Hatutan.com, (08 Fevereiru 2024), Covalima- Ministériu Petróleu no Minerias (MPRM) sei harii uma hamutuk 63 bá komunidade ne’ebé afetadu hosi projetu Suai Supply Base.

Lee Mós: Governu Kontínua Halo Sosializasaun Dezenvolvimentu Projetu Supply Base iha Kosta Súl

Xefe família hamutuk 63 ne’ebé sira-nia uma hetan afetadu bá projetu Suai Supply Base, tanba durante ne’e harii sira-nian uma besik liu Aeroportu Internasionál Kay Rala Xanana Gusmão, lokalizadu iha Aldeia Holbelis, Suku Labarai, Postu Administrativu Suai Vila.

Ministru MPRM, Francisco da Costa Monteiro enkontru ho lia-nain ho veternau sira Munisípiu Covalima iha Camanasa, Kinta (08/02/2024). Foto/Rogério Pereira Cárceres

Ministru Petróleu no Minerais, Francisco Monteiro informa, MPRM servisu hamutuk ho ANPM, Timor Gap, inklui entidade relevante sira seluk, identifika ona komunidade ka xefe família hamutuk 63 mak afetadu hosi projetu alargamentu bá Aeroportu Suai. Nune’e, ekipa sira MPRM  ko’alia tiha tiha ona ho kompañia operadór sira, katak iha tinan ida-ne’e nian laran, tenke uza ona Aeroportu Suai. Mais, atu bá to’o iha ne’ebá, presiza halo tán investimentu balu mak hanesan muda sees komunidade sira hosi aeroportu.

“Uluk, halo tiha ona ida bá komunidade Matai nian parte kuana nian, ita presiza halo iha Holbelis nian. Dadus ne’e klaru tiha ona, estabelesidu tiha ona, verifikadu  hotu tiha ona, uma hamutuk 63,” MPRM Francisco Monteiro, hateten hafoin atividade sosializasaun iha salaun Autoridade Munisípiu Covalima, Kinta (08/02/2024).

MPRM no Timor Gap tau ona iha planu orsamentu, no tinan ida ne’e duni, sei harii bairu foun hodi re-aloka komunidade afetadu sira hosi projetu Suai Supply Base. Nune’e, MPRM mós sei servisu hamutuk Autoridade Nasionál bá Aviasaun Timor-Leste (ANATL), Autoridade Nasionál bá Petróleu no Minerais (ANPM), ho Kompañia Santos atu haree fasilidade balu ne’ebé mak presiza iha Aeroportu Suai tenke komplementa.

MPRM husu apoiu, kooperasaun, koolaborasaun autoridade ho komunidade sira-nian iha Suai, kona-bá planu hirak ne’ebé maka ministériu sei hala’o ho nia parseiru sira hanesan Timor Resources, Timor Gap, sira sei halo perfurasaun balu iha Suai.

“Projetu ida kona-bá atu kria bairu foun ne’e, kleur ona, no ne’e responsável prinsipál maka Timor Gap, iha ne’ebé tempu besik nia laran sei hahú lansa primeira pedra, atu bele hahú dadauk ona bairru foun tanba ne’e projetu ida importante iha operasionalizasaun aeroportu Suai nian,” Ministru Francisco da Costa Monteiro tenik.

Tuir planu no dezeñu ne’ebé iha katak, bairu foun ne’ebé iha tenpu badak governu sei lansa ne’e, inklui ho ninia fasilidade públiku sira mak hanesan, Kapela, eskola, ho selseluk tán, sai integradu iha planu Timor Gap nian ho ministériu nian.

Komunidade sira ne’ebé afetadu maka’as liu iha projetu ida ne’e mak iha Suku Matai, Labarai, tuir mai Oges, Camanassa no suku sira ne’ebé afeta bá projetu Suai Supply Base mak hanesan, Belecassak, Matai, Oges, Labarai. Totál área ka terrenu ne’ebé sei utiliza bá projetu Suai Supply Base ne’e hamutuk hektáre rihun ida resin.

Lia-Na’in Husu Kria Sentru Formasaun Lian Inglés

Lia-na’in no veteranu sira iha Suku Camanassa, Postu Administrativu Suai Vila, Munisípiu Covalima, husu Governu liu-liu ministériu relevante sira, atu loke ka instala mós sentru formasaun ida kona-bá Lian Inglés nian atu bele kapasita foinsa’e sira iha área linguistíka.

Rekomendasaun ida-ne’e hato’o hosi Vetaranu Jorge Alves, ne’ebé hanesan mós lia-na’in iha Suku Camanassa, durante simu vizita hosi Ministru Petróleu no Minerais (MPRM), Francisco da Costa Moneteiro, no ninia ekipa sira ministériu ne’e nian iha rezidénsia Camanssa.

“Iha ne’e, ha’u hakarak hato’o de’it bá Ministru MPRM, Francisco da Costa Monteiro katak, iha ne’e buat ida lingua ne’e maten loos. Halo oinsá mak supply base ne’e bele fó ita moris fila-fali. Sé bele, MPRM loke mós kursu inglés iha fatin ida ne’e, atu nune’e bele indika katak, fatin ida ne’e mak iha baze bá supply base,” Lia-na’in Camanassa, Jorge Alves, hateten, durante simu vizita Ministru MPRM Francisco da Costa Monteiro nian iha nia rezidénsia Camanassa, Postu Administrativu Suai,  Covalima.

Reprezentante Veteranu iha Suku Camanassa ne’e dehan, durante ne’e sira laiha sentru formasaun ruma kona-bá lingua liu-liu ingléza, tanba ne’e maka labarik barak mak ezíje loos atu iha duni sentru formasaun bá lingua ingléza.

Hatán bá rekomendasaun ida ne’e, Ministru Francisco Monteiro dehan, Governu sempre liuhosi ministériu petróleu no minerais sempre iha planu, atu bele envolve Timoroan barak iha prosesu sira ne’e hotu, la’os iha Covalima de’it, mais, nia enkorajatu ema hothtou bele inisia servisu hamutuk harii sentru formasaun sira, atu bele fó treinamentu espesifiku balu, hodi nune’e bele ajuda, aban-bainrua, kuandu iha oportunidade kampu traballu, servisu iha ne’e.

“Espesifikamente bá Camanassa, ami mós iha hanoin balu, ami trasa planu balu, parese sei hahú mós ho halo treinamentus balu bá Inglés, tanba hakarak ka lakohi, indústria ne’e la’o hela mós ho Inglés, depois ita haree tán lingua sira selseluk, ita haree tán treinamentu sira selseluk ne’e, iha planu ona. Tinan ida ne’e, ita hahú buat balbalu ona, inklui treinametu inglés, ita bele hahú,” hateten Francisco Monteiro.

Jornalista: Rogério Pereira Cárceres