Hatutan.com, (13 Outubru 2023), Díli—Tribunál Primeira Instánsia Díli (TPID) liu hosi Juiz Prezide José Gonsalves, Sesta (13/10/2023) absolve akuzasaun Ministériu Públiku (MP) liu hosi Prokuradora Lídia Soares bá argidu Rui Pereira no Áureo José António Sávio, hosi krime Partisipasaun Ekonomia iha Negósiu no Falsifikasaun Dokumentus.
Argidu Rui Pereira dos Santos nu’udár eis Provedór PDHJ no argidu Aureo José António Sávio nu’udár, Eis Sekretáriu Ezekutivu Nasionál PDHJ.
Lee Mós: Presiza Kapasita Prokuradór Sira iha Área Investigasaun bá Kazu Korrupsaun
Perante julgamentu, Juiz Prosesu José Gonçalves deklara katak, faktu sira ne’ebé provadu maka, PDHJ hala’o duni konkursu Públiku ba suku farda funsionáriu PDHJ sira nian, nune’e iha loron 26 Novembru 2013, Eis Provedór PDHJ Rui Pereira dos Santos hala’o asina akordu ho kompaña Viverei Zelim’Ms Unipesoal, Lda bá fornesimentu farda ho $26.500.
Fornesimentu farda ba funsionáriu mane par rua no kada kuantidade kustu $230 bá ema 64 ho total $14.720.
Fornesimentu farda bá funsionáriu feto sei hetan mós farda ho kuantidade hanesan no kada par ho valór $221 ba ema na’in 42 ho total $9,282.
Fornesimentu farda bá formasaun hanesan jacket, kamiza, kalsa trainin ba ema na’in 106 ho totál osan $2.120.
Totál farda ba mane no feto inklui farda formasaun ho montante global $26.122 ho durasaun kontratu fulan ida hahú loron 25 fulan Novembru 2013 to’o 25 Dezembru 2013.
Iha loron 17 Dezembru 2013 kompaña Viverei Zelim’Ms Unipesoal, Lda aprezenta pedidu alterasaun kontratu ba modelu no kuantidade farda hodi aumenta presu hosi valor totál antes $26.122 ba fali $28.225.50 ne’ebé ho kategoria ba funsionáriu mane PDHJ sei hetan farda par rua ho aumentu presu kada ema $295 ho total valor $15.930 ba ema na’in 54, ba feto par rua hamenus ba unidade 37 ho aumentu presu kada farda ho valor $275 ho toál valor $10.175 ba ema na’in 73 no farda formasaun kada ema $20 hó total valor $2.120 ba ema funsionariu na’in 106 ne’ebé hetan aprovasaun hosi Argidu Rui Pereira dos Santos.
Iha loron 26 Novembru 2013, Áureo José António Savio solisita ba lojistika atu emite dokumentu resivamentu inspeksaun, maibé rejeita hosi responsável, tanba ne’e argidu fornese farda, maibé iha loron 28 Dezembru 2013 halo ona pagamentu ba kompañia ho montante $26.122.
Iha fulan Abril 2014 maka kompañia foin fornese farda ba PDHJ no distribui ba funsionáriu PDHJ maski loron hatama farda remata ona la tuir kontratu ne’ebé iha.
Maske nune’e, sei falta farda bá mane ho unidade 10 ne’ebé ekivale ba osan ho valor $2.300 no ba feto sei falta unidade 5 no ekivale ba osan ho montante $1.375.
Maski nune’e kompaña simu akuzasaun bazeia kontratu ho Governu atu fornese farda no ropa trainin ba funsionáriu na’in 212, maibé iha faktu hatudu kompañia falsifika invoice no fornese de’it kuantidade farda tuir deskrisaun ne’ebé kompañia iha, la tuir kontratu ne’ebé iha no kompañia mós husu tan adisionál ho valor $2.920 ne’ebé ikus mai hetan aprovasaun hosi argidu Rui Pereira dos Santos.
Alende ne’e, iha justifikasaun adisionál falsu ne’ebé aprezenta hosi argidu José António Sávio no funsionáriu na’in tolu seluk, maibé iha faktu simu tiha ona farda hamutuk ho funsionáriu seluk, maibé atu kompleta pagamentu restu ho montante $2.920, argidu Áureo José António Savio autoria valór refere iha CPV no deklara katak pagamentu refere adisionál iha kontratu.
Iha loron 7 Setembru 2015, inventa mós kontratu atu halo pagamentu kompañia ho valor $2.920, maibé atribui pagamentu ba de’it farda par 1, tanba ne’e kontratu refere apenas kompleta de’it prosedimentu hodi gasta osan Estadu bá benefisia argida Maria Eugenia Dias Quintas Monteiro nu’udár Diretora kompañia Viverei Zelim’Ms Unipesoal, Lda.
Nune’e, iha desizaun finál provadu katak, argidu na’in-rua aproveita poder ne’ebé iha hodi fó benefisiu ba ema seluk liu-liu iha prossesu fornesimentu farda ba funsionáriu PDHJ, bazeia ba konviksaun argidu sira nian inklui deklarasaun sasin sira.
Tanba ne’e, Ministériu Públiku akuza argidu na’in-rua prienxe elementu krime partisipasaun ekpnomia iha negósiu ho falsifikasaun dokumentu ne’ebé previstu iha artigu 299 no 303 iha Kódigu Penál Timor Leste.
Kondena mós argidu na’in-rua bá indiminizasaun sivil hodi fó fila prezuizu ne’ebé Estadu Sofre ho montante $9.390.
Ho akuzasaun hirak ne’e, Tribunál liu hosi Juiz Prezide José Gonçalves haree katak, argidu na’in-rua la komete hotu akuzasaun ne’ebé molok ne’e Ministériu Públiku akuza bá argidu na’in-rua, no argidu na’in-rua la fó prezuiju ba Estadu, tanba ne’e laiha obrigasaun ba argidu na’in-rua atu selu fali Estadu.
Audiénsia Julgamentu ne’e prezide hosi Juiz singulár José Gonçalves.
Jornalista: Gloria Maia