Hatutan.com, (20 Setembru 2023), Díli-Bankada FRETILIN iha Parlamentu Nasionál entrega mandatu Prezidente Autoridade Rejiaun Administrativu Oé-Cusse Ambeno no Zona Ekonomia Espesiál  Sosial Merkadu (PA-RAEOA/ZEESM), Arsénio da Paixão Bano nian bá IX Govornu Konstitusionál ne’ebé lidera hosi Primeiru-Ministru (PM), Xanana Gusmão.

Lee Mós: “Fa’an” Rezidénsia Fulolo, Notariadu RAEAO Konsidera La Prienxe Rekezitu

Arsénio Bano inaugura ponte ligasaun estrada Rejionál Bitopa- Oebaha, Liga Suku Bobometo ho Usitasae, liga Pante Macassar-Oesilo-Passabe no Nitibe. Foto/Espesiál

Liuhosi plenária PN, foin lalais ne’e, membru Bankada CNRT, Firminio Taequi, nu’udár Oé-Cusse oan propoin bá PM Xanana Gusmão atu ezonera PA-RAEOA/ZEESM, Arsénio Bano, tanba durante nia mandatu halo servisu sira iha Oé-Cusse haree liu bá kór polítika.  

Deputadu Firnimo Taequi mós propoin atu PM Xanana ezonera hotu adjuntu PA-RAEOA/ZEESM tanba  dezenvolvimentu ne’ebé la’o iha Oé-Cusse parte postu administrativu balun de’it, no maioria povu Oé-Cusse la sente dezenvolvimentu ida ekilíbriu bá hotu-hotu.

Relasiona ho ezijénsia ida-ne’e, membru Bankada FRETILIN, David Dias “Mandati” hateten, bankada FRETILIN laiha podér atu ko’alia kona-bá ezonerasaun ba PA-RAEOA/ZEESM, tanba ne’e  entrega desizaun hotu iha Governu mak sei determina.

“Buat ida ezonerasaun no nomeasaun buat hirak ne’e iha nia rekizitu ka prosedimentu ne’ebé ita boot sira haree lei. Sé seidauk to’o, husik lai. Mais depende mós bá ema sira manán sira mak sei determina oinsá buat sira ne’e, tanba ha’u la’ós iha Governu laran para ha’u deside buat ruma, maibé ne’e desizaun hosi Konsellu Ministru,” Deputadu David Dias Mandati hateten bá Jornalista sira  iha PN, Kuarta (20/09/2023).

Ponte foun ligasaun estrada Rejionál Bitopa- Oebaha, Liga Suku Bobometo ho Usitasae, liga Pante Macassar-Oesilo-Passabe no Nitibe. Foto/Espesiál

Arsenio Paixão Bano nia camarada hosi partidu FRETILIN David Dias afirma, desizaun sira kona-bá atu halo ezonerasaun no nomeia fali ema seluk bá lidera RAEOA/ZEESM ne’e kabe polítiku sira, no ne’e desizaun polítika hosi Governu rasik.

Iha parte seluk  Deputada FRETILIN, Sancia Floréncia da Paixão Bano, dehan, Governu sentrál mak iha liu kompeténsia, atu foti desizaun bá ezonerasaun PA-RAEOA/ZEESM.

“Kona-bá ezonerasaun, ha’u laiha kompeténsia atu halo komentáriu kona-bá ida-ne’e. Maibé ne’e kompeténsia Governu sentrál nian, bele foti desizaun bá ida-ne’e no sira rasik sei ko’alia mós kona-bá asuntu ida-ne’e,” Deputada Sancia Bano  tenik hodi responde jornalista sira iha PN.

Arsénio Bano Inaugura Ponte

PA-RAEOA/ZEESM, Arsénio Bano, Kuarta (20/09/2023), inaugura ponte ligasaun estrada Rejionál Bitopa- Oebaha, Liga Suku Bobometo ho Usitasae, liga Pante Macassar-Oesilo-Passabe no Nitibe. Foto/Espesiál

Hosi sorin seluk, PA-RAOA/ZEESM, Arsénio Paixão Bano, Kuarta ne’e, hamutuk ho povu Oé-Cuse halo hela serimonia inaugurasaun ponte halo ligasaun estrada Rejionál Bitopa- Oebaha, Liga Suku Bobometo ho Usitasae, liga Pante Macassar-Oesilo-Passabe no Nitibe.

Sita hosi konta Facebook Arsénio Bano, katak nia hamutuk ho povu Oé-Cusse no konvidadu importante seluk halo hela inagurasuan bá ponte refere nu’udár parte ida hosi dezenvolvimentu infra-estrutura iha Oé-Cusse.

Jornalista  Estajiária: Zita Menezes