Hatutan.com, (20 Novembru 2023), Díli—Kompañia Woodside ne’ebé durante ne’e haree kona-bá asuntu mina nian, komprometidu servisu hamutuk nafatin ho Governu Timor-Leste (TL) hodi hala’o esplorasaun projetu minarai iha plantasaun Greater Sanrise.

CEO Woodside, Meg O’Neil hala’o enkontru ho Primeiru-Ministru, Kay Rala Xanana Gusmão, akompaña hosi Ministru Petroleo no Rekursu Minerais, Francisco Monteiro, iha Palásiu Governu, Díli, Segunda (20/11/2023). Foto: GPM.

Kompromisu ne’e hato’o hosi CEO Woodside, Meg O’Neil durante hala’o enkontru ho Primeiru-Ministru, Kay Rala Xanana Gusmão, akompaña hosi  Ministru Petroleo no Rekursu Minerais, Fransisco Monteiro, iha Palásiu Governu, Díli.

Lee Mós: Governu Sei Re-estabelese Negosiasaun ho Austrália Asegura Kadoras GSR Mai Timor-Leste

“Ohin mai hala’o ekontru ho Primeiru-Ministru, Xanana Gusmão hodi diskute kona-bá projetu Greater Sanrise no Primeiru-Ministru nia mensajen klaru oinsá servisu hamutuk dezenvolve Greater Sanrise, hodi fó benefísiu bá Timor-Leste,” Hatutan.com sita komunikadu (20/11/2023).

CEO Woodside, Meg O’Neil agradese bá Governu TL, tanba durante ne’e sempre servisu hamutuk hodi hametin kooperasaun ida ne’ebé di’ak liu bá interese nasionál.

“Kontinua servisu hamutuk hodi hametin kooperasaun no fiar bá malu ne’ebé paz hodi dezenvolve servisu ne’e,” nia afirma.

Durante enkontru, Xanana Gusmao informa, Timor-Leste no Austrália sei kontinua servisu hamutuk hodi dezenvolve projetu Greater Sanrise ne’ebé sei muda konseitu dezenvolvimentu rai rua ba futuru.

Ekontru amizade ne’e termina ho entrega prendas ba malu nu’udár sinál agradesimentu hodi hametin kooperasaun ba oin.

Iha loron 18 Setembru 2023, Primeiru Ministru hala’o enkontru ho Reprezentante espesiál Governu Austrália bá Negosiasaun no Dezenvolvimentu Greater Sunrise, Steve Bracks  informa  katak, Timor-Leste ho Austrália sei hakle’an iha diskusaun asuntu téknika fulan-juñu tinan 2024.

Austrália rekoñese projetu Greater Sunrise importante tebes bá povu no família Timor-Leste hotu. Austrália komprometidu servisu ho Timor- Leste oinsá dezenvolve projetu Greater Sunrise ne’e bá oin iha maneira  teknikamente viável no komersialmente.

TL ho Austrália sei hapara diverjénsia hotu-hotu iha pasadu, atu nune’e povu rua, Australianu no Timoroan, bele haree futuru relasoins iha konfiansa boot no respeitu mútuo ne’ebé boot liu.

Jornalista: Rogério Pereira Cárceres