hodi responde Hatutan.com liuhosi telefónika, Segunda (25/09/2023). 

Reprezenta Governu Timor-Leste, Ministru Nelio Isaac Sarmento  husu kedas klarifikasaun  bá komisaun organizadora jogu Olímpiku Asia nian iha Hangzhou-Xina hodi hatene  nia verdadeira, maibe resposta mós mai hanesan, katak atleta boxe Timor-Leste nian la aprezenta relatóriu médiku.

Tuir prosedimentu administrativu Federasaun Boxe Internasionál nian katak boxe  na’in-haat (4) ne’e tenke fulan-neen (6) antes tenke apresenta ona kona-ba Medical Report (relatóriu médiku) hanesan, livre hosi moras hepatitis, livre hosi  HIV/SIDA, livre hosi moras tuberkuloze ka TBC, anti-doping ho sira seluk tan.

“Bazeia bá prosedur ne’ebé sira manda tiha ona bá iha Federsaun Boxe Timor-Leste  iha tinan hirak liubá. Ita-nia Federasaun hetan ona xamada atensaun husi Comite Olympico Asia ne’e hahú kedas ona iha Asian Games Vietnam ho Kambodia. Maibe laiha resposta positivu hosi ita-nia parte,” Ministru Nelio Isaac Sarmento haktuir.

Nia hatutan, tanba boxe Timor-Leste  la aprezenta relatoriu atleta sira ne’e hotu, maka kuaze laiha dokumentus komprovativu agora dadaun iha Komisaun Olímpiku Asia nian hodi autoriza atleta sira ne’e bele joga.

“Regras esensial sira hanesan hau temi sai nu’udár baze fundamentu bá kualker atleta ida atu kumpre, tanba keselamatan atleta ka seguransa pesoal bá atleta mak importante uluk,” nia tenik tan.

Ho esperensia ida ne’e, Governu husu bá FBTL ,CONTL ho Konfederasaun Disportiva Timor-Leste (CDTL, sigla portugés) atu buka esforsu hotu hodi kordena malu, no tulun malu, inklui komunika bá balu hodi antisipa buat sira ne’ebe boxe timoroan sira enfrenta atu  labele akontese tan bá federasaun sira seluk.

“Ha’u rasik hasoru direta ona ho atleta boxe na’in-haat  no sira triste tebes, maibe ha’u fiar katak buat sira hasoru hanesan vitória ida nebe sei pendente hela,  hodi nune prepara diak liu tan iha eventus sira tuir mai,” Nelio Isaac hateten.

Asian Games Hongzhou sai mós rekijitu ida hodi sira bele bá tuir jogu olímpiku iha Paris, karik sira hetan resultadu di’ak. Tanba ne’e regra sira iha boxing rigorozu tebes. Nune’e, tuir Ministru Nelio Isaac Sarmento katak problema Timor-Leste nian mak la hatama relatóriu médiku kada atleta ba olímpiku Asia nian. 

Lee Mós: Boxe Timor-Leste La Joga iha Asian Games Tanba La Prienxe Rekizitu IBA ho World Boxing

Atleta ida hosi Federasaun Tiru Rezigna

Informasaun ne’ebé Ministru Nelio Isaac Sarmento hatutan mós katak alem de atleta boxe Timor-Leste nian na’in-haat ne’e iha mós atleta feto ida hosi Federasaun Tiru mós labele partisipa. La’ós tamba la kumpri prosedementu no regras tiru nian, maibe atleta ne’e mk rezigna-aan rasik.

Jornalista: Vito Salvadór