Hatutan.com, (08 Fevereiru 2024), Covalima-IX Governu Konstitusionál liuhosi Ministériu Petróleu no Minerais (MPRM) kontínua halo sosializasaun kona-bá dezenvolvimentu projetu supply base iha Kosta Súl.

Lee Mós: Komunidade Viqueque Entrega Rai Dezignadu Planta LNG ba Governu

MPRM Francisco da Costa Monteiro halo vizita servisu iha Munisípiu Covalima, Kinta (08/02/2024). Foto/Rogério Pereira Cárceres

Projetu Tasi-Mane, liu-liu iha Suai-Covalima iha ona projetus lubuk ida maka Governu ida ne’e tau hanesan prioridade. Nune’e, liuhosi sosializasaun kona-bá Projetu Supply Base iha Munisípiu Covalima, Kinta (08/02/2024), Ministru Petróleu no Minerais (MPRM), Francisco da Costa Monteiro ho nia ekipa  hodi fahe informasaun relevante sira kona-bá dezenvolvimentu kosta súl, hahú hosi Suai.

“Iha Suai projetus lubuk ida ne’ebé maka IX Governu konstitusionál tau hanesan prioridade no define mós iha planu no programa, no polítikas iha MPRM nian,” Ministru Francisco Monteiro, hateten iha ámbitu  sosializasaun ne’ebé hala’o iha Salaun Administrasaun Munisípiu Covalima.

Sai ona segredu públiku katak, Suai Supply Base hanesan parte ida importante tebes iha planu no vizaun dezenvolvimentu setór petróleu Timor-Leste nian, liu-liu hanesan atu halo industrializasaun bá setór petróleu nian.

Hosi Suai Supply Base ne’e, iha mós fasilidades komplementár balu ne’ebé  bele apoiu, maka hanesan Aeroportu Internasionál Kay Rala Xanana Gusmão, iha Suku Matai, Postu Administrativu Suai, ne’ebé mak uluk harii tiha ona, uza oitoan, mais, gGvernu ida ne’e liuhosi MPRM presija intensifika liu tán nia utilizasaun ne’e.

Sosialiazsaun nu’udár parte ida tranzmite informasaun bá  povu kona-bá planu no politíka sira IX Governu Konstitusionál nian ne’ebé lideradu hosi Primeiru-Ministru (PM) Kay Rala Xanana Gusmão.

Faze primeiru hosi atividade sosializasaun ne’e, MPRM ho Timor Gap, E.P  hala’o uluk iha Suai, tuir fali iha Suku Betano, Postu Same-Manufahe, no Manatuto iha Postu Administrativu Barique-Natarbora.

“Karik, ita-boot sira rona ona, PM Xanana, iha tempu barak nia laran, koalia barak ona, mais pozitivu fó importánsia tebtebes bá dezenvolvimentu ekonómia nasionál,” nia afirma.

MPRM halo sosializasaun bá projetu Suai Supply Base iha Munisípiu Covalima, Kinta (08/02/2024). Foto/Rogério Pereira Cárceres

Francisco Monteiro fó hanoin liu-liu bá joven sira katak, iha mandatu IX Governu nian ida ne’e, sira lakohi lakon tempu barak bá buat polítika sira hanesan lufu-lafu malu ne’e, maibé, Timoroan hotu tenke tau iha vizaun, tau iha preukupasaun maka’as liu bá dezenvolvimentu ekonómiku.

Instituisoens tutelas sira iha MPRM hanesan Timor Gap, ANP, no planu ona mós atu kria tán Autoridade Nasionál bá Mineiru (ANM), toma konta bá área mineiru nian, Murak Rai Timor-Leste nian, toma konta bá komersializasaun ka kompañia governu nian ne’ebé haree kona-bá Mineiru nian.

Alende ne’e, sei mai mós ho Institutu Jeolójia Timor-Leste, ne’ebé maka oras ida sei halo estudus bá rikusoin mineirus ho petroleu nian, iha TL nian, ne’e hothotu servisu iha ministériu petróleu rekursus minerais ninian tutela.

Tuir ajenda hosi gabinéte média MPRM nian ne’ebé Hatutan.com asesu katak, iha Sesta, (09/02/2024), tuku 09:00 dadeer, Ministru Francisco Monteiro, sei akompaña hosi ekipa sira ministériu nian, inklui veteranu, autoridade, lia-na’in no inan-aman sira sei halo vizita konjunta bá Mina Matan Feto Kmaus, ne’ebé lokaliza iha Aldeia Aldeia Tabakolot, Suku Debos, Mina Matan Liurai, iha Aldeia Sanfuk, Suku Camanassa, Postu Administrativu Suai, no Mina Matan Lafaek, lokaliza iha Suku Matai, Postu Administrativu Maukatar.

Jornalista: Rogério Pereira Cárceres