Hatutan.com, (21 Novembru 2023), BAUCAU— Sentru Saúde Osso-Queli ne’ebé lokaliza iha suku Loi-Lobu, Postu Administrativu Vemasse, munisípiu Baucau daudaun ne’e enfrenta problema menus kama partus.

Sentru Saúde Osso-Queli ne’ebé lokaliza iha suku Loi-Lobu, Postu Administrativu Vemasse, munisípiu Baucau. Foto: Leopoldina de Carvalho.

Xefe Sentru Saúde Osso-Queli, Médiku Flaviano Verdiál hateten, atendimentu bá inan isin-rua atu partus, loron ida másimu ema na’in-lima maibé daudaun ne’e kama partus iha de’it rua.

Lee Mós: Postu Saúde Izoladu Haat iha Railaco Presiza Tebes Médiku

“Ita iha problema kona-bá kama partus no sala atendimentu. Iha ne’e sala maternidade ida de’it. Dala ruma pasiente baibain ho inan isin-rua uza hamutuk sala ida de’it. Entaun atu halo atendimentu susar,” Flaviano Verdiál hateten hafoin partisipa kampaña nasionál imunizasaun, iha Baucau, Tersa (21/11/2023).

Flaviano hateten dala ruma atendimentu bá inan isin-rua halo konsulta uza hamutuk sala observasaun jerál no situasaun ne’e hato’o ona bá Governo maibé seidauk iha asaun ruma.

Xefe Sentru Saúde Osso-Queli, Médiku Flaviano Verdiál. Foto: Leopoldina de Carvalho.

Kona-bá Rekursu umanu mós seidauk sufisiente tanba daudaun ne’e funsionáriu permanente na’in 11 kompostu hosi médiku permanente na’in-neen, enfermeiru na’in-tolu, parteitra na’in-rua, no hetan apoiu hosi kontratadu sira ne’ebé halo atendimentu oras 24 tuir idak-idak nia oráriu.

Dezafiu seluk ne’ebé Sentru Saúde ne’e hasoru maka kondutór ambulánsia laiha tanba kondutór ne’ebé antes ne’e servisu iha ne’e deside rejigna-an.

Situasaun ne’e prezudika transportasaun pasiente hosi Sentru Saúde mai HNGV tanba ambulánsia iha maibé konditór laiha.

Problema seluk maka ai-moruk antibiotik hanesan amoxilin daudaun ne’e menus inklui ho aimoruk atu substitui ai-moruk ne’e.

Ministra Saúde, Elía Amaral.

Kona-bá preokupasaun ne’e iha Kuarta 23 Novembru 2023, Jornalista Hatutan.com esforsu hodi halo konfirmasaun bá Ministra Saúde, Elía Amaral hateten problema ne’ebé Sentru Saúde sira enfrenta la’ós foun, maibé desde kedan Governu anteriór nia ukun.

“IX Governu simu ona preokupasaun hirak ne’e no sei responde neneik tuir tempu. Primeiru ami sei hasa’e rekursu umanu no fasilidsdes saúde sira ne’ebé sei sai preokupasaun. Ba oin sei haree di’ak liu tán bá preokupasaun sira seluk tán,” Elia Amaral hateten bá Hatutan.com hafoin partisipa serimónia posse bá Prezidente KFP, iha edifisiu Matadouro.

Kona-bá menus pessoál saúde iha Sentru Saúde sira iha área rurál Elia Amaral esplika, sei propoin bá iha orsamentu ne’ebé alokadu bá MS  hodi halo rekrutamentu bá pessoál saúde sira nune’e bele koloka bá Sentru Saúde sira ne’ebé mak presiza.

MS mós rejista katak, alende problema menus fasilidade no rekursu umanu, iha tán problema barak hanesan menus bee moos no seluk tán.

Daudaun ne’e MS prevee millaun $5-resin bá hadi’a infraestrutura no sei tau prioridade bá ida ne’ebé konsidera emerjénsia.

Jornalista: Leopoldina de Carvalho