Hatutan.com, (06 Novembru 2023), Díli—Provedoria dos Direitus Humanos no Justiça (PDHJ), husu bá Komisaun Revizaun Orsamentu (KRO) atu aumenta tán osan adisionál $996.000, atu bele kobre atividade no planu tinan 2024.

Provedór dos Direitos Humanos e Justiça, Virgílio da Silva Guterres ‘Lamukan’. Foto/Elio dos Santos da Costa

“Ohin turnu PDHJ iha aprezentasaun, husu adisionl $996.000, tamba atividade ne’ebé Provedória planeia bá tinan oin barak. Entaun, tetu orsamentu ne’ebé ami simu hosi Ministériu Finansas millaun $1.2. Ne’e la natón tanba ne’e husu tán adisionál bá atividade sira,” Provedór PDHJ, Virgílio da Silva Guterres hateten hafoin aprezenta programa no planu orsamentu iha Ministériu Finansas, Segunda (06/11/2023).

Lee Mós: PDHJ La Tolera Bainhira Identifíka Superiór Sira PCIC Fó Pistola bá Oan Hodi Treinu

Provedór hatutan, em prinsípiu Governu liu hosi komité revizaun orsamentu ninian hateten katak sira sei tetu atu haree tanba iha entidade barak no Ministériu barak mós husu adisionál.

“Primeiru-Ministru Kay Kay Rala Xanana Gusmão hateten katak, PDHJ nia servisu ne’e importante, liu-liu atu oinsa hasa’e konsiénsia entidade polisiál no komunidade públiku kona-bá direitu umanu ninian. Entaun, sei konsidera atu aprova adisionál ne’ebé PDHJ hato’o maibé Governu husu atu ami halo ezersísiu oitoan hodi muda programa sira iha laran liu-liu bá formasaun ne’e mak tenke aumenta,” nia subliña.

Ba tinan 2023, PDHJ hetan millaun $1.8 no PDHJ nia planu ne’e iha tinan 2024 hetan millaun $3, maibé depois simu tetu orsamentu ne’ebé iha ho millaun $ 1.2 de’it ho númeru ne’ebé mínimu, tanba ne’e  PDHJ husu ho montante ne’ebé mínimu depois  ezekusaun iha tinan oin mak sei determina planu sira bá 2025.

Programa prióridade ba tinan oin, PDHJ sei konsentra iha levantamentu no estudu sira ne’ebé relasiona ho direitus umanus, direitu públiku no ohin rona tán hanoin hosi Primeiru-Ministru, enkoraza atu PDHJ konsentra iha formasaun bá polísia no públiku, sidadaun sira, halo kooperasaun ho universidade sira oinsa sensibiliza ema atu respeita direitos humanus.

“Ida-ne’e sei sai konsiderasaun ida bá PDHJ atu haree ba oin liu-liu iha promosaun no prevensaun ne’e mak sei la’o makas,” nia hateten.

Jornalista: Vito Salvadór