Hatutan.com, (12 Janeiru 2024), Díli—Komisaun F Parlamentu Nasional (PN) trata assuntu Saúde, Seguransa Sosiál no Igualdade Jéneru kontinua prokupa ho sistema atendimentu iha Hospital Nasionál Guido Valadares (HNGV) no husu bá jerente sira atu hadi’a di’ak liu tán iha futuru.

Komisaun F hala’o fiskalizasaun direta iha Hospitál Nasionál Guido Valadares (HNGV) Kinta (11/01/2024). Foto: Leopoldina de Carvalho.

Komisaun F hato’o preokupasaun ne’e bainhira hala’o fiskalizasaun direta iha ospitál ne’e iha Kinta (11/01/2024).

Lee Mós: Governu Tenke Investe Iha HNGV Atu Bele Sai Ospitál Modernu

Deputada Maria Tereza da Silva Gusmão hateten, mDoutor no enfermeirmédiku sira presiza haree didi’ak atendimentu iha ospitál nasionál ne’e no tenke halo akompañamentu bá estudante estajiadu sira, antes husik sira halo atendimentu bá pasiente.

Deputada husu ne’e tanba iha fulan hirak liu bá nia mai iha HNGV hasai ran, daun ne’e hatama iha nia liman to’o bubu aas kuaze semana 3.

“Sala emerjénsia ne’e hanesan sala ne’ebé halo atendimentu ho emerjénsia, nune’e ninia natureza ne’e ho emosaun mak barak,” nia hateten.

Komisaun F mós preokupa ho númeru pasiente ne’ebé mate barak iha tuku 01:00 to’o 08:00 dader iha HNGV.

Preokupasaun ne’e tanba Komisaun mós simu informasaun hosi pasiente sira katak, pasiente barak mak mate duni iha dader tanba abandonadu hosi médiku sira.

“Ha’u rasik sai sasin bainhira ha’u nia família mate iha madrugada ha’u mai, haree ema mate na’in 4 ka 5 iha ne’e,” Maria Tereza Gusmão hateten.

Pasiente fase-raan sira halerik iha HNGV. Foto/Hatutan.com

Hatán bá preokupasaun ne’e Xefe Departementu Emerjénsia, Eldegar Lopes hateten, estudante estajiadu sira nu’udár rekursu ne’ebé presiza prepara ho di’ak bá futuru.

Tanba ne’e, HNGV sai ospitál dosente atu hadi’a, hanorin malu, guia estudante sira, eduka sira oinsa mak halo servisu ho di’ak.

Tanba ne’e, Eldegar Lopes husu bá deputadu sira atu labele kestiona de’it maibé apoiu mós doutór no enfermeiru sira hodi bele tulun estudante estajiádu sira.

Alende ne’e, Diretora Servisu Enfarmajen, Maximiana Libania Sagrada Ferrão rekoñese katak, failansu hirak ne’e la’ós foin mak akontese maibé iha buat barak mak akontese antes ona, maibé parteira, enfermeiru, tékniku aliadu sira ne’ebé servisu iha HNGV ne’e servisu duni ho vokasaun no profisionál.

“Ami nia oráriu ne’e prontu oras 24 nunka halo mamuk ospitál ida-ne’e. Karik, fallansu iha atendimentu ruma, ba oin ami sei koko atu hadi’a di’ak liu tán,” nia hateten.

Totál rekursu umanu permanente iha HNGV hamutuk 910, kontratadu hamutuk 343. Númeru ne’e kompostu hosi médiku jerál, espesialista, enfermeiru, tékniku aliadu, asistente enfermeiru, cleaning service, seguransa no tékniku admistrasaun.

Jornalista: Leopoldina de Carvalho