Hatutan.com (28 Outubru 2023), Díli– Idozu ho defisiénsia sira nu’udár eleitór iha Suku Akadiru-Hun, Postu Administrativu Nain Feto Munisípiu Díli, la bele ezerse sira-nia direitu votu iha eleisaun órgaun suku ne’e ho di’ak tanba sira la entende atu vita bá sira-nia xefe aldeia ho delegadu suku tanba bulletin votu la ajuda sira atu koñese sira-nia kandidatu xefe aldeia no delegadu suku sira.

Lee Mós: Abitante Suku Lakumesak Preokupa Bulletin Votu Kandidatu Xefe Aldeia Hakerek ho Liman no La Tau Foto

Sentru Votasaun Suku Akadiru-Hun, Postu Administrativu Na’in Feto, Munisípiu Díli. Foto/Zita Menezes

“Tuir loloos ne’e halo uluk sosializasaun bá komunidade, liuliu idozu ho defisiénsia sira  kona-bá mekanizmu eleisaun órgaun suku nian, inklui esplika bá públiku bulletin votu kandidatu xefe aldeia sira no kandidatu delegadu suku sira ne’ebé la uza foto no hakerek de’it ho liman (manual). Ha’u fiar katak maluk idozu sira ho   maluk defisiénsia sira, liuliu defisiénsia matan la vota ho bá sira-nia kandidatu xefe aldeia ho kandidatu konsellu suku sira,” João Paulo Quintino nu’udár abitante no eleitór hosi suku Akadiru-Hun haktuir bá Hatutan.com iha sede Suku Akadiru-Hun Sábadu (28/10/2023).

Ho lakuna sira-ne’e e Joaquin dos Santos rekomenda bá  Sekretaria Tékniku Administrasaun Eleitorál (STAE) atu hadi’a mekanizmu eleisaun órgaun suku nian, inklui hadia prosesu administrativa eleisaun nian. Nune’e bele fó biban bá timoroan hotu ne’ebé otas natoon atu vota  bele vota ho di’ak.

“Importante liu maka sistema dijitalizasaun ne’e presiza prepara antes, parte importane ida tán maka tuir loloos ne’e kandidatu sira ne’e antes semana ida komunidade hatene ona no bulletin sira ne’e tenke prepara tiha ona para to’o loron vota ne’e sira nian eskoilla iha tiha ona bá kandidatu hirak ne’ebé rejista ona iha bulletin votu,” João Paulo Quintino hateten.

Iha fatin hanesan Joaquin dos Santos nu’udár abitante ne’ebé partisipa iha eleisaun dórgaun suku Akadiru-Hun  lamenta ho mekanizmu no bulletin votu xefe aldeia no delegadu sira nian.

“Iha parte ida ita haree katak iha ita nian ferik no katuas balun ladún hatene hakerek no la hatene ee entaun presiza duni kandidatu sira nian foto, hanesan xefe suku sira nian ne’e tau kedan foto entaun avo sira bele haree no hatene hodi hili tanba sira koñese ona liuhosi foto. Nune’e mós buletin votu bá kandidatu xefe aldeia nian tenke kontempla mós ho foto,” Joaquin dos Santos propoin.

“Entaun liga ho kandidatu Xefe aldeia no delegadu sira ne’e avo sira labele vota tanba dalaruma sira vota, maibé vota naran de’it la tuir sira-nia opsaun ka sira-nia hakarak bá kandidatu xefe aldeia ida,” Joaquin dos Santos tenik.

Suku Akadiru-Hun iha aldeia tolu mak hanesan, Aldeia Bedic, Kulu-Hun de Baixo ho Nu’u Badac. Tuir dadus sensu populasaun 2015, total populasaun suku ne’ebé pertense iha Postu Administrativu Na’in Feto ne’e hamutuk 3174.  

Jornalista Estajiária : Zita Menezes