Hatutan.com, (10 Janeiru 2024), Díli- Kongresu Estraordináriu Federasaun Futeból Timor-Leste (FFTL) bá da-IX, Kuarta (10/01/2024), ne’ebé hala’o iha Otél Timor, Díli, falla tanba parte sira kongresista  konsidera Komité Eleitorál inkapasidade no la prudente iha foti  desizaun.

Lee Mós: Assosiasaun Futeból 13 Deklara Apoia Kalbuadi bá Prezidente FFTL, Ezije Gregório Correia Rejigna-an Hosi Sekretáriu Jerál

Kongresu FFTL falla no adia ba loron seluk. Foto/Elio dos Santos da Costa

Ho akontesimentu iha kongresu Estraordináriu FFTL nian ne’ebé hatudu Komité Eleitorál FFTL la prudente ho desizaun durante kongresu ne’e, Hatutan.com tenta halo kedas konfirmasaun ho parte Komité Eleitorál FFTL, maibé rejeita fó komentáriu no hili dalan nonook.

Durante kongresu Estraordináriu FFTL nian ne’ebé hahú iha tuku 10:00 dadeer Otl, dirije direita hosi Prezidente interinu FFTL Tenente-Jenerál Domingos Raul Falur Rate Laek no Sekretáriu Jerál FFTL Gregório Correia hamutuk ho ezekutivu sira FFTL no Prezidente  sira husi Asosiasaun Futeból no Asosiasaun profisionál sira ne’ebé hanesan delegadu bá kongresu estraordináriu FFTL ne’e halo uluk apresiasaun ba ata sira kongresu nian no aprova mós relatóriu sira FFTL nian.

Hafoin aprovasaun, Prezidente interinu FFTL konvida Komité Eleitorál FFTL atu halo esplikasaun kona-bá lala’ok sira bá votasaun no iha momentu ida ne’e kedas mosu dezentendimentu entre Asosiasaun Futeból no Asosiasaun profisionál sira kona-bá direitu de votu iha kongresu estraordináriu FFTL nian bá da-IX ne’e.

Iha dezentendimentu ne’e Asosiasaun Futeból sira balun defende atu direitu de votu ne’e depozita bá Prezidente Asosiasaun sira bazeia bá Estatutu FFTL Artigu 26 no estatutu kada Asosiasaun Futeból no Asosiasaun profisionál sira nian ne’ebé iha, maibé kubu seluk nafatin defende direitu  votu ne’ebé Komité Ezekutivu liu husi komité Eleitorál FFTL atribui bá delegadu sira husi kada Asosiasaun bazeia bá razaun ne’ebé iha.

Dezentendimentu ida ne’e kontinua la’o bá oin no parte hotu ne’ebé envolve ativu halo diskusaun manas no ikus mai Prezidente interinu FFTL hola desizaun hodi husu atu Asosiasaun sira ne’ebé iha disputa kontinua halo konsulta bá malu atu hetan solusaun liuliu asosiasaun Futeból Viqueque, Ainaro no Arbitrajen no ikus liu Asosiasaun Viqueque no Arbitrajen deside sei la ba vota tanba laiha konsensu nune’e mós ho Ainaro.

Ho konsensu ne’ebé iha ikus mai komité Eleitorál FFTL hamosu hikas dezentendimentu hodi muda sira-nia desizaun no halo desizaun hodi afavór bá rekursu ne’ebé komité rekursu iha hodi atribui direitu de votu ba Prezidente asosiasaun Arbitrajen, Viqueque no Ainaro.

Nilton Gusmão deklara rejigna an hosi nia kandidatura bá prezidente FFTL. Foto/Elio dos Satos da Costa

Desizaun ne’ebé komité Eleitorál FFTL halo ne’e hatudu sira la prudente iha desizaun no hamosu konflitu  interesse foun ne’ebé ikus mai halo asosiasaun sira halo asaun no hakilar deskonfia máfia iha Futeból no kandidatu Nilton Gusmão deside rezigna an hosi nia kandidatura.

