Hatutan.com, (05 Outubru 2023), Díli—Prezidente Repúblika (PR), José Ramos-Horta simu prémiu prestisiozu ‘Doña Maria de las Nieves of Parma’ iha Jenebra nu’udár rekoñesimentu bá nia kontribuisaun bá kona-bá pás no independénsia Timor-Leste nian.

Prezidente Repúblika (PR), José Ramos-Horta simu prémiu prestisiozu ‘Doña Maria de las Nieves of Parma’ iha Jenebra nu’udár rekoñesimentu bá nia kontribuisaun bá kona-bá pás no independénsia Timor-Leste nian. Foto: PR.

Prémiu ‘Doña Maria de las Nieves of Parma’ naran hosi Prinsesa Marie des Neiges hosi Bourbon-Parma, arístokrata Franseza, ornitolojista no ativista Carlist.

Lee Mós: Ramos-Horta Sei Simu Prémiu Dona Maria de Las Nieves of Parma iha Jenebra

Prémiu ida ne’e atu hahí individu sira ne’ebé halo kontribuisaun boot ba sira-nia komunidade no mundu tomak, hanesan espíritu servisu no dedikasaun ne’ebé Prinseza Marie des Neiges hatudu.

“Premiu ‘Doña Maria de las Nieves of Parma’ ne’e hanesan rekoñesimentu ba Xefe Estadu nia esforsu ne’ebé la para atu defende pás no independénsia iha Timor-Leste,” Hatutan.com sita komunikadu, Kinta (05/10/2013).

Iha diskursu Prezidente Repúblika José Ramos-Horta agradese tebes ba rekuñesementu ba nia kontribuisaun ne’ebé mak nia halo durante nia moris bá pás, liberdade no demokrasia la’ós de’it iha Timor-Leste maibé mós iha parte seluk iha Mundu.

Importánsia komérsiu ba dezenvolvimentu sustentável

Ramos-Horta partisipa iha abertura Simeira ‘Building Bridges’ iha Jenebra ne’ebé hala’o iha loron 2 fulan-outubru tinan 2023, iha Sentru Internasionál Konferénsia Genese (Sigla iha lian Inglesh CICG).

Sorumutu ne’e hanesan reuniaun entre lideransa emprezariál sira, ofisiál governu sira, no reprezentante sosiedade sivíl sira atu diskute dalan sira atu harii ponte entre seitór oioin no promove dezenvolvimentu sustentável.

Ramos-Horta hamutuk ho Vise-Primeiru-Ministru Olanda, Sigrid Kaag no Prezidente Ponte Edifisiu. Ramos-Horta ko’alia kona-bá importánsia atu harii ponte entre nasaun no kultura oin-oin, no nia ko’alia liu kona-ba nesesidade atu halo kooperasaun hodi responde ba dezafiu globál sira hanesan mudansa klimátika no ki’ak.

“Diretór-Jerál Organizasaun Mundiál Komersiu (OMK) Ngozi Okonjo-Iweala hato’o deklarasaun importante ida kona-ba importánsia komérsiu ba dezenvolvimentu sustentavel. Nesesidade atu reforma OMK no halo komérsiu inkluzivu no ekuitativu liu,” sita tán komunikadu ne’e.

Sorumutu ne’e mós hatudu diskusaun balun seluk ne’ebé lidera hosi ezekutivu seitór privadu sira. Diskusaun sira-ne’e foka liu ba tópiku oioin, inklui finansiamentu klimátiku, agrikultura sustentável no transformasaun dijitál.

Sorumutu kona-bá planeamentu sira sai hanesan plataforma importante ida atu diskute dalan sira atu harii mundu ida-ne’ebé sustentavel no ekuitativu liu.

Prezidente Ramos-Horta nia partisipasaun iha sorumutu ne’e sai nu’udár testemuña ida ba nia kompromisu ba kooperasaun internasionál no nia fiar ba ‘ponte’ sira-nia kbiit atu halibur ema no kultura sira.

Ramos-Horta Enkontru Ho Diretór-Jerál OMS

Prezidente Repúblika Timor-Leste José Ramos-Horta mós hasoru malu ho Diretór-Jerál Organizasaun Mundiál Saúde (OMS) Tedros Ghebreyesus iha eskritóriu OMS iha Jenebra. Foto: PR.

Prezidente Repúblika Timor-Leste José Ramos-Horta mós hasoru malu ho Diretór-Jerál Organizasaun Mundiál Saúde (OMS) Tedros Ghebreyesus iha eskritóriu OMS iha Jenebra.

Lider na’in rua diskute dalan atu hametin sira-nia koperasaun kona-ba asuntu saúde oin-oin, liuliu kona-ba Timor-Leste nia susesu iha kombate moras sira ne’ebé bele prevenene hanesan tuberkoloze no malária nomós hato’o nia asaun ba kampaña nasionál ba Susubeen-inan iha Timor-Leste.

“Iha sorumutu ne’e diskute kona-ba Konferénsia ba Konvensaun Enkuadramentu Nasoins Unidas nian kona-ba Mudansa Klimatika (COP28) no nesesidade ba kompromisu polítiku iha nivel aas liu atu asegura katak saúde iha sentru asaun klimátika nian,” Hatutan.com sita tán komunikadu.

Ramos-Horta agradese ba Ghebreyesus tanba OMS nia apoiu ba Timor-Leste no hato’o nia kompromisu atu servisu hamutuk hodi hadi’a ema Timor-oan sira-nia saúde.

Sorumutu ne’e hanesan pasu pozitivu ida hodi hametin liu tán relasaun entre Timor-Leste no OMS, no hein katak sei lori dalan foun no inovadór atu hadi’a rezultadu saúde iha Timor-Leste.

Jornalista: Vito Salvadór