Hatutan.com, (20 Fevereiru 2024), Díli-Membru Polísia Nasionál Timor-Leste (PNTL) ho inisial AM ne’ebé nu’udár autor ba kazu tiru membru FALINTI-Forsa Defeza Timor-Leste (F-FDTL), foin lalais ne’e, iha Likintae, Díli, submete ona bá prosesu primeiru interrogatóriu judisial iha Tribunál Judisial Primeira Instánsia Dili (TJPID).

Lee Mós: Kronolojia Versaun Polísia Kona-bá Kazu Tiru iha Likintae

Suspeitu AM bá kazu tiru membru F-FDTL iha Likintae, Díli, submete bá Primeira Interrogatóriu iha TJPID, Tersa (20/02/2024). Foto/Tome da Silva

Iha insidente tiru ho pistola ne’e, rezulta vítima inisial AdRS nu’udár membru F-FDTL hetan kanek. Observasaun Hatutan.com iha resintu TJPID nota katak, PNTL liuhosi ekipa Departamentu Investigasaun Kriminál (DIK) Nasionál transporta suspeitu AM iha karreta marka Pajero, laiha númeru matrikula, to’o iha oras tuku liu minutu sanulu (15:10), oras lorkraik Otl.

Suspeitu AM ho kondisaun alzema (borgol) metin iha liman-rua, no membru DIK sira mós akompaña lori tama bá sela Tribunál nian, molok tama sala julgamentu nian, hodi tuir prosesu primeiru interrogatóriu judisial.

Kronolójia Versaun Polísia

Iha Segunda, (19/02/2024), horseik, liuhosi konferénsia imprénsa, Komandante Jerál PNTL, Komisáriu  jerál Polsia Hendrique da Costa, haktuir iha Domingu madrugada (18/02/2024), bainhira suspeitu ho inisiál AM nu’udár membru Unidade Espesiál Polísia (UEP) ne’ebá mak kolokadu iha Servisu Informasaun Polísia (SIP) fila hosi serbisu fatin bá uma.

Bainhira to’o iha área Likintae, Taibessi, mosu insidente ida iha área refere, iha ne’ebé maka mosu uluk ema nia provokasaun hosi kedas merkadu Taibesse nian.

Ema sira ne’ebé halo provokasaun, utiliza sira-nia transporte motór ida, ne’ebé transporta ka tula mós ema ida iha kotuk, katak, ema na’in-rua ho motór ida de’it, viájen liuhosi área merkadu Taibessi nian, maibé, sira kontra regra tránzitu nia.

Haree bá violasaun kódigu estrada ne’e,  suspeitu  AM  nu’udár membru PNTL tenta atu fó hanoin, maibé iha tempu ne’ebá la konsege, no nia mós kontínua halo viájen bá to’o iha Likintae nian, mosu sidadaun joven na’in-rua ne’ebé motór foin liu ne’e halo fila-fali provokasaun hasoru nia iha dalan.

“Iha situasaun ne’ebé maka ita-nia membru PNTL ne’e tenta atu aviza bá iha joven na’in-rua ne’e, no nia hasai pistola hodi tiru adverténsia ka fó atensaun, katak nia autoridade seguransa ida, depois nia tiru bá iha alkatraun maka kartuz (bala-musan) haksoit sa’e bá kona ita-nia joven na’in-rua n’’e ida,” Komisáriu jerál Polisia Henrique da Costa, hateten liuhosi konferénsia imprénsa,  Segunda, horseik.

Hafoin akontesimentu tiru ne’e, ikus família sira ne’ebé hela besik, kontakta kedas bá ambulánsia, hodi lori bá Ospitál Nasionál Guido Valadáres (HNGV) maka identifika katak  joven na’in-rua ne’ebé utiliza motór ne’e (ida tuur kotuk) membru FALINTIL-Forsa Defeza Timor-Leste hosi Komponente Navál.

Mezmu nune’e parte komandu jerál PNTL  orienta kedas ekipa sira iha Departamentu Investigasaun Kriminal Nasionál (DIKN) hodi buka tuir autór. Nune’e, iha Domingu ne’e kedas, purvolta tuku 10:00 dadeersan, suspeitu  AM entrega aan rasik iha Komandu Jeral, no parte investigasaun, kontinua kedas ho ninia prosesu.

Tempu ne’ebá DIKN komunika kedas ho Prokuradór atu hetan orientasaun hodi halo prosesa kazu ne’e no prosesu ne’e rasik DIKN rejsta ho Númeru Úniku Kriminál (NUK) 040/2024.

“Ita hein orientasaun hosi Ministeriu Publiku bainhira maka ita bele aprezenta bá iha MP, atu nune’e, prosesa tuir lei,”Komisáriu Polísia Henrique da Costa  hateten.

Membru PNTL ho inisial AM ne’ebé deskonfia hanesan autór hosi kazu insidente ne’e, dadaun ne’e detein ona iha sela detensaun komandu Munisípiu Díli hodi submete bá prosesu legál sira ne’ebé vigora.

Komandu Jerál PNTL mós orienta ona investigasaun konjunta ne’ebé maka envolve diresaun nasional dixiplina justisa PNTL ho mós parte dixiplina Forsa Defeza nian hodi halo inkéritu konjunta.

Komadante Jerál PNTL mós komunika kedas ho Xefe Estadu Maior Jenerál F-FDTL, Tenente Jenerál Domingos Raúl “Falur Rate Laek”  ne’ebé orienta ona bá superior sira iha baze, atu nune’e, nafatin kontrola no akalma membru sira, tanba ninia prosesu ne’e la’o hela.

“Ita sei la defende ka ita sei lakohi para atu nune’e fo komentáriu ruma, sein desizaun ka rezultadu ne’ebé maka hosi parte judisial sira nian kompeténsia. Purtantu, ita sei la defende buat ida, maibé, ita hakarak atu hatuur katak, ema buat hothotu la’o tuir nia prosesu, kriminal la’o tuir prosesu kriminál, depois dixiplinár mós la’o tuir prosesu dixiplinár nian,” Komandante Jerál PNTL, Komisáriu Henrique da Costa hateten.

Jornalista: Rogério Pereira Cárceres