Hatutan.com, (09 Novembru 2023), Díli- Prezidente Federasaun Futeból Timor-Leste (FFTL), Francisco Martins da Costa Pereira Jerónimo, informa iha tempu badak nia sei rezigna an hosi pozisaun Prezidente FFTL.

Lee Mós: Gregório Correia Rezigna Husi Kargu Sekretáriu Jerál FFTL

Atuál Prezidente FFTL, Francisco Martins da Costa Pereira Jerónimo hateten, nia parte sei husu rejignasaun no hein tempu oportuno atu anunsiu ba públiku.

Prezidente FFTL hamutuk ho reprezentante FIFA ho AFC iha workshop FFTL nian bá membru Asosiasaun Futeból sira-nian ne’ebé hala’o iha Xanana Sport Centre, Kinta (09/11/2023). Foto/Vito Salvadór

“Konserteza ha’u sei rejigna hosi Prezidente FFTL, ne’e la’ós ita atu halimar fali lae. Há’u mós diak liu rezigna, maibé sei hein tempu oportunu há’u atu hateten bá públiku,” Francisco Martins da Costa Pereira Jerónimo haktuir bá jornalista sira iha salaun Xanana Sport Centre, Díli, Kinta (09/11/2023).

Ministru Asuntu Parlamentár no Komunikasaun Sosiál (MAPKOM) iha VIII Governu Konstitusionál ne’e  argumenta katak rezigna hosi Prezidente FFTL atu fó fali oportunidade no dalan bá kongresu foun, eleisaun foun bá Prezidente Federasaun foun, atu nune’e ,bele mai ho mandatu foun ne’ebé dalaruma diak liu.

Aseita Ona Rezignasaun Sekretáriu Jerál FFTL

Prezidente FFTL, Francisco Martins da Costa Pereira Jerónimo, konfirma mós katak, karta rezignasaun hosi Sekretáriu Jerál FFTL submete ona no aprova kedas. Nune’e, iha ona nomeasaun bá Sekretáriu Jerál interino mak Frederico Martins ne’ebé antes ne’e asume hela responsabilidade hanesan adjuntu Sekretáriu Jerál FFTL.

“Nia (Gregório Correia-red) rezigna ona loos ona. Hanesan Sekretáriu Jerál, Gregório Correia husu ona atu rezigna an di’ak liután, duke  iha presaun seluk depois fó demisaun, ladún di’ak. Há’u ko’alia loos bá ita-boot sira, tamba kuandu ita servisu iha federasaun ida mak ita nia komunikasaun ladiak ona no ho asosiasaun membru sira mak konfronta bá malu de’it no iha konfuzaun naruk bá bebeik, hau hanoin tempu ona atu hatudu fuan boot, rezigna depois fó fali oportunidade bá seluk mai kontínua ba, naran katak ita-nia ligasaun ho FIFA no AFC mak labele kotu,” Francisco Martins da Costa Pereira Jerónimo hateten.

Sekretáriu Jerál FFTL sesante Gregório Correia submete karta rejignasaun ba komité Ezekutiva FFTL iha loron 25 fulan-Outubru 2023.

Jornalista: Vito Salvadór