Hatutan.com, (15 Dezembru 2023), Díli—Parlamentu Nasionál (PN) liuhosi votasaun Orsamentu Jerál Estadu (OJE) 2024 iha faze espesialidade, aprova $17.780.054 bá PN ho rezultadu a-Favor 45, kontra 3 no Abstensaun 18.

Parlamentu Nasionál (PN) halo votasaun bá espesialidade OJE 2024 alokadu bá Parlamentu nian, Kinta (14/12/2023). Foto: Tomé da Silva.

Iha votasaun ne’e mós deside hodi hasai osan subsídiu transporte bá deputadu sira iha proposta 12 ho rezultadu votasaun la pasa, iha ne’ebé a-favor 22, kontra 40 no abstensaun 2.

Lee Mós: Proposta OJE 2024 Billaun $1,95 Pasa Iha Jeneralidade

OJE-2024 ne’ebé Governu aloká bá Parlamentu Nasionál ho $17.780.054 ne’ebé aloká bá programa saláriu vensimentu $12.327.692, bens no servisu korrentes $3.510.201, transferénsia públika $665.350, kapitál menór $1.276.811, kapitál dezemvolvimentu zero (0).

“Ha’u proponente ko’alia bá povu Timor-Leste. Ha’u mai Parlamentu la’ós tanba karreta. Maibé, tanba fiar. Tanba lori hela povu lian la’ek sira nia lian mak ha’u mai iha ne’e. Tanba ne’e ha’u proponente lori proposta ida-ne’e retira orsamentu subsídiu bá deputadu sira,” deputadu bankada CNRT, Gabriel Soares hateten iha PN, Kinta (14/12/23).

Deputadu Gabriel Soares haktuir, subsídiu bá transporte ne’e bele aloka fali tuir justifikasaun ne’ebé maka iha.

“Deputadu balun bele la konkorda ho ha’u, maibé ha’u lakohi sai manusia bertopeng atu iha oin lakohi maibé iha kotuk sukit hela,” nia deklara.

Nune’e subsídiu transporte hasai, maibé aloká fali tuir justikasaun ne’ebé iha no deputadu ne’e lakohi osan ne’e aloka fali bá iha Ministériu seluk tanba Ministériu seluk osan iha no bem organizadu, iha programa feitu, planu feitu no orsamentu feitu.

Deputada bankada PLP, Maria Angelina Sarmento hateten, subsídiu transporte ne’e bele aloka fali bá iha Ministériu Saúde no Ministériu Agrikultura.

“Proposta 12 hasai saláriu vensimentu ne’ebé iha inkluí subsídiu transporte bá kada deputadu ho totál osan ne’ebé iha maka $9.811.188 iha verba saláriu vensimentu no ami propoin atu hasai de’it $1.248.000 espesifikamente iha subsídiu transporte bá deputadu sira. Oan ne’e ami planu atu reáloka bá fatin tolu mak hanesan $300.000 bá manutensaun karreta, restu ne’e ami hakarak aloká bá Ministériu Saúde iha programa saúde materna infantile,” nia hateten.

Proposta inisíu iha de’it $157.757.000 ne’e, aumenta tán $500.000, tanba saúde materna infantil ne’e presiza injensaun bá sira nia orsamentu, iha seluk fali Ministériu Agrikultura no Peskas aumentu Sustentável iha produsaun animal, aumenta iha atividade ida ne’ebé haki’ak bibi, karau bele produz fali susuben no manu lokál ho totál $448.000 ne’ebé Governu nia osan inisíu iha de’it $69.300 aumentu ida ne’e sa’e bá $500.017.300.

Prezidente Parlamentu Nasionál, Maria Fernanda Lay dehan, hasai subsídiu refere hodi aloka fali orsamentu bá iha manutensaun karreta nian.

“Hasai tiha subsídiu ne’e hodi tau fali bá manutensaun ne’ebé durante ne’e tau iha saláriu deputadu, nune’e apartir proximu anu la fó ona bá deputadu. Parlamentu Nasionál rasik mak sei halo manutensaun bá karreta sira ne’e hotu,” nia hateten.

Vise-Primeiru Ministru, Mariano Asanami Sabino haktuir, kona-bá orsamentu PN, Governu aloka tuir proposta ne’ebé PN submeter.

“Orsamentu ne’e Governu aloka tuir proposta Parlamentu nian no hosi PN maka defende orsamentu PN nian. Tanba ne’e, orsamentu ne’e ami aloka sé iha deputadu sira mak hanoin atu re-áloka ne’e problema Parlamentu nian. Governu laiha problema no ha’u bolu Ministériu Saúde no Ministériu Agrikultura atu ajusta bá sira nia programa,” Asanami hateten.

Jornalista Estajiária: Zita Menezes