Hatutan.com, (08 Janeiru 2024), Díli—Parlamentu Nasionál (PN) liuhosi deputada bankada FRETILIN  Sancha Paixaõ Bano levanta preokupasaun povu atoni, tanba ekipa téknika Negosiasaun Fronteira Terrestre TL-RI konklui ona servisu liuliu rezolve ona segmentu naun-rezolvidu entre TL ho RI hodi avansa bá asinatira akordu finál, maibé rai hektares 200 hosi suku Bene-Ufe, Sub Rejiaun Nitibe, Rejiaun Administrativa Espesiál Oecusse Ambeno (RAEOA) tama bá área Indonézia nian.

Mapa Rejiaun Administrativa Espesial Oecusse Ambeno (RAEOA). Foto: google map.

Intervensaun iha plenária, Sancha Paixaõ Bano hato’o katak, preokupasaun boot tebes mai hosi povu atoni, liuliu sira ne’ebé iha suku Bene-Ufe, Sub Rejiaun Nitibé lamenta tebes ho ekipa Téknika Negosisaun Fronteira Terrestre Timor-Leste no Indonézia ne’ebé mak hatama estaka liu iha parte Timor-Leste nian kilo rua ka hektares 200 hosi estaka anteriór.

Lee Mós: Xanana Agradese Ekipa RI-TL Ne’ebé ho Sakrifísiu  Finaliza Markasaun Fronteira Terrestre

“Iha biban ida-ne’e ha’u hakarak husu IX Governu atu haree didi’ak no halo esplikasaun kle’an tebes bá povu atoni antes Fronteira Timor-Leste no Indonézia asina akordu refere,” Sancha Paixaõ Bano hateten iha plenária, Segunda (08/01/24).

Deputada ne’e mós simu lamentasaun povu iha suku ne’e katak, komunidade ninia natar no toos, inklui área protejidu iha fatin ida naran Tepa-naek mós tama hotu bá área Indonézia nian.

“Tanba saida mak ita la mantein de’it tuir Fronteira ne’ebé mak agora daudaun iha ona, hanesan estaka ne’ebé iha ona no ita la presiza muda tuun sa’e estaka hodi lakon rai hektares ne’ebé barak tebes,” nia preokupa.

Tanba ne’e, nia husu bá Vise Ministru Assuntu Parlamentár atu haree preokupasaun ne’ebé relata ona no husu mós bá komisaun B Parlamentu Nasionál nian ne’ebé toma konta bá ida-ne’e hodi halo fiskalizasaun molok asina akordu ne’e.

Iha fatin hanesan, Vise-Ministru Assuntu Parlamentár, Adérito da Costa Hugo hatán katak, Governu foin mak rona informasaun ne’e no Governu seidauk hatene loloos situasaun iha terenu, maibé tuir nia katak, iha últimu anu Governu Indonézia ho Timor-Leste nia nívél tékniku sira iha ona faze final bá fronteira terestre.

“Entaun ho kontekstu ida-ne’e  ami sei buka took verasidade iha terenu nune’e ami rejista ona no ami sei haree maibé hakarak hateten katak iha nível tékniku Fronteira Indonézia no Timor-Leste laiha problema. Maibé, iha faktus balun hanesan deputada hateten, ami sei tun terenu hodi haree,” Adérito da Costa Hugo hateten.

Antes ne’e Hatutan.com halo duni konfirmasaun ho autoridade lokál sira iha área fronteira sub rejiaun Nítibe no mós ekipa tékniku Atoni oan ne’ebé hola parte mós iha prossesu markasaun Fonteira ne’e, maibé rejeita atu fó komentáriu tanba konsidera assuntu ne’e sensitivu liu no Xefe Ekipa Téknika Negosiasaun Fronteira Terrestre bá Segmentu Naun-Rezolvidu TL-RI, Embaixadór Roberto Soares mak iha liu kompeténsia atu ko’alia.

Nun’e, Hatutan.com mós esforsu hela atu halo konfirmasaun ho Roberto Soares kona-bá preokupasaun ne’e maibé seidauk disponível.

Antes ne’e, Primeiru-Ministru (PM), Kay Rala Xanana Gusmão hato’o ona apressiasaun boot bá ekipa Téknika Negosiasaun Fronteira Terrestre Indonézia (RI) no Timor-Leste (TL), ne’ebé lori tempu hodi finaliza ona servisu segmentu naun-rezolvidu Noel Besi-Citrana iha fronteira terrestre iha Oe-Cusse no Indonézia.

Jornalista Estajiária: Zita Menezes