Nilton Gusmão hateten, diskusaun manas tebetebes, hatudu dinámiku ida di’ak, no atu hamosu dezentendimentu. ko’alia família Futeból mais  bosok de’it.  Hakarak dezenvolve Futeból mais  la hatene atu defende buat ne’ebé atu ba iha ne’ebé.

“Kongresu ida-ne’e nia kredibilidade la iha tiha ona, ohin hanesan ne’e, hanesan ne’ebá no bá han tiha mai oin-seluk no hanesan kandidatu há’u la konkorda atu konkorre iha eleisaun ida ne’ebé laiha kredibilidade, tan ne’e há’u deside atu rezigna  husi há’u nia kandidatura bá prezidente FFTL,” Nilton Gusmão afirma iha kogresu laran.

Hafoin rejignasaun ne’e apoiantes sira husi parte Nilton Gusmão nian hakilar ho luan makas Máfia, Máfia no Máfia.

Hafoin mosu asaun protestu husi kubu apoiantes Nilton Gusmão nian, Prezidente interinu FFTL Tenente-Jenerál Domingos Raul Falur Rate Laek, husu deskulpa bá desizaun ne’ebé komité Eleitorál FFTL halo no ho situasaun dezentendimentu ida-ne’e obriga nia atu halo desizaun ne’ebé sei la satisfás ba hotu-hotu nia hakarak maibé tenke halo.

“Ita nia kongresu adia tiha, altera tiha no ba kongresu tuir mai ne’e FIFA la tau osan ona no sira ne’ebé interesadu atu halo kongresu ne’e mak tau osan. Ne’ebé atu dehan de’it katak kongresu ohin ne’e adia bá tempu tuir mai,” Tenente-Jenerál Domingos Raul Falur Rate Laek nu’udar prezidente interinu FFTL deklara.

Falur Rate Laek hatutan Komité Eleitorál nia desizaun halo  ulun moras uitoan, ba oin ne’e atu oinsá, sira ne’e atu troka ka oinsá, maibé sira sei troka hotu, sei ko’alia ho ezekutivu para haree ida-ne’e.

Nia afirma sei halo reuniaun ho ezekutivu FFTL nian para bele halo deliberasaun bá kongresu tuir mai mezmu triste tanba kongresu, adia, la’ós triste de’it maibé laran dodok mós.

Dezententimentu iha kongresu FFTL. Foto/Elio dos Santos da Costa

“Lori FFTL nia naran hato’o mos deskulpa bá parte hotu iha kongresu estraordináriu FFTL nian, bá observadór sira husi FIFA, AFC no AFF tamba kongresu ida ne’e adia,” Falur Rate Laek hateten.

Parte seluk Prezidente Asosiasaun Futeból Díli Oeste Ipolito Soares mós husu deskulpa bá públiku tomak liu-liu bá  jogador sira,  ba klube no hadomi na’in futeból sira.

Nia afirma kanselamentu ba kongresu FFTL ne’e tanba inkonsisténsia husi komité Eleitorál FFTL ne’ebé desizaun la serteza no muda bá mai halo kongresu ne’e tenke kansela.

“Ita iha meius nafatin atu iha loron-60 nia laran bele halo fali kongresu foun tuir regra FIFA no AFC nian katak tenke liu husi zero fali, katak hatama kandidatu foun no rejistrasaun foun no finansia husi ita rasik,” Ipolito Soares esplika.

Nia hatutan atu hakat ba kongresu FFTL tuir mai ne’ebé sei finansia husi Asosiasaun Futeból sira nia prontu kolabora hanesan mós Prezidente Asosiasaun Futeból Díli Oeste no mós hanesan Prezidente Klube Futeból primeira divizaun Assalam FC.

Observasaun Hatutan.com iha fatin kongresu FFTL nian ne’e  nota amantes hadomi Futeból iha Timor-Leste no Prezidente Klube Futeból sira tantu futebol 11 no Futsal sente triste ho kanselamentu bá kongresu estraordináriu FFTL nian ba da-IX ne’ebé atu hili Prezidente FFTL foun bá Períodu 2024-2026.

Jornalista: Vito Salvadór