Hatutan.com, (22 Dezembru 2023), Díli—Parlamentu Nasionál (PN) liuhosi votasaun finál globál bá projetu lei númeru 4/VI(1a) terseira alterasaun Lei nú 5/2004, 5 de Maio, Estatutu deputadu sira, ho rezultadu votasaun a-favór 39, kontra zero (0) no abstensaun 18, iha ne’ebé elimina de’it maka subsídiu bá transporte no aprova subsídiu bá saúde bá deputadu sira.

Parlamentu Nasionál (PN) halo votasaun bá espesialidade OJE 2024 alokadu bá Parlamentu nian, Kinta (14/12/2023). Foto: Tomé da Silva.

Objetivu hosi alterasaun ne’e atu armoniza kondizaun balun ne’ebé kria tiha ona iha Parlamentu Nasionál, atu bele kondisiona ho kondisaun sira ne’ebé iha ona relasiona ho deputadu sira.

Lee Mós: Tinan Lima Gasta Millaun $8-resin bá De’it Subsídiu Saúde-Transporte Deputadu Sira, FONGTIL Mobiliza Petisaun Públiku

“Kinta lejislatura iha fulan Janeiru tinan ne’e halo mós alterasaun bá estatutu deputadu sira, maibé halo mós estatutu bá funsionáriu PN. Lei alterasaun bá organizasaun administrasaun PN maka iha mós estatutu ida ko’alia kona-bá deputadu sira atu halo sira nia servisu ho kondisaun di’ak no mós presiza apoiu tékniku,” Prezidente Komisaun A trata assuntu Lejizlasaun no Justisa, deputadu Patrocínio Fernandes hateten iha PN, Sesta (22/12/23).

Nia dehan, iha artigu ida-ne’e ko’alia kona-bá rekrutamentu, infelizmente iha artigu ida-ne’e ko’alia kona-bá rekrutamentu Apoiu tékniku sira ne’e iha futuru orsamentu.

Kinta lejislatura rasik aprova tiha ona resoluzaun atu halo rekrutamentu, depois tinan 2024, tanba ne’e mak ajusta de’it resoluzaun ida-ne’e atu armonizá de’it situasaun sira ne’e atu iha kondisaun hodi labele prezudika rezolusaun PN ne’ebé aprova tiha ona.

Iha diskusaun espesialidade, Komisaun A halo proposta hodi elimina tiha subsídiu transporte no akizasaun bá deputadu sira

“Ha’u fiar katak imi esklaresidu bá públiku katak altersaun Lei estatutu bá deputadu sira laiha intensaun negativa bá Estadu, laiha intensaun atu habokur aan bá deputadu sira no laiha intensaun atu loke dalan bá deputadu sira atu halo korrupsaun, laiha intensaun atu na’ok povu nia osan. Norma organizasaun iha fatin hotu-hotu tenke regula ho estatutu,” nia hateten.

Iha aprovasaun bá Projetu Lei ne’e deskreve katak, subsídiu saúde bá deputadu sira kada fulan $600 ne’e mantein no elimina de’it maka subsidiu bá transporte.

“Subsídiu saúde ne’e la elimina tanba ne’e la’ós buat foun ida ne’ebé foin introdus. Ne’e buat ne’ebé hotu-hotu, funsionáriu membru Governu, Prezidente Repúblika, juíz sira hotu-hotu hetan subsídiu ida bá manutensaun saúde ne’e,” Patrocinio Fernandes hateten.

Jornalista Estajiária: Zita Menezes