Hatutan.com, (28 Outubru 2023), Díli— Primeira vez akontese tanba eleisaun suku iha sentru votasaun eskola 5 Maiu, aldeia 30 Agostu, Suku Comoro, postu Administrativu Dom Aleixo, munisípiu Díli, iha tuku 15:00 otl, pessoál Sekretariadu Tékniku Administrasaun Eleitorál (STAE) orienta membru Polísia Nasionál Timor Leste (PNTL) destakadu hodi taka odamatan boot eskola nian atu sidadaun sira ne’ebé seidauk vota labele tama tanba oras liu tiha ona, maski realidade iha ema barak mak seidauk vota.

Sentru votasaun eskola 5 Maiu, aldeia 30 Agostu, Suku Comoro, postu Administrativu Dom Aleixo, munisípiu Díli, pessoal STAE taka portaun iha tuku 15:00 otl, maski sidadaun barak mak seidauk vota iha eleisaun suku 28 Outubru tinan 2023. Foto: Hatutan.com.

Situasaun ne’e halo sidadaun sira preokupa makas tanba konsidera eleisaun iha tinan ida-ne’e sistema  sabraut liu ho eleisaun sira ne’ebé liu ona.

Lee Mós: Eleitór Suku Bahu La Kontente ho Mekanizmu Eleisaun Órgaun Suku

Sidadaun Duarte Martins protesta tanba nia mai desde tuku 9:00 dadeer hodi forma no iha tuku 12:00  nia seidauk vota tanba forma naruk liu no ema barak loos. Tanba ne’e nia sente hamlaha, nune’e nia fila ba uma hodi han.

Advertisement

Iha 14:00 nia fila mai hodi vota maibé ema barak nafatin, no forma naruk. Tanba ne’e, nia atu bá forma maibé nia hamriik kleur sente kolen entaun nia la tama bá área eskola, nia hein iha liur de’it bainhira ema menus mak nia foin tama bá laran atu vota. Infelizmente iha tuku 15:00 otl, Pessoál STAE taka odamatan no bandu sidadaun sira atu tama ba área eskola nian hodi vota.

Pessoál STAE fó órden bá Polísia destakadu iha sentru votasaun ne’e atu taka portaun nune’e sira ne’ebé seidauk vota labele tama ona no admite de’it sira ne’ebé iha laran ona.

“Favór Polísia Taka odamatan ona atu nune’e ema labele tama mai ona, tanba oras liu ona. Agora ita atende de’it sira ne’ebé mak iha ona formatura. Favór kontorola odamatan atu sira iha liur labele tama mai ona. Sira hosi laran bele sai, maibé labele tama mai ona. Tanba ne’e órdem,” Pessoál STAE ida kaer hela mikrofone no aviza ho lian makaas hodi repete fila-fila.

Situasaun ne’e halo sidadaun Duarte Martins ne’ebé seidauk vota preokupa makas to’o diskute malu ho pessoál STAE inklui Polisia iha portaun tanba limita ninia direitu votu.

“Sistema ida ne’e sabraut loos. Diak liu imi para ona no lalika mai halo sosializasaun bebeik hodi konsiensiliza sidadaun hotu atu tenke bá vota. Tanba imi rasik mak bandu ami atu labele vota. Primeira vez pessoál STAE bandu sidadaun atu labele vota. Imi haree rasik ami sira iha liur sei barak mak seidauk vota. Agora imi taka ona odamatan ba ami ne’e,”  Duarte Martins preokupa.

Advertisement

Hatan bá kestaun ne’e, Pessoál STAE ne’ebé hamutuk ho Polisia hein odamatan dehan, parte tékniku sira ezekuta de’it órden no Lei. Tanba ne’e nia husu bá kualkér sidadaun ne’ebé hakarak reklama, tenke halo reklamasaun bá iha STAE nasionál.

“Favór ida, ami taka odamatan ne’e tanba ezekuta mandadu. Ami ezekuta Lei. Se mak hakarak reklama, favór bá reklama iha STAE,” pessoál STAE ne’e hateten bá Duarte Martins no mós bá sidadaun lubuk ida ne’ebé seidauk vota no hamriik hela iha liur.

Tuir Observasaun Jornalista Hatutan.com iha sentru votasaun ne’e katak, iha dadeer pessoál sira hosi STAE hahú halo atendimentu iha tuku 9:30 maski ema barak forma antes ona iha fatin ne’e.

Jornalista observa katak, sidadaun sira ne’ebé vota iha sentru votasaun ne’e barak, nune’e ema forma naruk desde dadeer to’o fali tuku hitu kalan.

Iha suku Comoro, kandidatu Xefe suku hamutuk na’in hitu.

Advertisement

Tuir observasaun Hatutan.com, atendimentu kleur tanba pessoál sira iha ema na’in rua de’it mak hakerek naran, no iha tuku 14:00 pessoál STAE husu tan ajuda bá eleitór sira ema na’in tolu mak ho voluntariamente ajuda hakerek.

Jornalista: Leca Leopoldina