Hatutan.com, (29 Setembru 2023), Díli- Bankada FRETILIN iha Parlamentu Nasionál propoin atu kandidatu komisáriu Komisaun Anti Korrupsaun (CAC, sigla portugés) ida ne’ebé la hetan apoiu retira hodi bele avansa bá eleisaun.

Lee Mós: Bankada FRETILIN Hakarak Figura CAC Ne’ebé La’ós Asegura Interese ParPol

Xefe Bankada FRETILIN iha PN, Aniceto Guterres. Foto/Elio dos Santos da Costa

“Kuandu ami bá partisipa ne’e bá partisipa para atu hetan konsensu. Kona-bá kandidatu, ami iha tiha ona referénsia pelumenus Bankada rua; FRETILIN ho CNRT konkorda ona bá kandidatu ida, agora partidu boot rua ne’e konkorda ona bá kandidatu ida, entaun ida seluk la hetan apoiu ne’e di’ak liu retira, ida ne’e mak ami hein hela bainhira mak nia retira,” Xefe Bankada FRETILIN, Aniceto Guterres, haktuir  bá jornalista sira iha PN , Sesta (27/09/2023).

Lori Bankada FRETILIN, Aniceto Gutrres  husik hela mensajen bá povu tomak katak Parlamentu Nasionál (PN) iha kapasidade atu kria konsensu kona-bá interese Estadu nian, nune’e husu bá kandidatu sira mós bele kolabora ho intensaun ho polítika di’ak  bá konsensu ne’e rasik.

Aniceto esplika katak objetivu mak hakarak komisáriu ne’ebé konsensuál no tanba agora kandidatu na’in-rua; Sergio  de Jesus Fernandes da Costa Hornai ho Rui Pereira dos Santos,maka  kandidatu mós tenke konsensuál para avansa bá eleisaun, ne’e mak sira halo hela esforsu liuliu bá bankada CNRT ho bankada sira seluk

“Seidauk iha konsensu ne’e mak ha’u dehan esforsu hela ohin ha’u dehan tiha ona apoiu bá kandidatu ida preferénsia ami iha hotu ona, ami konkorda hotu ona, entaun ida ne’ebé la hetan apoiu ne’e husik nia rezigna aan bá para ita prosesu bá votasaun, agora ida seluk nia la hetan apoiu mós nia sei tenta lobi bá lobi mai ne’e halo saída?,” Aniceto Guterres  tenik.

Maski nune’e, Deputadu Aniceto Guterres rasik la temi ka la subliña entre kandidatu na’in-rua bá komisáriu CAC ne’e atu ida-ne’ebé loos mak la hetan apoiu no husu atu retira nia kandidatura.

“Entaun bá halo saída tán só para halo moe aan de’it ka nia sei hakarak koko para atu labele hetan konsensu para husik sira fahe malu? ne’e mak ami lakohi tanba FRETILIN  nia interese mak bá partisipa para atu hetan konsensu, sé bá partisipa para atu vota bá kandidatu rua-rua fali halo saída,“ Aniceto Guterres tenik.

 Jornalista Estajiária: Zita Menezes