Hatutan.com, (05 Outubru 2023), Díli—Austrália iha kompromisu bo’ot atu kontinua tulun diak liu tan dezenvolvimentu iha Timor-Leste (TL) liu hosi Politika Dezelvolvimentu Internasionál ka Australia’s New International Development Policy (ANIDP).

Enkarregada Negósiu Embaixada Austrália iha Timor-Leste, Caitlin Wilson, hamutuk ho Ministru Negósiu Estranjeiru no Kooperasaun (MNEK), Bendito dos Santos Freitas, hala’o lansamentu ofisiál bá Australia’s New International Development Policy iha Timor-Leste, Kinta (05/10/2023). Foto: MNEK.

Atu kontinua kompromisu hirak ne’e ba oin, Enkarregade Negósiu Embaixada Austrália iha Timor-Leste, Caitlin Wilson, hamutuk ho Ministru Negósiu Estranjeiru no Kooperasaun (MNEK), Bendito dos Santos Freitas, halo lansamentu ofisial bá ANIDP iha Timor-Leste.

Lee Mós: Austrália Rekoñese Greater Sunrise Importante bá Dezenvolvimentu Timor-Leste

Enkarregada Negósiu Austrália Caitlin Wilson hateten, Ministra Negócios Estrangeiros no Ministru ba Dezelvolvimentu Internasional Austrália ofisialmente Iansa ona International Development Policy Austrália nian iha fulan Agostu liu bá.

Austrália mós hakarak halo lansamentu bá politika ne’e iha Timor-Leste tanba ida-ne’e importante tebes ba dezenvolvimentu tuir kontestu Timor nian no alénde politika refere, atu mós fó énfaze ba etapa furak sira-ne’ebé sei mai.

“Polítika ne’e la’ós hanesan dokumentu ne’ebé furak de’it, maibé fó momentu importante bá Austrália hodi servisu besik liután ho parseiru sira ne’ebé lidera hosi Governu Austrália rasik, nune’e bele define programa prioridade foun sira,” Caitlin Wilson hateten iha komunikadu ne’ebé Hatutan.com sita, Kinta (05/10/2023).

Nune’e mós MNEK, Bendito dos Santos Freitas hateten, Austrália sai hanesan parseiru importante ida ba Timor-Leste. Parseria ida-ne’ebé istóriku teb-tebes.

Lansamentu bá Australia’s New International Development Policy ne’e importante teb-tebes tanba reafirma komitmentu TL bá dezenvolvimentu, mellora liután servisu sira ne’ebé bele suporta dezenvolvimentu institusionál, hanesan fatór ba dezenvolvimentu ekonómiku no dezenvolvimentu ba nasaun tomak iha área oi-oin ne’ebé presiza.

“Lansamentu ba Australia’s New International Development Policy importante tebes, atu reafirma liután Konmitmentu nasaun rua ne’e nian ba dezenvolvimentu nasionál,” Bendito dos Santos Freitas hateten.

Govrnante ne’e hatutan Timor-Leste adota politika externa ne’ebé laiha aliadu no laiha inimigu, maibé, iha de’it amigu ho ema hotu, hatudu momos Timor nia kompromisu ba páz no Estabilidade mak dalan ne’ebé di’ak atu servisu hamutuk ho Entidades hotu hodi kontribui ba dezenvolvimentu nasaun.

Jornalista: Vito Salvadór