Hatutan.com, (28 Outubru 2023), Laclo-Komunidade Suku Lakumesak, Postu Administrativu Laclo, Munisípiu Manatuto, Sábadu, 28 fulan-Outubru 2023, hakbesik aan  bá sentru votasaun  hodi hili sira-nian lideransa suku atu serbí sira iha tinan-hitu (7) oin mai.

Lee Mós: Eleitór Suku Bahu La Kontente ho Mekanizmu Eleisaun Órgaun Suku

Sentru Votasaun Aldeia Readodok, Suku Lakumesak, Postu Administrativu Lacló, Munisípiu Manatuto. Foto/Rogério Pereira Cárceres

Prosesu eleisaun iha suku ne’ebé pertense bá area jurizdisaun Munisípiu Manatuto nian ne’e la’o ho pás, maibé eleitór sira kestiona maka’as prosesu eleisaun ho mekanizmu manual no piór liu tan kandidatu xefe aldeia sira nia narna iha bulletin votu hakerek ho liman de’it no la kontempla ho foto kandidatu xefe aldeia sira-nian.

Tarcízio Eldere dos Santos Oliveira, nu’udár abitante no eleitór ida hosi Aldeia Nacaleo hateten, eleisaun suku ne’e importante tebes duni, atu komunidade sira bá hili sira-nian lideransa suku hodi serbí tomak.

Tarcízio Eldere triste ho prosesu eleisaun suku ne’ebé oras ne’e la’o iha Aldeia Nacaleo, tanba preparasaun hosi ofisiál eleitorál sira STAE nian ladún másimu, no maioria utiliza de’it sistema manual.

“Ha’u sente la’o di’ak tebes, preparasaun ne’e mak ladún másimu, tanba uza sistema manual, ne’ebé hakerek fali ho liman. Ida fali, ami mós ladún satisfás ho kandidatu xefe aldeia sira, ninian, fotografia laiha. Entaun, ida ne’e, ida ne’e, difikulta tebes ferik ho katuas sira atu hili,” nia lamenta.

Tuir nia, eleisaun suku ne’e importante tebes bá komunidade, tanba sira mak sai matan-tilun komunidade nian, iha baze tanba ne’e mak komunidade sira ho entuziazmu ezerse sira-nia direitu votu livre no sekreta  hodi hili kandidatu  xefe suku sira.

“Ami nia esperansa mak ne’e, xefe suku foun ne’ebé mai, atu serBí ami komunidade hotu iha suku Lakumesak ida ne’e,” Tarcísio Eldere dos Santos Oliveira, hateten bá Hatutan.com iha sede Suku Lakumesak, Postu Administrativu Lacló, Munisípiu Manatuto.

Iha ámbitu  eleisaun órgaun suku 2023, Suku Lakumesak ho nia totál kandidatu hamutuk na’in-lima, kompostu hosi Angelina Correia Soares, Cipriano Correia Ximenes, Filomeno Rodriguês Pereira Cárceres, Januário Cárceres, no Sergio Raimundo Rodriguês Pereira.

Kandidatu Xefe Suku Angelina Correia Soares, ho númeru sorteiu 01 iha eleisaun suku tinan 2016, konsege kandidata mós ninia aan, maibé la konsege liu barreira.

Sentru Votasaun iha Aldeia Readodok, Suku Lakumesak, Postu Administrativu Lacló, Munisípiu Manatuto. Foto/Rogério Pereira Cárceres

Iha eleisaun suku tinan ne’e, kandidatu Xefe Suku, Cipriano Correia Ximenes, ho númeru sorteiu 02. Cipriano Correia, hanesan mós eis Xefe Suku Lakumesak, iha períodu 2004 to’o 2009. Iha 2016, kandidata aan tán hodi kompete iha eleisaun suku, infelizmente, labele manán, tanba votu la to’o.

Atuál Xefe Suku Lakumesak, Filomeno Rodriguês Pereira Cárceres, manán eleisaun suku iha 2016, no lidera durante tinan-hitu iha nia mandatu. Ohin, nia re-kandidatu ho númeru sorteiu 03. Kandidatu ida ne’e, konklui ninia estudu lisensiatura iha Departamentu Dezenvolvimentu Komunitáriu, Universidade Nasionál Timor-Lorosa’e (UNTL).

Kandidatu Xefe Suku Lakumesak, Januario Cárceres, ho númeru sorteiu 04, hanesan Alumni ka lisensiadu ida hosi Departamentu Agrikultura, Universidade da Paz (UNPAZ).

Sergio Raimundo Rodriguês Pereira, hanesan mós eis Xefe Suku Lakumesak nian iha periúdu 2009 to’o 2016. Iha 2016 kontinua kandidata nia aan, hodi konkore eleisaun suku iha tempu ne’ebá, maibe, rezultadu votasaun, hatudu derrota, tanba la liu barreira 50% +1.

Observasaun Hatutan.com iha Sede Aldeia Readodok, nota katak, iha dadeer tuku 07:00 to’o 07:30,  ofisiál eleitorál sira Sekretariadu Tékniku bá Administrasaun Eleitorál (STAE), hahú forma meza eleitorál asembleia aldeia nian.

Iha tuku 07:30 to’o 08:00 simu kandidatura sira, tuku 08:00 to’o 09:00, kandidatura sira aldeia nian, inklui delegadu ho delegadu sira hala’o kampaña iha sede aldeia ka sentru votasaun nian, hodi hato’o sira nian programa. No kada kandidatu ho másimu minutu-lima.

Hafoin kampaña, hahú tuku 09:00 dadeer to’o 15:00 lokraik, Otl, ofisial eleitorál sira taka ona sentru votasaun, no hahú kedas ona ho prosesu kontajen.

Iha Artigu 71, númeru 2, hosi Lei Númeru 9/2016, 08 jullu, ko’alia kona-bá Segunda Votasaun bá Eleisaun Xefe Suku nian. Katak, bainhira iha rezultadu votasaun dahuluk nian mak kandidatu ida nia votu válidu la atinje 50%+1, maka tenke hakat bá eleisaun volta daruak, ne’ebé tuir oráriu, sei akontese iha loron 13 fulan-Novembru tinan ne’e. Maibé, bá kandidatu sira Xefe Aldeia nian mak, rezultadu votasaun hatudu la manán maioria absoluta (50%+1), maka kandidatu sira ne’ebé hetan votu barak liu, iha loron ne’e kedas, tenke realiza kedas votasaun. Sé mak barak votu válidu barak liu, nia mak sei sai Xefe Aldeia.

Suku Lakumesak, kompostu hosi Aldeia Labubo, Hatu-Conan, Nacaleo, Tahagamo no Readodok. Totál populasaun 2814; mane 1428, feto 1207.

Jornalista: Rogério Pereira Cárceres