Hatutan.com, (12 Janeiru 2024), Manufahi— Problema prinsipál iha postu administrativu Turiscai, munisípiu Manufahi maka estrada.

Kondisaun estrada aat tebes iha tempu udan, iha postu administrative Turiscai, munisipiu Manufahi, Kinta (11/01/2024). Foto: Tomé da Silva.

Komunidade Suku Manumera, Turiscai, Moises Barbosa espressa sentimentu triste tanba durante tinan barak nia laran, komunidade iha Proklamadór Unilaterál Independénsia Francisco Xavier do Amaral ninia rai moris fatin seidauk assesu bá estrada ho di’ak.

Lee Mós: Projetu Dada Eletrisidade iha Manufahi ho Kustu $446,000 Paradu

“Bainhira udan ami terus liu. Karreta mai la di’ak tanba estrada la di’ak. Proklamadór Francisco Xavier do Amaral nia rain rasik maka ne’e,” Moises Barbosa hateten bá Hatutan.com iha Kinta (11/01/2024).

Lori komunidade Turiscai nia naran, Moises husu bá Governu atu tau atensaun liu mak estrada mai postu administrativu ida-ne’e.

“Labele promete de’it tanba ami lakohi promessa. Ami hakarak mak realidade. Realidade maka ne’e, hadi’a ami nia estrada atua mi bele la’o ba mai buka moris,” nia husu.

Iha fatin hanesan Administradór Interinu Postu Administrativu Turiscai, Joni dos Reis hateten, estrada sai problema bo’ot liu bá postu administrativu ne’e hahú kedan dalan ligasaun entre Maubisse mai Turiscai no hosi Turiscai bá kapitál Manufahi, liu bá Manatuto.

Tanba ne’e, nia iha esperansa katak, IX Governu Konstitusionál sei tau matan duni tanba postu administrativu ne’e hanesan sentru movimentu entre munisípiu sira ne’ebé temi iha leten.

“Ami iha nee susar tebes iha tempu udan. Iha tempu udan, komunidade iha produtu barak ne’ebé hakarak tebes atu lori bá fa’an iha kapitál maibé estrada la’o la di’ak. Karreta la mai. Ami hein katak, Governu ida ne’e sei haree hetan ami nia halerik,” nia husu.

Jornalista: Tome da Silva