Hatutan.com, (21 Dezembru 2023), Díli–  Matebian José Bernardo Soares nia inan  Regina de Jesus Sores, kontínua ezije no hein justisa ida justu bá nia oan nia mate iha sela polísia ho tali iha kakorok iha tinan 2022.

Lee Mós: Kazu José Bernardo Soares Mate iha Sela Polísia, Arguidu Deklara Laiha Koñesimentu

Aman ho inan hosi matebian José Bernardo Soares. Foto/Tome da Silva

Regina de Jesus Sores, nu’udár inan bá matebian José Bernardo Soares  triste ho saída maka akontese ona ba nia oan, maibé saída de’it maka akontese mós nia hatene katak, ninia oan José Bernardo Soares sei la fila ona bá nia inan nia hakuak tanba mate ho trájiku iha sela laran Polísia Munisípiu Díli nian.

“Ami la husu Polísia sira atu halo ami nia oan moris fali, maibé husu atu ami bele sente loloos justisa bá ami oan  José Bernardo soare  nia mate, ema ne’ebé maka hakotu nia vida, tenke sente saída maka nia halo, ami husu Justisa ne’e de’it, Justisa tenke la’o tuir duni nia dalan, se la iha Justisa ami la simu, atu ha’u nia oan sala ka la sala, tenke hatuur Justisa loloos,” Regina de Jesus Sores, hato’o bá Hatutan.com iha nia rezidénsia, Audian, Díli, Kinta (21/12/2023).

Nia hateten, bainhira Polísia sira mai foti matebian iha uma  atu ba halo identifikasaun hodi la’o tuir prosesu legal, bazeia bá sala ne’ebé maka karik matebian  envolve, maibé realidade bá too iha Polisia nia fatin ho de’it oras haat (4) nia hakotu iis ho tráfiku, tali iha kakorok, atu  hanesan ema oho tiha mak tara ho tali.

“Ami koopera tebes ho imi Ajente Polísia, hanoin imi atu salva nia, maibé realidade seluk, se imi polísia sira mai foti nia bá hatama iha sela para halo nia mate, ami la fó ami nia oan, maibé tanba ami koopera, ami hanoin bainhira ami nia oan iha ona polísia nia liman ne’e buat hotu ami garantia, ami laran metin, atu bele sai husi problema balun, maibé afinál, bà para ha’u nia oan mate iha sela laran, ne’e la justu, ne’e injustisa,” nia hato’o.

Maske nune’e, hanesan família no sidadaun Timor, nafatin la’o tuir dalan legal ne’ebé maka iha, kumpre lei atu bele hetan Justisa loloos ba matebian nia mate, tanba prosesu daudauk ne’e tama ona ba Tribunal Judisiál Primaria Instánsia Díli, nune’e hein de’it prosesu.

“Ami husu ba autoridade kompetente atu prosesa kazu ne’e ho lalais, no halo identifikasaun ka tenke halo investigasaun kle’an ba iha Ajente Polísia ne’ebé maka momentu ne’e hein hela sela, tanba nia maka hatene hotu, tanba nia maka hein, ami husu ida ne’e de’it,” nia afirma.

Maske nune’e, inan husi matebian ne’e konsidera, Eis Komandante PNTL Munisípiu Díli atuál Komandante Jerál PNTL, Komisáriu Henrique da Costa, hala’o nia funsaun la loos tanba, bainhira matebian rona katak mate ona ho tali iha sela laran, Komandante ne’e la organiza membru polísia sira mai hato’o diretamente ba família, maibé família rona de’it kontaktu katak, matebian mate ona tula hela iha meza leten.

Matebian José Bernardo Soares nia inan durante ne’e husu ona advokasia Justisa bá Prezidente Repúblika, Parlamentu Nasionál, Governu liu husi Primeiru-Ministru, maibé to’o ohin loron laiha rezultadu.

Iha Kuarta (20/12/2023), Tribunál Judisiál Primaria Instánsia Díli (TJPID) arguidu ho inisiál AAM hato’o ba Tribunál katak, nia laiha koñesimentu bá matebian nia mate no halo identifikasaun iha uma hafoin ho ninia kolega sira tula bá Komandu Polísia Nasionál Díli ho Karreta Hilux.

Jornalista: Gloria Maia