Hatutan.com, (10 Novembru 2023), Díli-Membru ezekutivu sira iha Federasaun Futeból Timor-Leste (FFTL) rezigna an nab-naban hosi sira-nia kargu iha loron ikus atu hakat bá kongresu nasionál estraordináriu  FFTL. 

Lee Mós: Gregório Correia Rezigna Husi Kargu Sekretáriu Jerál FFTL

Prezidente Asosiasaun Futeból Suai (AFS), Augusto Henriques konversa hela ho Sekrétariu Jerál FFTL Interinu, Frederico Martins iha Otel Timor, Sesta (10/11/2023). Foto/Elio dos Santos da Costa.

Hahú hosi Sekretáriu Jerál FFTL, Gregório Correia ne’ebé submete ona nia karta pedidu rezignasaun bá Prezidente FFTL, Francisco Martins da Costa Pereira Jerónimo iha loron  25 fulan-Outubru 2023. Nune’e mós Sesta ohin (10/11/2023), Prezidente Asosiasaun Futeból Suai (AFS), Augusto Henriques deside rezigna husi nia kargu hanesan membru komité ezekutivu (Exco) FFTL.

Augusto Henriques deside rezigna aan  ho razaun laiha ona konfiansa hosi membru asosiasaun Futeból sira ne’ebé hamahan aan iha FFTL.

Karta rezignasaun Augusto Henriques nian Hatuta.com asesu mensiona katak hodi  hato’o bá prezidente FFTL katak nia  rezigna-an hosi pozisaun hanesan Membru Ezekutivu FFTL hahú husi loron  09 fulan-Novembru 2023, oras 00: 01 Otl.

Razaun hirak ne’ebé fundamenta Augusto Henriques  nia desizaun ne’e mak rezultadu Kongresu Annual 2023 FFTL nian ne’ebé akontese iha loron  01 fulan-Jullu 2023, membru Asosiasaun 16 husi total 21 membru, fó votu kontra bá relatóriu semester dahuluk atividade FFTL nian, inklui proposta no planu daruak husi tina 2023 nian.

Razaun hirak ne’e mak membru asosiasaun liu maioria la fó konfiansa ona bá prezidente no estrutura tomak FFTL inklui Augusto Henriques   hanesan membru Ezekutivu FFTL.

“Ha’u nia deskulpa ua’in bá hadomi na’in Futeból tomak, karik iha ha’u nia mandatu la’o la tuir promesa ne’ebé hato’o uainhira ha’u hetan konfiansa. Obrigadu bá kolaborasaun no servisu hamutuk durante ne’e, mellor kumprimentus,” Augusto Henriques haktuir iha nia karta rezignasaun ne’e.

Karta rezignasaun ne’e submete mós kopia bá iha Membru Ezekutivu FFTL, membru Asosiasaun Futeból Munisipiu 14, membru Asosiasaun Profisionál Sira (Feto, Futsal, Arbitrajen, Treinadór, Juvenil) no kampiaun Primeiru divizaun no segunda divizaun.

Tuir informasaun ne’ebé Hatutan.com asesu hosi fonte kredivel balun iha FFTL no Asosiasaun Futeból sira hateten posibilidade Komité Ezekutivu FFTL sira ne’ebé eleitu bá períodu 2022-2026 iha kongresu FFTL 2022,  hotu-hotu sei submete rezignasaun hodi avansa bá kongresu estraordináriu FFTL 2023.

Prezidente FFTL, Francisco Jerónimo rasik mós deklara ona katak iha tempu badak nia mós sei rezigna-an hosi kargu prezidente FFTL tanba la hetan ona konfiansa hosi asosiasaun futeból sira.

“Konserteza ha’u sei rezigna hosi Prezidente FFTL, ne’e la’ós ita atu halimar fali lae. Há’u mós di’ak liu rezigna, maibé sei hein tempu oportunu há’u atu hateten bá públiku,” Francisco Martins da Costa Pereira Jerónimo haktuir bá jornalista sira iha salaun Xanana Sport Centre, Díli, Kinta (09/11/2023).

Lee Mós: Francisco Jerónimo Sei Rezigna hosi Prezidente FFTL

Jornalista: Vito Salvadór