Hatutan.com, (05 Outubru 2023), Díli— Governu aloka orsamentu $150.000 bá preparasaun no partisipasaun atleta sira  iha Asian Para Games Hangzhou, Xina, tinan ne’e, nune’e Primeiru-Ministru (PM), Kay Rala Xanana Gusmão husu ba ofisiáis no treinadór sira Komité Paralímpiku Nasionál Timor-Leste (CPNTL, sigla portugés) atu tau responsabilidade máximu ba atleta sira.

Primeiru-Ministru Kay Rala Xanana Gusmão hala’o despedida ho atleta no ofisiál sira bá Asian Para Games Hangzhou, Xina, iha Palásiu Governu, Kinta (05/10/2023). Foto: Vito Salvadór.

Primeiru-Ministru Kay Rala Xanana Gusmão hala’o ona serimónia despedida ho atleta no ofisiál sira iha Palásiu Governu, Kinta (05/10/2023) no husu responsabilidade bá atu labele hamosu tán difikuldade no problema sira ne’ebé bele impede atleta sira nia partisipasaun iha eventu.

Lee Mós: Primeiru-Ministru Dezeja Sussesu bá Atleta 58 iha ASEAN Games 2023

“Imi Prezidente ho ofisiál sira, atleta sira ba mak problema barak tán, imi mai sei simu responsabilidade,” Kay Rala Xanana Gusmão alerta.

Xanana Gusmão tau konfiansa totál bá ekipa, liuliu bá atleta sira ne’ebé hatene liu kona-bá saida de’it mak atu halo iha ne’ebá depende ba rezultadu treinu no esforsu tanba ne’e Primeiru Ministru labele husu buat barak, ko’alia buat barak, maibé dezeza de’it la’o ho di’ak, ida-idak buka halo saida mak nia bele atu fila fali mai hamutuk ho sira seluk dezenvolve nafatin modalidade desportiva la’ós de’it ba paralimpiku ninian maibé atividade desportivas em jerál iha Timor-Leste.

“Husu atu hadi’a mós relasaun ho maluk sira seluk, atleta paralimpiku hosi nasaun seluk hodi kompete ho disiplina,” Xanana hameno.

Iha fatin hanesan, Ministru Juventude, Desportu, Arte no Kultura (MJDAC, sigla portugés), Nélio Isaac Sarmento hateten delegasaun atleta paralimpiku hosi Timor-Leste sei arranka ba Hangzhou, Xina iha loron 15 fulan ne’e no kontijente Timor-Leste sei iha Hangzhou,  Xina durante semana rua to’o tolu atu bele partisipa no kompete iha Asian Para Games.

Delegasaun Timor-Leste ho totál ema na’in-25 no hosi ne’e iha atleta na’in-11. Razaun delegasaun ne’e ba ho ekipa bo’ot tanba atleta paralimpiku sira ho nesesidade espesiál tanba ne’e presiza duni ekipa ida sufisiente atu bele tulun no ajuda sira durante kompetisaun Asian Para Games Hangzhou.

“Atleta paralimpiku sempre hamorin bebeik Timor-Leste nia naran iha mundu internasionál no Asian Para Games. Sira ba dala tolu ona no iha tinan kotuk atleta paralimpiku sira oferese medalla osan mean no mós osan mutin. Tanba ne’e ita hein katak tinan ne’e sira bele fila-fali mai ho prestasaun ne’ebé mak ita hotu-hotu espera,” Nélio Isaac Sarmento hateten.

Ofisiál no treinadór sira hatene ona regra no prosedimentu sira Asian Para Games nian, tamba ne’e bainhira atleta sira enfrenta buat ruma iha ne’ebá hotu-hotu sei ezije sira nia responsabilidade.

Governu Aloka $150.000 

Prezidente interinu CPNTL, Mateus Lucas informa, durante preparasaun bá atleta sira CPNTL hetan apoiu másimu hosi Governu.

“Durante CPNTL halo preparasaun iha rai laran hetan apoiu hosi Governu ho totál $50.000 no ba dezlokasaun Governu apoia CPNTL $100.000-resin,” Mateus Lucas hateten.

Atleta Para Table Tenis, Pascoela dos Santos Pereira prontu ona atu kompete iha Asian Para Games Hangzhou, Xina no promete sei hamorin Timor-Leste nia naran iha modalidade tenis meza nian.

“Ha’u prontu ona atu kompete maibé buat hotu hauentrega deit ba Maromak. Ha’u iha forsa nafatin atu kompete hodi lori ita nia nasaun ba oin,” Pascoela dos Santos Pereira espresa.

Iha Asian Para Games Hangzhou, Xina kontijente Timor-Leste liu hosi CPNTL sei partisipa iha modalidade tolu ho atleta 11 mak hanesan Modalidade Paratletismu ho atleta na’in hat (4) kompostu hosi mane tolu (3) no Feto Ida (1), Modalidade Para Table Tenis ho atleta na’in-lima (5) kompostu hosi Mane tolu (3) Feto Rua (2) no ikus liu hosi modalidade Para Power Lifting ho atleta na’in-rua (2) mane hotu.

Jornalista: Vito Salvadór