Hatutan.com, (26 Dezembru 2023), Díli—Durante misa kalan Natal (24/12) iha Basilika São Pedro Vatikanu, Papa Francisco nu’udár líder másimu sarani Katólika iha mundu, haklaken lia-fuan Dame no Pás bá mundu tomak.

Papa Francisco prezide misa kalan Natal iha Basilica São Pedro Vatikana iha 24 Dezembru 2023. (Tiziana FABI/AFP).

Misa ne’ebé hetan transmisaun direta hosi média ofisiál Vatikana nian, deskreve katak, Papa Francisco rasik mak prezide no partisipa hosi sarani Katólika na’in 6.000-resin.

Lee Mós: Natál 2022, Tempu Atu Halo Solidariedade bá Malu

Iha deskrisaun ne’e mós hateten katak, Papa Francisco hato’o lia-fuan dame ne’e tanba funu iha fatin fatin liuliu iha área Gaza durante tempu naruk no to’o ohin loron sei kontinua, nune’e iha misa dame nian ne’e hahú ho aktu kontrisaun nian hodi hakribi uluk salan no husu perdaun.

Papa Francisco haree katak, funu iha mundu sorin ne’ebá ne’ebé to’o agora seidauk remata, hakohi tiha Jesus nia moris ne’ebé lori dame mai mundu.

“Situasaun kalan ne’e ita hamutuk hodi simu Jesus maksoin, maibé situasaun funu to’o ohin loron ne’ebé laiha folin, impede netik Maromak Nia oan hodi la hetan fatin iha mudnu rai klaran,” Hatutan.com sita reflesaun Papa Francisco ne’ebé publika hosiVatican News.

Papa Francisco mós harohan bá Maromak no husu atu halo sarani sira sai hanesan Maria, José no mós bibi atan sira inklui liurai na’in tolu ne’ebé halibur-malu iha Maromak nia oin hodi hahí no hana’i no bele sai hanesan sasin bá mundu kona-bá Maromak Nia domin no laran luak.

Iha Misa loron (25/12), Papa Francisco hato’o mós mensajen no orasaun bensaun Natal nian 2023 “Urbi et Orbi” ba mundu tomak.

Hatutan.com mós sita publikasaun Al Jazeera  nian ne’ebé dehan katak, mensajen Papa Francisco nian iha Misa kalan Natal tanba iha oras balun antes Primeiru Ministru Israel, Benjamin Netanyahu deklara atu halo atake funu hasoru zona enclave Gaza iha Palestina.

Durante funu, hahú iha 07 Otubru tinan ne’e, Papa Francisco hato’o ona proposta lubuk ida atu hapara funu perante konflitu iha Gaza inklui fó liberdade bá ema sira ne’ebé mak iha hela prizaun laran.

Tanba sidade kiik Belem ne’ebé koñesidu hanesan sidade ida ne’ebé Jesus Nia moris fatin, sai tiha fatin bá funu nian iha ne’ebé forsa funu na’in sira okupa tiha parte norte sidade ne’e to’o ohin loron.

Sidade ne’e impede no kansela tiha serimonia ka selebrasaun Natal tinan ne’e nian, selebrasaun ne’ebé sempre atrai atensaun mundu nian tanba ninia furak no kmanek.

Iha sentru sidade Belem, Palestinianu sira hatuur Bandeira boot ida ho plaka boot ida no hakerek liafuan, “Sinu Belem lian ona atu funu hahú ona iha Gaza.”

Iha publikasaun Al Jazeera  mós sita deklarasaun Ministru Turizmu Palestina, Rula Maayah katak, Belem selebra Natal iha tristeza nia laran tanba situasaun ne’ebé akontese iha Gaza no mós iha área norte tomak Palestina nian.

Tuir dadus hosi Ministériu Saúde Palestina katak, iha ona vítima ne’ebé mate iha fatin ne’e hamutuk ema na’in 20.424, maioria feto ho labarik desde funu iha fatin ne’e*